由青梅竹馬開始: 再到麥當勞

乙向勤道謝後，就問勤要不要喝杯水或者咖啡。剛好勤也有些口渴，就說也想喝杯咖啡。乙指著枱上的幾隻咖啡，問勤想喝哪一種。勤平日不是特別對咖啡講究，就隨意指著其中一款。乙準備為勤沖製咖啡時說：”咦！平時琪琪姐都係鍾意飲呢隻多個喎！你地咁夾嘅？”
 
勤：係咩？我都唔知佢鍾意呢隻添。
乙：唔通佢放工就唔飲咖啡？
勤：應該係啦。佢以前就鍾意飲陽光檸檬茶。
乙：我又反而冇印象佢有飲過。Anyway……你做邊行架？
勤：哦……銀行。
乙：銀行都應該搵到錢喎。
勤：唔算多啦。
乙：點會唔多呀？琪琪姐肯嫁俾你，你起碼都係高級經理啦應該。


 
勤接過沖好的咖啡說了聲”唔該”，就沒有再回應。乙為自己的水杯加水後，就回自己的座位。勤則拿著一杯咖啡回到會議室。坐下後，勤沒有即時透過手機上網。他想起剛才乙對他說的話。他不知道琪琪喜歡飲哪一款咖啡，實是小事。但乙認為琪琪的丈夫下限應是高級經理，卻讓勤很難堪。勤也因而開始悶悶不樂。他放下咖啡，思考著他自己是否真的適合當琪琪的丈夫。
 
再過十分鐘左右，又有人敲會議室的門。今次真的是琪琪完成了工作過來找勤了。琪琪見到枱上有一隻杯，就說：”你自己識搵杯沖野飲咁叻仔呀？”勤回應：”叻？你係咪覺得我好蠢好冇用呀？”
琪琪：下？做乜咁講。點會呢。
勤：我真係連搵隻杯都唔識。係你同事沖俾我嘅。
琪琪沒有多追問，主動幫勤處理好那隻杯就帶勤離去。離開辦公室時，兩人都跟乙打了個招呼。
 
走進升降機，琪琪主動拖著勤的手說：”你想食乜野呀？好似得返少少時間。”勤說沒所謂，琪琪就拉了勤去麥當勞。
勤在櫃枱付錢再取食物，接著找到琪琪所在的位置。兩人開始進食，勤想起好像很久沒有和琪琪來過快餐店：”你會唔會覺得呢度啲野好垃圾呀？”


琪琪：梗係垃圾啦。Junk food來嘛。不過有時食下都幾開心。
勤：平時同你食晚飯多數都三位數一個人。
琪琪：今晚趕時間嘛。同埋你知唔知點解我揀來麥當勞呀？
勤：點解呀？
琪琪：下？你唔知？
勤：唔知呀。
琪琪：你喺邊度求婚架？
勤：呀！但都唔係呢間。
琪琪：但係都係麥當勞呀嘛。所以我有時喺度買早餐食都覺得好SWEET 架。
 


勤笑著點點頭。但之前的不安其實仍然存在。他也不知道應如何接下去，就拿出手機邊吃邊上網。但此舉又令琪琪不快：”喂你又對住我玩電話！頭先等我時未玩夠咩？”勤無奈地只好將手機收好。琪琪再說：”其實到底有乜咁好睇？要成日睇？真係好睇過我？”
 
勤：我望下FACEBOOK啫。
琪琪：咁你頭先等我時都望左好耐啦。夜啲先望係咪唔得呢？有咁多野趕住要睇咩？
 
勤沒有再辯駁，但心中難免不快。他唯有提醒自己一會去看婚照時不要忍不住又拿出手機來上網。