宇宙傳送門: 1.6

現時凌晨一點四十一分，我同李浩朗坐咗係佢屋企嘅客廳，而圈圈自己係枱上面玩，係度轉圈。

李浩朗同我講佢兩老去咗旅行，過幾日先返，而佢仲有個大三年嘅家姐，都係出咗去。

「佢又真係，係咁轉圈喎。」李浩朗望一望圈圈，又望一望我，感覺佢好想安慰我，但又唔知講啲咩。

基因我將所有事都講咗俾佢聽。

李浩朗從來都唔係好識點安慰人，有時會講同做啲奇怪嘅嘢。但佢絕對係一個好好嘅聆聽者，從來都係。





「我而家冷靜咗啲㗎啦，要喊嘅，頭先都喊咗好多。」呢句講出嚟，好似係我安慰佢多啲。

「同你好似樣吖？」

「嗯。」

「22樓跳咗落去冇死吖？」

「嗯。」





「會唔會佢係講真㗎？佢連你以前啲嘢都知。」

「我點知。」

李浩朗一時又望下我，一時又望下個天花板，一時又望下個地下，感覺佢仲係好不知所措。

「係囉，近排啲痴線嘢都幾多，又咩極光事件，又殺人又剩咁。」李浩朗開電視，諗住幫我轉移下話題。

「我冇咩心情呀，有人聽下我講嘢就好好多㗎啦。..等等！唔好撳走住。」我望住電視嘅畫面，阻止咗李浩朗撳走。





「做咩呀？」李浩朗見到我成個眼神都變咗。

電視播緊嘅係新聞，新聞嘅內容係講緊日頭嗰單便利店職員遇害事件。

「係佢，就係佢。」我指住個電視。

而李朗浩唔使我指住，都望緊電視，佢嘅反應係擘大個口得個窿。

我哋兩個睇到嘅係新聞公開咗犯人個樣。日頭殺咗個職員嘅人就係嗰個痴線佬。

新聞表示犯人仍在逃亡中，請廣大市民小心謹慎。

「真係同你好似樣..」李浩朗驚訝。

跟住落嚟嘅幾分鐘，我哋兩個都無語咁坐咗係度冇反應。





「我要揾佢出嚟。」

「點揾呀？連嗰班所謂嘅差佬都揾唔到嘅話。」

「揾佢出嚟，用返同一個方式殺咗佢！」

「….」「你要殺人？」

我對眼紅晒咁問返李浩朗「咁係你會點呀？嗰個係你老母呢如果？！」

見到李浩朗個樣嚇親，佢應該係未見過我而家呢個表情。

佢吞咗啖口水，答我「就算係要殺佢都好，你都要休息下㗎。你應該都好攰㗎啦，睡醒一覺再諗啦好冇？」





「Sorry…」我忽然意識到自己好似攞咗無辜嘅李浩朗嚟出氣。

李浩朗指住走廊最入面嗰個房「你瞓住我老竇老母間房先啦。你聽日都應該仲有好多嘢搞㗎啦。我聽日應該可以放早兩個鐘，我收工再嚟陪你啦。」

「李浩朗。」

「？」

「我，我唔想一個人瞓。可唔可以係你間房瞓？我瞓地下得㗎啦。」

李浩朗嘆咗口氣「你等我揾揾先，我老豆應該有啲露營嘢，睡袋、睡墊之類。」講完佢就去咗佢老豆老母間房。

我抱起圈圈，問李浩朗借咗兩條毛巾，整咗個簡陋嘅床俾圈圈。

李浩朗幫我整理咗個瞓教小空間係佢間房嘅地下。我將圈圈張床仔擺咗係我張床嘅隔離。





我哋三個都就寢咗係各自張床。

「你，係邊度偷隻鴨返嚟？」李浩朗問。

「好人好姐我偷隻鴨嚟做咩？」我反問。

「係佢揾到我㗎。」我補充。

「….」

「平行宇宙嘅話，唔係應該同你一模一樣樣先係㗎咩？」李浩朗再問。

「李浩朗。」





「咩？」

「多謝你。」

「….」

「我真係好耐冇試過全身起雞皮。」李浩朗舉手閂咗燈。

我合埋眼，個腦仲有好多嘢諗，例如我好似冇餵過圈圈食嘢。

我以為我會瞓唔著覺，但大約過咗十分鐘我就熟睡咗。