宇宙傳送門: 1.26

現時晚夜十一點零三分，趁火打劫嘅一個中年阿叔已經解決。

生晒紅瘡嘅阿叔，慘叫聲環繞住成間房。但叫聲並唔持續，冇耐佢已經同其他紅瘡人一樣，毫無聲息，如同死屍。

我亦都將家姐個頭保護好，自己再笠返個新嘅垃圾袋。另一個受害者，同樣仲有呼吸，只係昏迷咗，但我一個人就只可以孭走家姐先。

我背脊孭住家姐，重新嚟到醫院嘅G樓。走出大廳，咁啱遇到慌張嘅李浩朗。

「啊！終於揾到你啦，係咪你嚟？嘩！邊個嚟㗎？家姐？發生咩事吖？佢奶嘢吖？」





「唔係，暈咗。你孭住佢先，係度等我，好快。」我將家姐交俾李浩朗。

「做咩吖？暈咗？喂！喂！星！」

「好快，係度等我。」我原路折返，途中再揾件新嘅保護衣。

而家浮游係空氣中嘅泡泡已經係屈指可數，好容易可以避開，但始終仲存在不確定因素，例如突如其來嘅傳送。

我拎住新嘅連身保護衣再次落到LG3樓，嚟到另一個赤裸嘅受害者身邊。





我除咗手套，小心咁幫佢着好保護衣、護目鏡同口罩。

搞掂好佢件保護衣之後，我孭住佢又返上G樓。

「搞咩呀？又邊個嚟㗎？又係暈咗呀？」

「出咗去再算啦。係喎，你冇嘢呀頭先？」

「吹到而家先問囉。冇嘢，係俾人踩咗兩腳啫。」





我同李浩朗各自孭住一個人，出到醫院外圍。呢度雙腳企嘅人已經剩低我哋。

今次我哋冇阻礙咁，輕鬆走出醫院門口。

係醫院門口已經到步咗好幾架救護車、小巴。再出現十幾個着住保護衣嘅人，但今次唔係啲咩趁火打劫嘅人渣，而係嚟自第二間醫院嘅醫護人員。

救護員先將我同李浩朗孭住嘅兩個女人分開。兩個女人帶咗上救護車，我同李浩朗就帶咗上另一架小巴。

呢架小巴上面，全部都係我哋呢啲幸存者。能夠冇事走出嚟嘅人，全部都係做好保護措施嘅人。

我以為我哋嘅保護措施已經夠怪，見到其他人先知我哋笠住垃圾袋，已經算着得好睇。

小巴將我哋送咗去第二間醫院，一間比較偏遠嘅醫院。

醫護人員將我哋由頭到腳徹底咁消毒，衣物同隨身物品全部俾佢哋收走。





「係喎星，你部電話係我度喎。」

「點解嘅？」

「星妹俾我㗎，係雙儀商場嘅時候。」

走得出泡泡屠宰場嘅生存者總共有四十八人，全員換做病人袍，做咗簡單嘅身體檢查之後，六個人一間房，強制隔離十四日。

對於強制隔離十四日，大部分人都幾合作，只有小部分人抗議。

「連電話都收埋，我點聯絡屋企人呀？」

隨身物品收走嘅原因只係要清潔消毒，第二日嘅朝頭早就會歸還俾我哋。





「家姐俾人麻醉咗，但冇乜事，佢哋話。頭先發生咩事？」李浩朗問。

我如實將成件事講出嚟，除咗其中一部分，我同李浩朗講個阿叔變成紅瘡人係意外。

「嘩～咩話？好彩有你，好彩你睇到。….所以個阿叔係死咗？」

嗰啲泡泡掂到人嘅皮膚，就會全身生晒紅瘡，呢啲人都仲係生死未卜。我亦都唔知我令到個阿叔變成紅瘡人，算唔算係殺人。

如果真係殺人，李浩朗都係唔知比較好。雖然李浩朗應該會理解我嘅做法，但佢會唔會贊同我咁做又係另一回事。