宇宙傳送門: 2.17

現時凌晨時分嘅唔知幾點，我係木屋嘅床上面醒咗。

朦朧當中，我捽一捽對眼，身邊冇任何工具可以話俾我知而家幾點，淨係知應該係未天光。

我第一時間係去廁所，屙個尿先。之後我出嚟望出窗，外面嘅情況依然一樣，並冇特別。

於是我諗住出去同家姐交換位置，由家姐去休息，我嚟睇水。

我打開門，係大約二十厘米闊嘅門罅之間，我再次見到嗰個危險嘅背影。





家姐一個企咗係池塘嘅中心，月光底下一絲不掛嘅身軀，呈現出接近完美嘅身體曲線。

家姐用池塘嘅淨水幫自己抺身，綁起咗黑色秀髮，係呢個充滿自然色彩嘅環境當中，佢就好似住係呢個竹林嘅妖精咁。

我通過呢個門罅偷望呢幅夢幻嘅彩畫，都難以掩飾我內心嘅男兒本色。

呢個時候，家姐將要擰轉身，將佢赤裸嘅妖精身軀擰過去。

但係我做咗極少數男人會做嘅決定，我將面前嘅門閂埋咗，因為我都唔係普通嘅男人。





我再次開始感受到我心跳嘅變化，熟悉嘅微光。

我要快啲冷靜落嚟，好好咁調節返個呼吸，做幾個拉筋嘅動作。

將腦海裏面心動嘅畫面切換，換做李浩朗個傻仔樣。

紅綠色嘅微光漸漸消失，今次亦都成功俾我壓制到落嚟。

我諗可能家姐係點著我呢個炸彈嘅火機嚟，呢個情感我應該係唔會控制到。係呢個世界要未日之前，我個內心可能會搶先未日。





睇嚟要等家姐沖完涼先可以再出去。我企咗係門後，諗住去床邊坐低等，但係到達床邊之前，我踩到啲黐笠笠嘅嘢。

我睇下鞋底同地下，係一啲白色嘅嘢。我拎返個電筒出嚟照住，並唔係只得一撻，而係有好幾撻係地下。

係呢一撻撻嘅白色嘢之間，仲有圈圈係度周圍行緊。

「唔係下話你….？」

睇嚟圈圈係將嗰幾隻綿花糖熊貓仔食鬼咗。我抱起圈圈，睇一睇佢嘴角都有相同嘅痕跡。

「唉….全部都食咗？」

「….」

「甜唔甜……？」





「Knock Knock!」一個敲門聲打斷咗我嘅提問。

「我入嚟啦。」

「哦。」

家姐打開門入嚟，當然着返好衫「醒咗啦？」

「嗯。咁…輪到你休息啦。」

「我係出面個池浸咗陣，你都浸下好啲喎。」

「喔….係咩？…好吖。」





「但係地下呢啲咩嚟㗎？」

「…..係啲熊貓屙出嚟㗎。之後佢哋就走咗啦。」我見頭先家姐好似幾鍾意啲熊貓仔咁，所以講咗個善意嘅大話。

「所以呢啲係佢哋嘅排泄物？但我唔見佢哋有走出嚟喎。」

「或者可能有其他出口。我出去啦，早抖。」講完我就抱埋圈圈出咗去，結束呢個尷尬嘅大話。

我出到去，見到一舊大石頭上面晾咗幾件衫，家姐將佢啲內衣褲晾咗係後面少少嘅位置，我咳咗下之後轉身去咗池塘邊。

我直接將圈圈放咗係水面，然後再除晒啲衫褲，輪到我一絲不掛去浸落水。

第一下浸落去，俾啲水嘅温度嚇親我「呀，好凍。」用咗半分鐘去適應，之後先可以成身浸晒落去。

雖然冇番梘之類嘅嘢，但都已經感覺非常感恩。我就好似幾個月冇沖涼咁，成身超級爽快。





之後，我坐咗係邊邊位度浸住，呢個位置嘅深度啱啱好夠我坐係度，淨係露個頭出嚟。

我將個頭挨低係池邊嘅石頭度，再將腦海裏面所有雜訊暫時清除。人就係間中要發下吽豆，個人先會冇咁痴線。

但而家想發個吽豆都難，個人一靜落嚟就會諗嘢。自從個痴線佬出現之後，就好似冇停過落嚟咁。

痴線佬嗰單嘢要點算，我係咪仲要報仇？我可唔可以忘記呢段記憶？我可唔可以放低？好想放開手….

我要用差唔多十分鐘嘅時間先可以令自己暫停思考。

我眼望前方，小型瀑布嘅聲量啱啱好，配合返我發吽豆嘅氣氛。

過咗一陣，清除完腦內部分嘅垃圾之後，迎嚟嘅第一個想法，如果企係個瀑布底，俾啲水壓撞下應該會幾舒服。





十幾步嘅步程，我嚟到呢個有三米高嘅小型瀑布附近。首先試吓瀑布底嘅水深，大約去到我心口嘅位置。

呢個瀑布嘅水壓比我睇落去仲勁啲，要企到實一實先唔會俾佢沖走。

話口未完，由於水底嘅石頭有啲滑，一時唔小心我就失去咗平衡，身體向後傾，跌咗入瀑布後面。

我嘅背脊後面撞到啲有輪廓，仲好整齊嘅石。我即刻喺水裏面起返身，捽一捽對眼，原來頭先撞到嘅係一個石造嘅梯級。

瀑布嘅後面有一個同樣三米高嘅山窿，去到呢個地步，我又嚟到一個新空間，都已經冇乜好驚訝。

不過令我有啲意外嘅係，山窿入面有一道門，係唯一我喺呢首船入面見過唔係用木造嘅門。