宇宙傳送門: 2.29

現時晏就三點十三分，啱啱知道自己冇死到，而且仲發現自己俾郭俊言斬斷嘅右腳變咗做一隻綠色，冇羽毛嘅雀腳。咁都唔止，而家出現係我面前嘅竟然係嗰個殺母仇人。

「係你….」

個痴線佬自己揾咗張櫈坐低，繼續指住啲嘢食，示意叫我食咗嘢先。

我暫時俾唔到任何嘅反應，我完全冇諗過會係呢個時候見返佢。

個痴線佬身邊有個細路，一個大約係十二、三歲大嘅細路。





呢個細路有幾個奇怪嘅地方，因為頭先見返個痴線佬實在太意想不到，所以唔太在意。

首先，細路身型有啲微胖，有一個小型嘅爆炸頭，頭頂上面竟然有一朵花，一朵紫色嘅花。唔知係佢本身頭頂生出嚟定點。

細路目無表情咁望住我，雙手抱住咗圈圈。

我見到圈圈眼仔碌碌，都幾精神咁，我突然醒起，比起佢兩個係咩料，我仲有更加需要知道嘅嘢。

「家姐….啊，同我一齊，應該仲有三個人㗎？一個女，一個男，仲有一個大肚婆。」





「你已經瞓咗兩日，食住嘢聽啦。我哋今日會有好多嘢講。」

「你答咗我先。定係，你連佢哋都….」

個痴線佬嘆咗口氣「後生嗰個女人冇事，係出面煮緊嘢。個男嘅都冇乜事。」

「…..」

「個大肚婆同肚裏面嗰個就保唔住。」





「…..」李太，我仲以為自己已經成功救到所有人。

「咁嘅環境，要救到佢本身都難。」

「…..」

「我嚟揾你，係想同你達成共識。」

「啊…….」我係一聲吼叫嘅同時，向住個痴線佬衝過去。

我一時之間唔記得咗自己對手係被綁住咗，但都無阻我想打柒個痴線佬嘅決心。

身體又虛弱，對手又綁住咗，又唔適應隻雀腳，連行一下都會痛。而家嘅我嚟講，對個痴線佬根本造唔成任何威脅，純粹就係一個激動嘅病人。

個痴線佬冇諗住企定定係度俾我發爛渣，佢毫不客氣咁打返我轉頭。





我同佢開始係間房度打起上嚟，但實際上係我俾佢打多啲，啱啱先好返嘅我，又再俾佢打到傷晒，啲傷口又再撕開。

不過，我係意志上戰勝咗肉體上嘅痛楚，不斷咁起身還手，因為我真係好唔服氣。

最後，個痴線佬打咗好重一拳落嚟，我就咁瞓咗係地上，不停咁咳。一停低咗個人，全身上下嘅痛楚一次過湧出來。

「啊～～～～～～～」我嘅慘叫聲夾雜住痛苦同唔甘心。

「我就係知你會咁先綁起你。」個痴線佬重新坐返低。

呢個時候，家姐應該係聽到動靜，入咗嚟「咩事吖？林日星…」

家姐過嚟想扶我「做咩事吖你？啱啱醒返就….，我幫你鬆開…..」





「出去。」我瞓係地下，對眼望住天花板。

「….」「係咪就係佢？」家姐突然好似明白咗。

「我話出去！我嘅事我自己會搞掂。出去吖！」我流住眼淚，第一次對住家姐咁大聲。

「…..」家姐表情變得暗淡，無言咁出咗去，好大力咁嘭埋咗道房門。

「你聽咗我講先啦。」個痴線佬話。

「係我鬆綁你之前，我想我哋達成咗共識先。」

「共乜撚嘢識？我同你嗰筆都未完。」

「我就係同你講緊嗰筆。」





「你綁起我，係驚我會殺咗你係咪？」

「我有冇同你講過，你同我好似？」

「….吓？」

「我個名同你唔完全一樣，你係林日星，我係林日辰。暫時遇到嘅都係叫做林日星，同我一樣嘅好似都係得兩個。」

「….」

「你知唔知，每一個宇宙都代表住各種大大小小唔同嘅變數，就連精子一粒唔一樣，都會產生一個新嘅宇宙。可想而知，平行宇宙係冇數量可言。」

「….」





「如果呢樣咁嘅話，嗰樣咁嘅話，你所諗到嘅每一個如果，都存在係平行宇宙。有啲係差唔多樣嘅，有啲係完全唔一樣嘅。」

「….」

「跟住落嚟我要講嘅嘢，會令你有似層相識嘅感覺，甚至乎係一模一樣。」

「….」

「希望可以叫醒你。」

跟住落嚟係由林日辰所講，佢過去嘅嘢：

係好細個嘅時候，我嘅親生老母就跟佬走咗，之後就再冇見過佢。不過我都係之後先記返起。

自此之後，老豆就開始咗飲酒，每一日飲，每一餐飲，每一次我見到佢嘅時候都係係度飲。開始咗酗酒之後，佢就冇理過我，就好似我冇存在過咁。

直到有一日，老豆帶咗個女人返嚟。嗰日係我第一次見到嗰個女人，嗰個孕育惡魔嘅惡魔。