宇宙傳送門: 2.16

現時夜晚八點三十分，我同家姐決定係一艘疑似係挪亞方舟嘅木船内過夜。

我哋係木屋內嘅浴室發現咗幾隻綿花糖熊貓仔，睇嚟只係可愛嘅平行宇宙生物，並冇任何威脅。

幾隻嘅熊貓仔一路跟住係我哋後面，係間屋度行嚟行去。

我哋係呢間屋嘅窗口望出去，並唔係見到出面竹林同池塘嘅景色，而係呢艘木船出面嘅景色，即係一片迷霧同當中嘅高樓大廈。

睇嚟呢間木屋就係甲板頂嘅嗰間木屋。係廚房嗰邊，有一道門可以出到去外面嘅甲板。





出面嘅環境同我哋想像嘅差唔多，冇乜特別，而且出咗去一下，再次提醒我哋出面真係好熱，反而船入面好似有自動調節咁，每個自然環境嘅温度都係啱啱好。

我哋拎咗兩張櫈去出面嘅池塘邊食晚餐，由於木屋入面太多塵，拍幾拍之後完全呼吸唔到，反正我哋都只係食個杯麵，有張櫈都己經夠晒。

出面竹林嘅上空，萬里無雲，大大個月亮，其實唔使點蠟燭都足夠睇得清楚。

身邊有幾隻熊貓仔，附近又冇任何嘅雜音，周圍各種嘅環境因素形成咗一個好舒適又治療嘅空間，可以令我哋暫時將啲痴線嘢拋諸腦後。

果然，冬陰功味真係唔係我嘅口味，但有得食都感恩。唔需要十分鐘，連湯汁都落晒係我個肚度，雖然呢個量根本係完全唔夠飽肚，但為咗節省資源都冇計。比起生活，而家更集中於生存。





頭先一路上嚟，都好似冇見到有啲咩水果，咁多自然環境，咁多植物，但一棵果樹都冇。咁以前啲動物食咩？呢班熊貓仔先係食咩？

食完個簡陋嘅晚餐之後，我同家姐就咁坐咗係度，頭向上望，觀賞呢片唔知係真定假嘅星海。

再望返面前呢個池塘仔，發現其實啲水清到可以見到池底，深度只有人嘅腰部咁高。

「啲水清到可以沖個涼….」
「其實可以係呢個池沖涼….」

我同家姐同一時間講咗出嚟，大家都係講緊可以係呢個池塘沖涼。





我哋對望咗下，大家都輕輕咁笑咗出嚟。而家大家嘅想法都不外乎係想好好咁清潔下自己。

「今晚我哋輪流瞓會比較好，呢度可能唔只得我哋入嚟。」

家姐點頭同意「你入去瞓咗先啦，尋晚你都冇乜點瞓過。」

「嗯。坐多陣就入去。」

我哋繼續睇返上空嘅無敵星景。呢度真係一個療養院咁，可惜我哋唔可以一路留係同一個地方，直到我哋四個再次相聚為止。

「所以，要等到幾時？…..呢個狀態。」

「我都唔知….」我應唔應該同家姐講呢個世界其實已經玩完。雖然唔知少女講嘅隕石幾時會發生，但到時我哋每一個都難逃一死。





「咁有冇方法可以停止？」

「….我都唔知。」

可以傳送於宇宙之間嘅其他我，留係同一個宇宙太耐，嗰個宇宙就會世界末日，呢個似乎係不可抗力、冇得選擇嘅事。

加上唔知點解，少女佢而家係離開唔到呢個宇宙，原本呢個係唯一可以救到呢個世界嘅方法。

唔係本意咁，呢個世界嘅所有生物都係度等死。

我思考咗一陣，都係決定將呢一切講俾家姐知，早啲講出嚟好似對佢都公平啲。

家姐聽完之後，沈默咗好耐，睇嚟佢都係要一段時間去消化呢個訊息。

我起身準備入屋瞓，順便俾家姐去消化下。





臨走前，家姐終於開口講咗一句。

如果大家都係等死嘅話，咁我哋目前為止咁努力係為咗啲咩？我以為家姐係會講類似嘅話說。

「極光人。」

「..？」

「如果留係度，大家都會死嘅話，我哋可以唔留係度。」

家姐嘅意思應該係去另一個平行宇宙，就好似其他極光人咁，傳送離開。

「但係根本唔知點樣傳送，正常人嘅話。就算真係可以傳送，都唔知會傳送去啲咩地方，或者可能係另一個地獄。」





「…..」

「或者，可能，可以揾返我屋企人。」「或者，可能，係新嘅開始。」

「…..」

「哼….嗯。或者，可能，係一個天堂。」或者，可能，會有方法。