宇宙傳送門: 2.26

舊時中四嘅第一次反抗，受到李浩朗嘅影響，我終於向郭俊言作出反抗。

我一腳踢向郭俊言，可能呢腳真係佢預想不到，所以佢完全冇企穩，向後仆低咗。

我呢下嘅反抗，其他人都預測唔到，但跟住落嚟要發生嘅事，就係人都估到。

大佬一仆低，唔使九秒九，啲手下就發晒癲咁向我撲過嚟。

「跟住呢？」我向李浩朗求救。





「我都唔知。」

「仆街…」

對面四個手下對我哋兩個，形勢就如在場嘅觀眾預期一樣，我同李浩朗俾佢哋打到仆街。

不過，雖則唔夠佢哋嚟，但我哋今次再唔係成條死魚咁俾人撳住嚟打。每俾人打三、四拳，我哋都可以還返一拳過去，都叫做有來有往。

「噢～星仔～！」郭俊言起返身，表現到有啲興奮咁嗌我個名。





郭俊言都過嚟參戰，戰況變成係五打二。

李浩朗俾人打到企都企唔穩，俾佢哋當係排球咁打嚟打去，但佢都冇放棄到同我一齊對抗。

係佢哋十幾拳，我哋三、四拳之間，我感覺同以前唔同，就算係輸緊都好，因為我哋唔係冇還手，所以感覺上好似冇咁難受。

「點解仲可以企係度㗎呢條友，邊有咁襟打㗎？」其中一個手下喘晒氣咁。

「停手！」門口傳嚟一把中年男人嘅聲音。





所有人都停咗手，係得返郭俊言一個繼續係度打。

「喂！」中年男人大聲喝停。

郭俊言係回應之前都要打多一拳係李浩朗塊面度「咩事吖？陳sir。」

郭俊言行近陳sir度「大家男仔之間玩下啫，有啲身體碰撞唔出奇吖，定係阿sir覺得有問題吖？」

郭俊言向陳sir提出嘅問題，為在場嘅其他人帶嚟咗違和感。一個學生對老師作出咗威脅性嘅問題，睇嚟郭俊言真係有黑社會嘅靠山。

「適可而止吖。」陳sir一啲都冇被動搖到。

「哼！吖～，Okay。」郭俊言撞一撞陳sir膊頭之後離開咗班房，其餘手下都跟住出去。

事件暫時告一段落，我同李浩朗都帶住傷痛同疲累瞓低咗。





李浩朗向我伸咗個拳頭出嚟，我望咗一陣先明白佢係想點。於是，我都伸咗拳頭出嚟，大家對碰咗下。一齊反抗咗之後，感覺都唔差。

過咗兩日之後，陳sir冇再出現，有人話佢請咗病假，甚至乎有人話佢入咗醫院。兩個星期之後，陳sir就辭咗職。

自此之後，就更加冇人可以管得住嗰個郭俊言，我同李浩朗嘅日子都開始唔好過。

郭俊言繼續變本加厲，出盡各種花式嚟折磨我哋。而家我哋張比堅尼合照都應該可以上網揾到。

可能因為我哋唔係一個人嘅關係，都總算可以挨到。直到中五，郭俊言因為搬屋就轉咗校，我哋嘅日子先冇咁辛苦。

時間嚟到現時嘅便利店。

「係咁嘅情況都可以撞返，都真係天意嚟。你同嗰個，另外嗰個唔記得咩名嘅，同佢分咗手未呀？」





「…..」

「唉，你都仲係咁撚樣。問你十句，你先開口講一個字。而家仲有冇每日飲啲污糟水吖？」

「…..」偏偏要係家姐面前撞返佢，仲要同我提起以前啲嘢，明明都已經忘記得七七八八。

「哈哈….你記唔記得…哈….剃眉毛嗰次….哈哈，真係勁正。」

「….」

我諗起以前嘅事令我開始有啲火滾，而家仲要俾家姐聽到。係我情感開始上漲嘅時候，心跳係不知不覺間加速，身體已經有微光出現。

「…你呢個咩眼神吖？」

「你好撚多嗲。」





「吓？」

我身體發出極光，但今次我並冇下墜，衫褲都冇消失。

反而舖頭內，上方嘅光管出現咗極光，大家嘅目光都俾極光所吸引咗。

正當大家都係度出奇緊咩事嘅時候，連周圍嘅某啲商品都開始有極光。

大家都應該以為我同啲商品會連同極光一齊消失，來回望我又望下啲極光嘢飲咁。

「今次我要你….」係我講緊嘢嘅時候，側邊有幾罐極光可樂傳送走咗。

「….死夠十*%#¥&。」我講講下出現咗唔係我嘅聲音同言語。





然後係我發光嘅膊頭位，一罐可樂向住天花板射咗出嚟。

接二連三咁，連續幾罐嘢飲由我身體傳送出嚟，東南西北冇定向咁噴射出嚟。