宇宙傳送門: 1.28

現時晏就兩點十三分，終於攞返部電話，而我有兩個未接來電，係由我媽個電話打過嚟。

我深思咗一陣，我媽嘅電話就放咗係佢間房，床頭櫃嘅第一格。

點都唔會係我媽打嚟，不過究竟係邊個入咗我屋企。

我打返過去，對面響咗三下就有人聽咗。

「喂？」對面傳嚟一把年輕女人嘅聲音。





「喂？你…」

「係我，原來你冇事，太好啦。你而家係邊？」

呢把聲，係少女日星。

「點解？你唔係走咗㗎咩？但我明明親眼見到你傳送㗎喎。」

「我都係第一次傳送係同一個宇宙，最嚴重嘅情況可能係我走唔到。」





「走唔到？」聽返少女把聲，先唔講其他因素，我係有少少開心。「咁嗰個刀疤佬呢？」

「佢，我都唔知。但我係新聞見到雙儀醫院嘅事，證明我留係度係會引發強制傳送。」

「其實我同李浩朗尋晚就係嗰間醫院…」

「吓？冇事吖嘛？」

「冇冇冇，冇事。而家係第二間醫院隔離緊，要十四日，冇咁快返到去住。不如你留係我屋企幫我睇住圈圈先。」





「圈圈？你話隻鴨仔？可以吖。」

原來我冇同佢講過隻鴨仔叫圈圈。

「嗯。….咁你呢十幾日照顧好你自己先，有咩再用呢個電話打俾我啦。」

「嗯。你都係。」

「拜拜。」

「拜拜。」

「邊個嚟㗎？講到你笑晒咁。」李浩朗行過嚟指住我個嘴。

佢唔講我都唔知原來我微笑緊，所以我即刻收走面上嘅微笑。諗咗陣之後，決定講俾佢知少女仲係度。





「星妹冇走到？佢一定係為我而留低。」嗰個乞人憎嘅李浩朗再次出現。

「收皮啦！同埋星妹係咩料呀？唔好再咁叫人啦。」

「星妹真係…，果然係我。我要同星妹傾下計，佢電話幾多？」

「星…，唔好再叫星妹呀！冇電話呀！」

就係咁李浩朗折磨咗我成個鐘，但我當然唔會俾佢聯絡到少女。

跟住落嚟嗰幾日，雖然話有咩事先打俾人，但係我之後幾晚都有同少女傾下電話。

主要問有冇咩特別事，再順便吹一陣水。中間都有兩次俾李浩朗成功搶走咗去傾，佢仲竟然同佢FaceTime埋。





同少女傾計得知，佢係呢個宇宙嘅傳送點係我間房張床，第一次嚟係，今次都係。

李浩朗係呢段期間都問咗好多問題「如果張床搬咗去我間房，你會唔會傳送去我間房？」「你有冇去過其他星球？有冇外星人？」「你可唔可以穿越時間？」

少女嘅答案係「唔知。」「未試過。」「唔可以。」

而家佢哋嘅能力應該係空間嘅傳送，如果可以傳送返過去嘅話…。

不過少女根據佢嘅經驗，時間係正常咁流動，就算傳送咗之後，最多只係會過咗幾個鐘。

至於強制傳送方面，係全世界都仲係無間斷咁出現緊，極光人嘅案例係有增無減。

仲有係日本出現有大量嘅不明生物屍體，由網上嘅相見到係類似野豬嘅外型，但有黃色同黑色間條，光滑嘅皮膚。

有人話呢啲生物係適應唔到地球嘅環境而死。更加有美食YouTuber 出動攞咗一隻燒嚟食，仲話味道唔錯，後來有消息指佢入咗急症。





而係香港，繼紅瘡泡泡之後，未有大型嘅極光事件。

「你看下。」李浩朗俾我睇咗一則新聞，早前俾嗰個痴線佬殺害嘅便利店職員，係佢屋企揾到其女友被分屍嘅屍體，後來證實係個便利店職員嘅所為。

另外，天氣預報話未來幾日都係大致晴朗，日間乾燥。然而係隔離嘅第九日，周圍開始起薄霧，濕氣變重，但氣溫冇下降到。

出面冇落雨，但係個窗長期有大量嘅水珠。去到第十二日，用手指係牆上面一劃，啲水多到可以用嚟洗手。