宇宙傳送門: 1.7
現時朝頭早七點十五分，李浩朗嘅返工鬧鐘叫醒埋我同圈圈。
我勉強起身，同李浩朗仲有佢家姐一齊食咗個早餐。
佢家姐叫李海嵐，但聽講冇人敢叫佢全名。前幾次見佢，身高同我差唔多，無論係打扮，行為都似係一個江湖中人。
但呢個朝頭早，我第一次見家姐着件淺黃色嘅睡衣，all back紮起黑色嘅直頭髮，冇化妝。
完全係另一個人，原來家姐都有清純嘅一面。
家姐食完早餐就點起一枝煙，然後係雪櫃攞咗枝香蕉奶出嚟飲。
我望住佢一啖煙又一啖香蕉奶，諗緊呢個係一個咩畫面嚟。
家姐見到我望住佢，佢就攞多咗枝香蕉奶出嚟擺係我面前「咪再望。」
「係。」俾佢惡到添。
「我收工再揾你啦。」李浩朗臨出門口前講。
家姐跟係李浩朗後面，打扮完嘅佢又變返江湖中人咁樣。
等佢哋出咗門口，我打俾公司請咗假。然後再上網揾下有咩可以餵俾圈圈食。
我係李浩朗屋企揾到啲米，之後煲咗個稀粥俾圈圈。我將啲粥擺係佢面前之後，果然佢都真係好餓，成個鴨仔頭都活埋咗係碗粥度咁滯。
唔使三分鐘圈圈就已經食完碗粥，然而又開始圍住個碗係度轉。
照顧完圈圈啲膳食之後，我又係時候做返啲正經嘢。既然已經知道咗便利店殺人犯就係嗰個痴線佬，我諗住通知嗰班重案。
係我攞部電話出嚟嘅時候，有個未知電話打過嚟，嗰班重案首先聯絡咗我，叫我過去。於是我倒咗啲水留俾圈圈之後，我就離開咗。
「請坐。我哋需要錄影，你同意嘛？」係我面前嘅又係盧sir同張sir。
佢哋帶咗我入一間房，閂埋門。房入裏有張長方枱，四張櫈，一部錄影機對住我，我嘅左手邊有塊大鏡，應該就係嗰啲雙面鏡。
我點咗頭，表示同意錄影。
我哋面對面咁坐，我望向上，間房嘅角落頭有部電視，個畫面可以見到成間房，仲有我對面部錄影機嘅畫面。
「林生，係做個詳細嘅口供之前，我哋有幾個問題。」張sir攞咗疊文件出嚟擺係枱面。
「7仔嗰兇手，就係佢。」我率先開咗口。
張sir停滯咗一陣，冇即刻回應我，而係係佢疊文件度攞咗兩張相出嚟放咗係我面前。
右手邊嗰張相係CCTV嘅Cap圖，相入面嘅人好清楚見到就係嗰個痴線佬。
「尋晚個兇手係佢？」張sir指住右邊張相。
「係。你哋揾成點？佢係咩人嚟？」我追問。
雖然好心急想聽到啲新消息，但對眼都好自然咁望向左邊張相。「唔係呀話！？」
左邊張相都係CCTV嘅Cap圖嚟，冇右邊咁清晰，但都足夠睇到係一個男人，成個頭剷青，身型同我一樣唔肥唔瘦，右眼上面好似有條一吋長嘅刀疤。
最重要嘅係呢個男人又係一個同我極似樣嘅人。除咗造型唔一樣之外，面型五官可以話係同我一樣。
一時之間，我唔識點反應，個腦有好多嘢彈出嚟，但把口就一粒字都講唔出。
「林生，左邊呢個男人，係尋日黃昏嘅時段涉嫌一單姦殺案，同樣係下落不明。」盧sir今日第一次開口。
又係殺人？個痴線佬係同我好似樣，但呢個刀疤佬真係我個樣嚟，無論睇多幾眼都係。
「呢度兩個人，左邊有晒成個樣，有指紋，有體液。右邊同樣有成個樣，有指紋，有血液。話係話有晒呢啲資料，但都係確認唔到呢兩個人嘅身份，應該話暫時搵唔到佢哋嘅資料。」
「所以，而家係連佢個名都冇？」我問。
盧sir好語重心長咁答我「係。」
跟住，張sir又攞咗部手提電腦出嚟。佢撳一撳空白鍵，畫面開始播片。
