宇宙傳送門: 2.27

現時晏就唔知幾點，便利店內嘅嘢飲出現極光，然後疑似係由我嘅身體傳送返出嚟，四周圍咁噴射。

人體嘢飲大贈放，無定向咁射向人群。大家都處於極為驚嚇嘅狀態，現場俾我造成一片混亂。

「咩撚嘢吖？！」「啊～！」

一啲嘢飲擊中兩個面具人，一啲俾面具人用刀斬開，爆晒汁，李生亦都無辜咁俾一枝水擊中額頭。

係嘢飲風波都未平息之際，舖頭上方嘅極光連帶啲照明光消失咗。舖頭內一下子變得灰暗，本身出面都冇乜日光照到入嚟。





兩秒之後，我身體嘅極光消失咗，之後白色照明光由我身體集中照出。

驚嚇嘅事情接二連三係我身上發生，大家都嚟唔切考究咩事，雙手遮住雙眼，防止俾突如其來嘅強光所襲。

我趁住郭俊言佢哋陷入混亂嘅期間，我一隻右腳用盡全力咁伸落郭俊言個肚度。

正如當年一樣，我呢一腳伸到郭俊言向後仆咗幾米。

我行前坐係郭俊言身上，一拳又一拳咁將我嘅怒火傳遞落佢塊面度。





家姐係呢一片混亂當中亦都開始反抗，係適應環境嘅同時，仲要擺脫身後嗰兩個面具人。

由於嗰兩個面具人要遮住對眼，鬆開咗手，所以以家姐嘅身手嚟講，搞掂佢兩個並唔困難，三兩下手勢已經結束呢個回合。

我身上發出嘅照明光開始減弱，然後原本捉住李太嘅兩個面具人就過嚟捉我，將我由郭俊言嘅身上拉開。

「帶佢走吖！」我對住李生大叫，要佢帶李太走先。

李生聽到之後都立即把握機會，去抱起李太。





家姐搞掂完佢嗰邊嘅面具人之後，佢衝過嚟幫我手，我哋一齊解決捉住我嘅兩個面具人。

瞓係地下俾我打到爆晒血嘅郭俊言，而家先開始慢慢咁起返身，不過呢個時候我哋已經解決完啲面具人。

呢次可以走得甩，係一場勝仗。我哋四個向舖頭門口奔跑，李生抱住李太出咗去，之後係家姐出咗去，最後嘅係我。

大家出咗去之後，只要唔好停，一直跑入迷霧當中，相信就會安全。

但係呢個時候，最係一個即將要出去門口嘅我，俾人拉住咗。

我擰轉身一望，就已經係郭俊言一個拳頭飛埋嚟。

所有人都成功出咗去，得返我一個俾人捉住咗。

其中兩個面具人捉住咗道門，唔俾任何人出，亦都唔俾任何人入。





家姐想入返嚟嘅時候都已經太遲，道門俾兩個人捉到實一實。李生暫時將李太放低咗係一邊，然後過嚟幫手推門。

出面係一男一女，入面係兩個男人，大家互相鬥力，始終家姐佢哋都係開唔到門。

舖頭入面，兩個面具人同郭俊言冇停過咁毒打我。

「喂！停手吖！」家姐心急如焚咁拍門，通過玻璃門，可以清楚見到入面嘅情況。

打到咁上下，兩個面具人一人一邊咁捉住咗我，得返郭俊言一個，一拳拳慢慢咁折磨我。

輪到我個頭爆晒血咁，啲血流入咗我左眼，左眼嘅視線因而受到影響。

「嘩～！林日星～～！」郭俊言打到佢自己都攰晒，叉住腰咁抖氣。





「撳低佢。」郭俊言對兩個面具人講。

兩個面具人照做，將我撳低係地下，用身體壓住咗我左右手。本身我都已經冇乜體力，所以都反抗唔到。

見到家姐佢哋出咗去，我就放心啦。

我瞓係地下，單眼咁望住郭俊言拎返佢個斧頭出嚟，然後佢用腳踩住我隻左腳。

我冇力，冇心反抗啦已經。

「嗰時你係呢隻腳踢我下話？」佢用斧頭指住我隻右腳。

「….」我係咪要死啦終於…..

「然後你頭先又！係用呢隻腳踢我下話？」





「咁鍾意用呢隻腳嚟踢我，不如送俾我啦。」

郭俊言講完之後，冇一刻嘅猶豫，向上舉起咗個斧頭。

算啦…..事旦啦……

「唔好呀～～！」家姐係門口大嗌。

隨住家姐嘅叫聲，斧頭下墜，斬咗落我右腳嘅膝頭哥對落。

「啊～～！」

一下斬唔斷，郭俊言再斬多咗幾下。我係第一下之後已經冇感覺，但我仲可以見到佢個斧頭，上上落落嘅時候帶出嚟嘅血液。





係我模糊嘅視線當中，我見到門口俾人打開咗，入嚟嘅唔只係家姐同李生，仲有另一個人同一個細路。

我未嚟得切睇係咩人，我就失去咗意識，一片黑暗。