要愛情，定要麵包?: 14. 重回海邊的位置

可能因為自己過左呢個劫，準備返澳洲做靚靚新娘子，所以今日嘅佢，係非常開心
 
「不如我地返去以前個石駁到丫」
 
「妳唔怕傷口爆開?」
 
「你個傷口未好咩?」
 
「其實都好左好多」
 




「有你陪住我咪得囉」
 
我地兩個行到海邊，去返當年我地上駁個位。我依然係第一個上駁，然後拖起佢上黎，今次，我同佢都冇再放開對方隻手，大家都緊緊捉實對方
 
難道…思思佢…
 
坐返係我地慣常坐嘅位置，佢再一次將個頭挨住我膊頭，我地大家都冇出聲
 
「唔知…我地仲有冇機會咁樣…」
 




「妳就快做靚靚新娘子啦，唔好諗咁多」
 
「你..都就快結婚」
 
我望住思思「公主殿下」
 
「嗯?你仲記得妳咁叫我呀?」
 
「其實……我個婚禮擱置左啦」
 




「發生左咩事?點解突然間……」
 
「其實…我同佢有好多問題，價值觀好唔同，當時佢一直想我快D出黎賺錢，但我想再讀大學。當我儲好錢讀碩士果陣，佢非常不滿，佢認為買樓買股票先係最好」
 
「就係因為咁樣就擱置婚禮?」
 
「最大問題，係我想去外國讀藥劑…佢非常反對，所以…」
 
「我相信問題唔止一個，係唔係?」
 
「都係嘅…」
 
「佢唔滿意你…捐個肝俾我?」
 
我點一點頭




 
「不過俾我揀多次，我都係會捐俾妳」
 
「點解你要咁傻…一知道係我就立即趕黎醫院」
 
「妳點會知……」
 
「你黎ICU果晚……我冇瞓，你所講嘅野…我全部聽到」
 
俾思思咁樣講一講，我突然間好怕羞，而紅紅咁樣
 
「呀….其實…」
 
「你仲用自己藥房職員身份走入黎，就係為左見我」
 




「係…」
 
「其實….Jacquelin有冇同你講…我地有一次…」
 
「有…..有呀….佢話我地好好彩…」
 
我地兩個望住個海
 
「你同佢點相識?」
 
「妳指…我ex?」
 
「嗯…」
 
「我地係外邊fd搭fd識……係妳走左之後我個人落哂形，有朋友夾硬拉我去玩，之後我就識左佢…妳呢，妳同夫婚夫點識?」




 
「大學D師兄囉…香港人圈子…」
 
「妳幾時返去?」
 
「三個月左右…公司俾我休息耐D，你呢?你會去邊到讀藥劑?」
 
「我咪去妳果邊囉，所以我可以睇住妳行紅地氈」
 
我地兩個繼續靜靜望海，我心中有說話好想講出黎，我唔係話過要好好把握最後機會咩，點解我會變得咁細膽
 
於是我鼓起勇氣…..
 
「思思呀…」
 




「嗯?點呀砵砵豬」
 
「妳……可唔可以……暫時放低佢…同我一齊相處呢三個月?」
 
思思聽見之後，眼淚開始流出黎
 
「如果可以嘅話，我唔想睇妳行紅地氈，我想做紅地氈上等妳果個，我想妳爸爸將妳交俾我」
 
「估唔到….你仲係咁鍾意我」
 
「妳呢?」
 
我係海邊石駁上，再一次問起呢個問題，一條10年前係同一地方問嘅問題，答案會係點
 
係海邊石駁上，再一次進入我懷抱內，再一次為佢戴起頸巾