宇宙傳送門: 1.8

現時朝頭早十點十三分，我行出去條街，揾咗張櫈坐低。

一下子多咗兩個資訊，一個同我幾乎一樣樣嘅人，同埋極光事件。我攞部電話出嚟開始揾有關嘅嘢。

我睇多咗幾條極光事件嘅片，其他基本頭先已經知道。

再碌多幾下，見到有條熱門嘅片係有關今年嘅預言，於是我開咗嚟睇。

條片由一個男人，自稱嚟自天神嘅信差所拍。





「…世界將會迎嚟未日。先係身邊我哋熟悉嘅人同物逐漸咁消失，之後前嚟嘅會係我哋未見過嘅，無形嘅危機，同埋群星下墜。天神嘅憤怒已經將地獄嘅傳送門打開，而呢一切都係原自你嘅狂妄，對天神嘅無視！……」

呢個時候，條片俾人暫停咗，係李浩朗打嚟。

「喂！黃大仙姦殺案，你快啲睇下！」

「我知道咗啦。」

「今次呢個犯，完全就係你個樣嚟。網上面已經有人講呢兩個犯個樣啦。」





「我知呀。你唔好激動過我先啦。」

「個男人講嘅嘢應該係真㗎啦，星。」

到尋晚瞓之前我係一啲都唔信，但而家，我嘅諗法開始動搖。但無論係真定假，唯一佢殺咗我媽呢個係事實，呢啖氣我點都唔會吞。

時間到咗夜晚，我同李浩朗係佢間房討論。我將今朝得到嘅資訊都講咗俾佢知。

「揾唔到呢個人，仲要有片影到佢發出極光，咁係真㗎啦喎！但22樓跳落去，佢係咪死咗都唔知。」





「我唔知，我淨係知我好亂。」

「所以佢哋係去唔同嘅宇宙殺人？」

「如果係真嘅，即係話我唔會再見到佢，呢世都報唔到仇。」

「如果佢真係平行宇宙嘅你，會唔會你都…」

呢個時候，房門打開咗「食飯！」係佢家姐李海嵐。

「啊！」我哋兩個都同時嚇親，下意識成個人坐直咗。

我去飯枱坐低，見到面前我碗飯成座塔咁高。李浩朗係我耳仔邊細聲講「我同佢講咗你咩狀況。但放心，平行宇宙嘅嘢我冇講。」

「食飽佢！」家姐同我講。





「係。」我有冇聽錯？佢應該係想叫我食多啲而唔係鬧緊我吓話，可能係佢唔慣親切咁講嘢。

同埋今晚嘅家姐又係冇化妝，睇落真係順眼好多。

「係喎！」我突然醒起圈圈。我擰頭去望圈圈，佢經已將個頭插咗落個碗度食緊嘢。

「我幫隻死鴨煮咗嘢食。」家姐邊食邊講。

「唔該。」我感謝佢。

「佢真係一粒聲都唔出㗎喎。成日見佢擘大個口但又冇聲。」李浩朗好奇。

「我都冇聽過。」我集中返係餐飯度，夾咗幾舊餸嚟食，意外地家姐啲廚藝都唔錯。





「兩位，多謝你哋，我打搞多你哋一兩晚就會走㗎喇。」我同大家宣布。

「你可以再留多幾晚㗎喎，我老豆老母都冇咁快返。」李浩朗建議。

「唔使喇，我始終都要返去面對，同埋都要執嘢、洗地、準備之後喪禮嗰啲。」我拒絕咗。

「你有咩要開聲喎，你唔係一個人㗎。」

聽到佢再次講呢句，我成個鼻都酸咗，諗緊好彩我呢兩日過咗嚟。

「嗯。同埋餐飯好好食。」我含住泡眼淚，想快啲轉咗個話題佢，我唔想大家見到我喊住咁食飯。

家姐聽到我讚佢煮嘅飯好食，佢淨係望咗我一眼，冇回應我。

嗯？家姐頭先係怕羞咗一下？我望住家姐，諗緊今日家姐係我心目中嘅形象真係完全唔同咗。





我望住家姐嘅期間，我感受到有另一個熾熱嘅視線望住我。

我望過去，係李浩朗用一個奇怪得嚟又強硬嘅眼神望住我。

唔知點解，我好似明白佢呢個眼神係咩意思，佢應該以為我對佢家姐有意思。

於是我都用一個堅決嘅眼神加上小幅度嘅搖頭，想表達俾佢知，你誤會啦。

我哋兩個無言咁互望，隔空向對方傳遞訊息。

「深情對望完未吖你兩個？！食飯！」家姐打斷我哋。

我哋又嚇到彈咗一下之後，即刻大啖大啖咁扒飯。





就係咁，又過咗三日，工都係要照返。

係呢三日，兇手嘅行蹤仲係毫無進展，網上面已經對呢三單殺人案件冇晒興趣，可以話係忘記咗。

但係，「世界未日」、「極光事件」呢兩個話題嘅熱度係持續上升緊，唔單止香港，世界各地都有人講緊。

極光事件嘅片係世界各地都有彈出嚟，影到極光嘅片幾乎係成為一個KOL嘅必影項目，但都仍然未出現有真人嘅極光片。

目前為止，網民嘅態度都係比較輕鬆，一但全世界都睇到真人極光事件嘅話，佢哋又會唔會恐慌？

自稱天神嘅信差嗰條片爆紅咗之後，相繼都有唔同人同宗教團體出嚟講未日，將會有更大嘅災難來臨，要向神懺悔之類。但平行宇宙呢幾個字就冇人提起過。

放咗工之後，返到屋企樓下嘅我，行入部𨋢，撳22樓。

出咗𨋢，我係褲袋攞定條鎖匙出嚟，行到我屋企嗰單位，眼前嘅光景令我停咗係原地。唔係吓話，個天係咪想玩死我。

鐵閘門口前面，踎低咗一個少女，係前幾日𨋢門前經過嘅嗰個人。