宇宙傳送門: 1.24

現時夜晚十點二十七分，走佬計劃進行中，我同李浩朗，仲有四個唔識嘅人忽然係二樓爬出嚟，捉住我哋條救命繩。

「太多人啦！」根本冇人理我，再係咁我哋會全部跌落去。李浩朗都已經落到我頭上面，我同佢而家都唔上唔落咁。

而且，爬出嚟嘅四個人裏面，應該有個係紅瘡人，因為我聽到有人發出慘叫聲，就咁聽都知佢好痛苦。

嗰個紅瘡人不斷咁掙扎，令到條繩搖晃嘅幅度愈嚟愈大。

最終，條救命繩終於頂我哋唔住，係最上面綁係窗框嘅位置，鬆開咗。





唯一連住我哋，保障住我哋唔跌落去嘅救命繩，放棄咗我哋。

大家都嚟唔切捉住任何嘢，六個人同時一齊下墜。

李浩朗係最上面，中間係我，最底係嗰四個人，我哋由二樓向下墜。

二樓距離地面大約係六米幾，死就一定唔會死。如果係得我同李浩朗跌落去，點都會受傷，撞到個背脊，拗柴之類。

然而，都唔知係咪好彩，係我哋下面有四個人，不由自主咁做咗人肉墊，加上地面仲係草地嚟。





種種因素，令我哋跌落去嘅傷害減到最低。

最下面嗰四個人率先墜落到地面，我再跌係佢哋上面，李浩朗跌落嚟，壓住咗我隻手。

我除咗隻手壓咗一壓，都冇乜大礙。李浩朗都應該冇乜事。至於最底嗰個就大件事啲。

紅瘡人就算跌咗落地都好，都係繼續係度慘叫，左碌右碌。

「快！」家姐過嚟拖走李浩朗。





係底嗰三個人暫時起唔到身。

「冇時間啦。」家姐大叫。

原來啲泡泡已經嚟到我哋頭頂位置。瞓低嗰三個人並冇任何保護，皮膚暴露咗出嚟，好快佢哋三個都已經變為咗紅瘡人。

除咗我嗰條小𠝹痕，其他部位都有保護，所以暫時冇事。

嚟到地面，大部分人都出咗嚟，但因為頭先新一輪嘅泡泡，令到場面嘅混亂程度同醫院入面有得揮。

周圍有好多人冇定向咁跑，再次重演大家互撞嘅情況。

我哋都冇例外，同樣俾幾個慌張嘅逃生者撞跌。

就係大家互撞嘅期間，泡泡打落大家嘅身上，直中皮膚嘅人就毫無疑問變咗做痛苦嘅紅瘡人。





至於冇直接掂到皮膚嘅人，啲泡泡落咗係佢哋嘅衣物上面，然後其他人掂到或者佢哋掂到其他人，亦都毫無疑問變咗做紅瘡人。

現場變咗個泡泡嘅屠宰場，好彩地，我哋有保護措施，暫時未有危險。

不過，我哋跌咗係地下，一時三刻都未起到身，周圍有太多人阻住。

係我盡力避開人群嘅踐踏之際，我由個垃圾袋嘅𠝹痕見到家姐俾人拖走。

拖走家姐嘅人好肯定唔係李浩朗，因為呢個人着住嘅係白色連身嘅保護衣，戴護目鏡同口罩。

家姐被拖走嘅方向係醫院入面。家姐並唔係冇反抗，佢似係冇力反抗。

呢個人係呢個生死關頭都仲要滿足自己嘅私欲？我奮力爬出人群，想追過去。





追上去之後，返到醫院入面，入面未出嚟嘅人同嗰啲泡泡已經剩低唔多，剩低嘅係瞓係地下冇晒反應嘅紅瘡人。

都已經判斷唔到呢啲瞓低嘅紅瘡人係暈咗，定係死咗。

但佢哋都唔係我關心嘅嘢，我四處張望，搜尋家姐嘅蹤影。

有啦。係左手邊走廊盡頭嘅轉角位，可以見到有個身影閃走。我唔理三七廿一，追咗上去先。

嚟到盡頭嘅轉角位，前面又係一條大直路，直路旁邊有好幾間房，但周圍除咗我都冇人係識郁。

右手邊係樓梯同𨋢，𨋢嘅位置停留咗係G樓，即係呢層。如果係我要做虧心事，我都唔會揀地面呢層。

而家係要上樓定落樓，但佢拖住個人冇搭到𨋢？

我行入𨋢，唔知應該要撳邊層。一開始去錯的話就晒咗啲時間。





我唔分析咁多，直接撳咗LG3，最低嗰層。

𨋢門係LG3層打開，一出到嚟係停車場，連呢度都有幾個紅瘡人瞓咗係度，右邊有道門，打開係垃圾房。

一行入去，垃圾房冇乜特別。想轉身跑走之際，見到垃圾房嘅角落有間房。橫掂都落到嚟，就唔想錯過每個可能性。

我打開房門，房入面冇開燈，我靠出面嘅燈光，可以知道呢間房應該係員工休息室，但房入面空無一人。

「仆街！」我開始心急，我而家完全係爭分奪秒緊，唔知家姐已經俾人做咗啲咩？

徬徨之時，我留意到左邊一個不銹鋼架後面仲有道門，頭先一時太黑見唔到。

我即刻開燈，隔住個架見到個門柄一粒塵都冇，唔似係好耐冇開。





係呢間，一定係呢間。我伸長手去捉住門柄，但上咗鎖。我不斷咁拍門「喂！入面出嚟！」

我嘗試移開個架，個架比我想像中輕，一個人完全可以搬得郁。

個架差唔多移開晒嘅時候，道門已經俾裏面嘅人打開咗。