宇宙傳送門: 2.15

現時傍晚五點二十三分，我同家姐係城市當中發現一艘巨大嘅木船。

我哋由大門右下角嘅一道細門踏入去木船嘅內部。

我踏入去嘅第一步，並唔係踩到木頭，而係柔軟嘅草地，一棵棵青草連接起嚟一片廣闊嘅草原。

船入面嘅廣闊程度絕對係闊過出面睇呢艘船，或者係視覺錯覺。

唔單止地下係草原，連天花板都唔係木頭，係一望無際嘅天空，呢個天空仲係配合返而家嘅時間，正正係浪漫嘅黃昏時分。





唔同出面，呢度冇迷霧，係最原始嘅大自然環境，我仲好似感覺到黃昏灑落嚟嘅温度。

但係呢片草原並未能夠充滿生機，因為我只係見到有植物，而動物嘅痕跡就未能發現。

望向右手邊，有一條木做嘅樓梯，連接住一道架空嘅木門。呢道木門都有一定嘅高度同闊度，應該唔只係俾人入，仲有就咁睇呢道門，並冇連接住其他嘅房間。

我行上樓梯，打開呢道木門，門入面又係另一個廣闊嘅空間，另一個大自然嘅環境。

我伸個頭去門框外嘅另一邊，望到嘅係頭先嘅青青草原，但係正面望入道門就係另一個空間，呢度到底係魔法定咩高科技嘢？





第二層係一個熱帶雨林嘅空間，同頭先一樣，周圍充滿植物，就係冇任何動物嘅足跡。但係完全冇動物嘅話啲植物點算？定係啲植物係假嘅？

不過嚟到呢度，我基本上係確信呢艘就係挪亞方舟。

然後，同樣係呢一個空間，右手邊都出現有樓梯連接住一道架空嘅木門。

一道又一道架空嘅木門，打開全部七層係不同嘅自然環境。最後，我哋嚟到一個竹林，呢度應該係最高嘅一層，最後嘅空間，因為呢度再冇出現架空嘅木門。

我哋行到竹林嘅中心位置，有一個小型嘅瀑布，瀑布流落嚟有個小型嘅池塘，池塘嘅隔離有間小木屋。





我哋於是就行入呢間木屋，木屋又係一個空間魔法，屋入面嘅面積有成個排球場咁大。

木屋入面係一個普通嘅生活空間，有齊晒一個屋企應該有嘅家具，仲有床添，雖然得一張。

船內嘅天色開始昏暗，我哋就決定係呢間木屋渡過今晚。

木屋嘅所有嘢都舖滿咗塵，應該係有好幾年嘅量，不過我哋需要用到嘅家具其實都唔多，稍為打掃下都算一個唔錯嘅落腳點。

木屋內，只係有啲比較原始嘅用具，一樣電器都冇。由於天色昏暗，我哋拎咗電筒出嚟照住，將屋裏面有嘅蠟燭點着。

呢度都有間浴室，但已經係冇水出，原本仲以為可以沖個靚涼。離開浴室嘅時候，我留意到角落有幾個白色嘅球體。

我哋仔細留意呢啲白色嘅球體，球體中間有條啡色嘅間條。

呢啲球體有我大脾咁高，而且睇嚟個表面就好似係平時食得嘅綿花糖，所以呢啲係大型嘅綿花糖嚟？





我諗住伸手去掂下其中一個之際，呢個白波郁咗，佢碌過嚟，我同家姐都即刻退後咗幾步。

然後呢個啡白色波波打開咗，佢有眼、有鼻、有口、有耳仔、有手又有腳。呢個模樣，佢就係一隻熊貓仔，一隻啡白色，綿花糖身嘅熊貓仔。

隨住我哋面前嘅呢隻綿花糖熊貓仔現咗真身，其他嘅啡白色波波都跟住一齊打開，現真身。

幾隻奇異熊貓仔同時出現係我哋嘅身邊，但係佢哋嘅外表就係超級得意，行動又緩慢，似乎係一啲危險都冇。

「啊～！」呢個時候嘅家姐已經抱起咗其中一隻，佢似乎係覺得太得意先尖叫咗一下，但佢見到我望住佢嘅時候，佢收起咗笑容，尷尬咁擰歪咗面。

見到家姐嘅呢一面，令我開始覺得佢其實就係一個粉紅色嘅少女。

其中一隻嘅熊貓仔過嚟抱住咗我隻右腳，我都忍唔住抱起咗佢。抱起佢嘅觸感完全就係平時吃綿花糖掂到嘅觸覺。





我望住我手中嘅綿花糖熊貓仔，心中有個唔太好嘅諗法，其實佢係咪可以就咁咬一啖嚟食？

正當我係度諗緊呢個問題嘅時候，圈圈都應係同我諗緊同一樣嘢，因為佢已經係度追住其中一隻嚟啄。

我先係抱起咗圈圈，阻止佢狩獵啲熊貓仔。雖然我本人都幾好奇，但活生生咁食好似又唔多好。