「呢啲係我哋揾出嚟嘅CCTV，可以見到佢哋之後嘅行蹤。」
「首先係有刀疤嗰個，最後見到佢係凌晨嘅兩點三十四分，我哋有佢入咗旺角一間酒店嘅畫面，但冇佢離開嘅畫面。係兩個鐘頭前，我哋同事去咗嗰間酒店，佢已經唔係房入面。」
「佢住嘅嗰個酒店房係11樓，窗口係打開咗，係窗口對應嘅樓下地面，發現有未乾嘅血跡。由於窗口嗰邊附近冇CCTV，血液嘅化驗報告都未出嚟，我哋暫時未知係咪佢墮樓。」
點解又係跳樓？到底呢兩個人係咩人嚟？佢哋係不死之身？
電腦畫面之後播第二個人嘅片，輪到嗰個痴線佬。
「跟住係另一個，係你住嘅嗰棟樓大堂同𨋢嘅CCTV都見到佢係大約七點二十分進入棟樓。同樣冇佢離開嘅畫面。」
「但係，係我哋發現嘅銀色貨van後面距離五米左右嘅位置，有架私家車。而家播緊嘅就係呢架私家車嘅車cam。可以見到墮樓嘅畫面，雖然見唔到正面，但佢當時着嘅衫褲同林生你所講嘅吻合。之後就係，極光。」
車cam影到個人跌落架車，過咗幾秒，開始發光，又紅又綠嘅一道光覆蓋咗全身，呢道光大約只有三至四秒，隨住道極光嘅消失，身體亦都跟住消失埋。
最後，車cam 影到嘅就只有一架凹陷咗嘅貨van。
「而且，車頂上面凹陷嘅位置仲有啲燒融咗嘅痕跡。」
第二次衝擊。就算親眼目睹我都唔係好信，唔係死咗，唔係走咗，係原地消失咗。
「呢個應該就係近排啲人講緊嘅極光事件，但發生係人嘅身上就好似係第一次。」
我嘅表情表現出我完全唔知情「極光事件？」
「你冇聽過？近排網上面有十幾條片影低咗。」張sir用部電腦揾咗嗰啲佢講嘅片俾我睇。
呢幾條片嘅內容，就係有人影到佢哋嘅一啲物品突然發光，然後消失咗，全部都係啲生活用品。
睇到呢啲片，我醒起尋晚我係條街度踢到一地都係嘅嗰啲垃圾，我諗唔係我記錯啦，應該就係呢啲極光事件。
「網上面有嘅極光事件目前都只係一啲物品，人嘅話呢個應該係第一次。雖然都有人話前排嘅失蹤案都係極光事件，但都係講啫，冇人有片。」張sir補充。
「無論呢個係集團式犯罪又好，…魔法都好，我哋警方都會盡全力去將兇徒緝拿歸案。而我哋俾你睇呢兩個男人嘅原因，我諗林生都知道，雖然聽落去好似有啲出奇，但呢兩個男人都同林生你好似樣。我哋想問嘅係林生你真係唔認識佢哋？」盧sir小心咁問。
「我！….我唔認識佢哋，從來都冇見過，到尋日為止。」原本我係想發脾氣，但我諗諗下而家咁嘅情況，佢哋有咁嘅諗法都合理嘅。
「對唔住，林生，我希望你可以理解我哋問嘅呢個問題，呢兩個人再犯案嘅機率極高。老實講，我哋手上有嘅線索好有限，那怕係少少嘅線索。」盧sir解釋。
「兩位，我同你哋一樣咁混亂，而且我都好心急。我尋晚第一次見到佢嘅時候，佢有講過，平行宇宙。」我開始一五一十咁將尋日收工之後嘅事講出嚟。
對面兩位，一個翹住雙手，一個記低我講嘅嘢。但係兩個都冇及時做出啲咩反應，中間有幾次互相嘅交換眼神。
「如果真係平行宇宙嘅話，咁就所有嘢都可以解釋…」盧sir睥住張sir，張sir及時收咗聲。
「唔該晒你，林生。如果再有其他嘅資訊，請隨時聯絡我哋。」盧sir開始整理枱上面啲文件，張sir都即刻幫手。
「….」
「嘭。」我行出咗嗰間房。