宇宙傳送門: 1.25

現時晚夜十點三十九分，有個人趁亂拖走咗李浩朗家姐，我追上去之後，嚟到門前，門俾入面嘅人打開咗。

打開門嘅就係拖走家姐嗰個人，全身着晒保護衣，見唔到樣。

佢出嚟嘅時候，一隻手攞住個方形嘅嘢兜頭擲落嚟。

我第一下反應係舉起手護住個頭，撞擊由我隻手承受咗。

原本方形嘅嘢，打落我隻手之後變成咗幾個細嘅方件四散。





我都冇時間去確認係咩嚟，佢就嚟咗第二拳，正中我塊面。

但佢唔大力，以我經驗嚟講，未致於會跌低。

佢另一隻手舉起，想趁住自己係主攻，繼續攻擊。

雖則話笠住個半透明嘅垃圾膠袋，但佢隔咁近，加上我左邊眼前有條𠝹痕，所以佢嘅動作都可以話係清晰可見。

我係佢就打到我手臂之前，就捉住咗佢手腕。但佢冇收力，反而係繼續出力。





我係條𠝹痕度見到，佢唔係用拳頭去打我，而係攞住咗枝針筒。佢想打咩入我個身？

佢另一隻手搭落去，想出盡量全力插枝針落我手。

好彩佢都真係唔太大力，我都用埋另一隻手。

當然我唔會同佢鬥力，我另一隻手係一拳打落佢塊面。

呢拳佢食得應一應，揸住嘅針筒都跌埋。而家輪到我做主攻。





我再加多拳俾佢塊面，佢連企都企唔穩，即將要向後跌之時，我再加多一腳俾佢。

佢向後仆返入間房，我望到跌係地下嘅嗰枝針筒，諗到都覺得無語。

我向瞓咗係地下，已經冇乜還手之力嘅佢揮多咗兩拳。

佢抽搐咗幾下，啲鼻血噴落個護目鏡。我拎走佢個護目鏡，除咗佢連身保護衣頂帽。

終於見到呢個人嘅真面目，只係一個普通嘅中年阿叔。

係阿叔隔離又瞓咗一個人，果然就係家姐。家姐頭上嘅垃圾袋同毛巾都冇咗，好彩身上嘅衣物都仲度。

我除咗個手套，擺隻手指係家姐鼻下面，仲有呼吸，只係昏迷咗啫應該。塊面都冇傷，我諗我係趕得切。

但見個阿叔頭先拎住針筒，家姐唔知俾佢打咗啲咩針，要快啲帶走家姐去第二間醫院。





孭走家姐之前，要揾返啲嘢包住個頭。我開埋呢間房嘅燈，呢間房係一間細嘅儲物房。

開咗燈先見到，原來唔止家姐。間房嘅角落仲有一個昏迷嘅人。

角落嗰個亦都係個女人，但同家姐唔同，佢係完全赤裸嘅狀態。

唔使用腦諗都知個阿叔對佢做咗啲咩。我擰轉頭望個阿叔，咁啱見到佢緩慢咁係袋又拎咗枝針筒出嚟。

我用腳踩住佢手腕「啊～～」阿叔面上露出更加痛苦嘅表情。

呢個人趁住出面一片混亂，為咗滿足私慾趁火打劫，仲要想向家姐落手。

好似佢呢種人渣，法律根本懲戒唔到佢，更加唔會令佢反省，因為佢哋天生就係咁。





與其等佢繩之於法，咁不如而家由我嚟處理。

我戴返好個手套，除低我頭上嘅垃圾袋，將裏面反轉出嚟，用有泡泡水嗰面笠住佢個頭。

我再用手㩒實個袋，令垃圾袋上面嘅泡泡水盡量覆蓋佢成個頭。「嗯～～～嗯～～～」

過咗三秒，我對手可以感受到佢皮膚嘅起伏變化，佢手腳不斷咁掙扎。「嗯～～～～～啊～～～～」

係嗰個袋嘅𠝹痕，清楚咁呈現佢嘅右眼。佢右眼擘大，眼淚都流埋出嚟，佢直到紅瘡生埋對眼為止，都係望住我。