宇宙傳送門: 1.27

現時凌晨十二點四十六分，經過紅瘡泡泡一役之後，我哋受到強制隔離。

雖則夜已深，大家都好攰，但李浩朗仲係有好多問題要問我。

「塊鏡入面出嚟？所以佢同頭先嗰啲都係強制傳送？」

「個刀疤佬我就唔知，女版嘅我係話留低太耐嘅話，就會發生。不過我知道嘅林日星全部都已經唔係度。」

「原來星妹已經走咗，咁….…..仲有你吖都..。」





「？」「吓？」我？我從來都冇咁諗過「唔會呱。可能係仲有其他人留低咗呢，我未見過啫。況且我都冇佢哋嘅能力。」

「係喎，點解你發光會冇消失到嘅？但係會向下墜。」

「我向下墜唔係因為我發光，而係因為冇嘢可以支撐到我。」

「即係咩？」

「我都唔太清楚。我發光嘅時候，我掂到嘅所有嘢會消失。」





「所有嘢？咁人呢？」

「咁又唔知喎，未試過。點都好，我同佢哋唔一樣，我應該係傳送唔到。」

「再咁落去會點？真係會世界未日？」

李浩朗問嘅問題都係我想問嘅問題。我諗之前嗰個所謂嚟自天神嘅信差，佢所講嘅嘢就係強制傳送。

唔通真係因為我？而家要點算？今次算係好彩，下次就唔知。





我哋帶住成千上萬嘅疑問同擔心去入眠，有咩都係瞓好呢一覺先再算。

嚟到朝頭早嘅九點，隔離嘅時間只係過咗十個鐘。

瞓醒之後，係食早餐嘅期間，由新聞得知，之前差啲撞到我嗰個的士司機，成為咗全世界首個俾人影低咗嘅極光事件，啲人叫呢種做極光人。

睇嚟強制傳送冇煞到掣，反而係踩咗油門咁，由第一個公開嘅極光人開始，世界各地都開始出現相同嘅情況。

原本嘅物品極光事件，加上而家嘅極光人，嚟自天神嘅信差一下子紅咗，但佢冇再出嚟公開講過啲咩。

雙儀醫院嘅紅瘡泡泡事件亦都得到外界嘅注目，令到大家都人心惶惶，更加去相信嚟自天神嘅信差所講嘅嘢。

平行宇宙嘅概念仲係冇人提過，而且又冇科技家出嚟俾到一個合理嘅解釋，所以大部分都堅信呢個係神對人嘅懲罰。

全世界嘅網民都向嚟自天神嘅信差尋求解求方法，然而該信差並冇出嚟解答。反而有啲聽都冇聽過嘅宗教團體，發起咗懺悔運動。





食完個早餐，今日進行咗個詳細啲嘅身體檢查，結果大家都檢測唔到啲咩。但由於呢個仲係一個未知嘅病毒，我哋仍然需要完成十四日嘅隔離。

完成咗檢測之後，我哋又收到新嘅資訊。嗰啲紅瘡人今朝已經證實死亡，屍體嚴重腐爛，紅瘡嘅位置仲會流出綠色嘅不明液體。不過好彩紅瘡人係冇傳染性。

紅瘡人死亡嘅消息對我嚟講，即係代表我係殺咗嗰個阿叔。不過呢個都算係我原本嘅意向，都唔會太大反應，反正都係人渣一個。

之後，佢哋終於將啲隨身物品還返俾我哋。大家攞返電話第一件事就係打俾屋企人。

李浩朗都唔例外「嘩，我老母打咗好多次嚟。」

而我，已經冇人可以俾我報平安。成間房得我一個唔打電話，都有少少覺得孤獨。

「我老豆同老母都…..喔！家姐打嚟…」





「喂，你冇事啦？….我哋冇事呀。………」

「佢叫我俾你聽喎。」李浩朗遞佢部電話俾我。

「喂？」

「喂，你冇事吖？」

「冇事。你呢？」

「冇咩事。…..呢個，聽過你尋晚救咗我……多謝。」

「….喔，冇嘢。你冇事就好。」

聽完呢個電話，再望一望李浩朗，我原本嘅孤獨感漸漸減弱。或者我都仲未係一個人。





之後我都攞我部電話出嚟望一望，見到有兩個未接來電，我嚇咗一嚇。

兩個未接來電顯示係我媽打過嚟。