要愛情，定要麵包?: 13. 決定與妳完結

「層樓係我用辛苦錢自己買，一定唔會加妳名架啦，妳唔滿意就唔好結婚」
 
「你…你講咩話!!!」
 
「我話，唔結婚啦，我而家已經頂唔順妳D脾氣，同妳結婚嘅話，點同妳過人世」
 
「你…你根本就係掛住隻狐狸精!!!你講丫!!!同你拍拖6年啦!!你有冇咁樣對過我丫」
 
「呢兩星期我諗得好清楚架啦，同妳結婚嘅話，我就冇可能去外國讀藥劑」
 




「又係讀書!!你仲要讀到幾時呀!!!你讀碩士我都由得你啦，而家又話去外國讀書!!!你有冇搞錯呀!!!唔洗理我架?」
 
「我已經決定左，如果外國有大學收我，我就會去讀藥劑，唔好嘥大家時間啦，反正我地唔太夾，分手啦」
 
「你…你竟然咁對我!!!你好野!!!!」
 
Candy好快就離開我屋企，當時我個人立即輕鬆哂。6年黎未試過咁安靜
 
但係暴風雨嘅前夕，總係安靜，但係我連果少少安靜都享受唔到，第二日，輪到D親戚黎砲轟我啦
 




「你點解咁蠢呀!!個肝又俾左人，錢又唔收，你傻左咩」
 
「你結婚唔洗用錢咩?而家買多層樓收租唔好呀?你有錢就可以幫我地屋企出首期丫嘛，快D同人要返張支票啦」
 
佢地名義上係黎探我，實際上就係黎迫宮要錢，呢D親戚其實要唔要都冇問題，我亦都趁呢個時候同佢地講，我唔結婚啦
 
「咩話!!!酒席訂好哂你先話唔結!你有冇搞錯呀!!!」
 
「怕人地分你間屋，你咪落我地名囉!!一家人又點會呃你呀!!」
 




我就係同你地一家人先唔信你地
 
「好好地又唔結婚，我地同人宣佈哂啦，你話你點算丫」
 
「D酒席錢點呀?你而家好有錢呀?學人撻訂!!!叫女家出返少少黎!!」
 
每日返到屋企都收到呢D電話，或者佢地衝上黎我屋企，我真係連少少時間休息都冇，我真係寧願留係醫院好過
 
經過左幾星期，思思冇出現任何排斥問題，終於醫生批准佢出院返屋企休息，不過仍然唔批准佢搭飛機返過澳洲
 
思思出院當日，佢黎左藥房搵我
 
「多謝你…我出院啦…」
 
「返屋企休息?」




 
「嗯…醫生話仲要返黎覆診….」
 
「快D休息下啦，我得閒會返柴灣搵妳」
 
「嗯…遲D見啦」
 
就係我下一次放假，我約左思思返去杏花村，我地兩個人一齊行去海邊