起舞吧!愛與舞蹈的感覺: 2
「我唔值得你一直等我，有更好嘅女仔你可以去追」咁樣復左佢之後就攤係床度諗緊將來，諗諗下對眼就因為太攰開始合埋，一醒返就已經係第二朝十點…
「係唔係應該較返岩個生理時鐘？」第二朝一起身就問緊自己呢樣野，但係姊妹群入面咩動靜都冇，估計班姊妹應該都係昏睡當中，吼…，今日做咩好呢？
叮叮，手機上面顯示左係跳舞老師搵我，咦，想我一陣返學校，有野同我傾？
「好」只係復左一個字冇再問問題，四點學校等，即係仲有四個鐘可以做野…
「煮個麵睇人跳舞！」咁樣決定左就煮個輕便嘅餐蛋麵，再開始搵跳舞片…
「考完個Advance 1，下個目標就係…」睇住個考試大綱，再搵片黎睇，嗯…，我相信自己係做得到，但再望下依家隻腳咁，應該最少要半年後先可以練到…
叮噹…，係我睇緊片果陣有人禁門鐘，再望望出面…，麗晴同易心兩個？
「做咩上左黎嘅？」「個群一直tag你都冇用咪上黎搵你囉，做緊咩呀？」易心好快就入左黎，望住我食緊嘅野同睇緊嘅片，唔駛兩分鐘就坐低係我面前…
「真係一直冇放棄到喎」「咩呀，我都想養好傷就可以繼續跳架嘛，仲有呀…」一直同呢兩個姊妹傾都唔知時間過，直到我望一望電話個鐘，三點半…
「我要去跳舞學校先，你地等一等我」好快就閂左條片同換衫，用左二十分鐘行過去，而老師亦都係門口，唔知係等緊我定係想招生，佢見到我後走過黎…
「老師搵我黎做咩」「入黎再講」老師好快就請我去到一間房入面，麗晴同易心兩個就係門口等我…，咦....，係海外升學嘅資料，而且有Advance 2嘅清單…
「我同你屋企人傾左半個鐘電話，因為你嘅腳傷佢地都唔想你再跳舞，但係又話你一直都想入大學讀跳舞，所以我就搵左一啲資料，希望可以幫到你」老師一直講一直介紹每間學校嘅特色等等，而Advance 2需要一連串練習，所以…
「老師麻煩你幫我安排，我養好傷就可以開始」「麗晴易心你兩個入黎」老師好快就請左兩位姊妹入黎，而且同我講需要單獨上堂，但又要有人同我排練…
「可以搵埋樂愛同芝詩」其實大家都知我咩性格，所以佢兩個好快就打電話…
「打唔到比芝詩，應該補緊習」好快就得到呢個回復，但明顯佢係會支持我。
「好，咁我安排下，樂盈你返屋企養傷先，練習果度等你好返就開始」「唔該老師」好快就係兩姊妹嘅扶持下返到屋企，其實呢個考試都係單獨，但係就….
叮噹叮噹叮噹…，個門鐘就快比人禁爛，而禁門鐘果個就係搵佢唔到嘅芝詩。
「高樂盈你搞咩呀」「芝士你終於黎啦」樂愛好快就黎左我屋企，而芝詩過左成個鐘先到，所以就由頭到尾同佢地解釋一次，點解要額外去上堂，但係…
「不過一對一嘅學費真係好貴…」雖然話就話幫依旋補習，但補習費cover唔哂一對一對上堂嘅錢，但係班際果邊又冇得cut，咁…咁…我再搵多啲補習？
「唔好呀學霸，你當你自己係鐵打架咩」叮…，呢個時候收到依旋嘅訊息…
「姐姐，腳傷好啲未？」「嗯，多謝關心」好快就結束左同依旋嘅對話，不過…
「不如搵依旋幫手？」麗晴係呢個重要嘅時間提出呢個好建議，但應該點請依旋幫手？，叫佢阿哥加我補習費？，叫佢幫我交錢？，定係…，好煩呀…
雖然有麗晴呢個提議係唔錯，但係大家都諗唔到一個好方法，直到夜晚…
咔…，今日爹地媽咪兩個好早就左黎，所以大家都離開我屋企，再比左個打氣嘅手勢我…，嗯…，係唔係應該同屋企人傾下，定係自己諗方法解決好？
「阿女，係唔係有野想講？」媽咪係食飯嘅時間問左呢個問題，講？，唔講？
「今日老師話爹地媽咪你地請佢幫我搵左跳舞學校嘅資料，如果要去做就需要每個禮拜多一堂嘅跳舞堂，但係…」我將所有野都講哂出黎，亦都比哂所有資料兩老睇，再諗一諗我自己可以賺到嘅學費…，Er…，聽日搵影天商量下…
「阿女，你係唔係真係想跳想讀？」「5…，係」係媽咪嘅問題過左十秒，我已經有一個好清楚嘅方向，芭蕾舞，係我呢一生呢一世最想做好佢嘅事。
「你養好左傷之後就同老師講可以開始，學費果度…」呢個時候望左爹地一眼，但係就冇咩動作，好似默許緊我同媽咪講緊嘅野，咁…咁我應該開心？
食完餐飯，我就同姊妹講岩岩同屋企人傾完嘅野，佢地都好開心，但係我就覺得呢件事係自己決定，係唔係應該由返自己去出錢，自己去應付自己嘅挑戰。
鈴鈴，呢個時候收到依旋嘅電話，佢打黎係想問學業上嘅問題，嗯，點講呢…
「等等」我拎起自製嘅筆記，開始同依旋一步一步解開佢問題嘅根本，再拆解講比佢聽，差唔多用左成個鐘先可以解決哂所有問題，呼…，成十一點架啦？
「唔該姐姐，有冇野我可以幫到你？」「Er，冇架啦，聽日見」聽到依旋呢個問題我都呆左一呆，但係唔好比佢知好啲，但聽日點都要洗走佢先可以搵影天…
「晴晴，練完舞可唔可以帶走依旋，我想搵影天傾下」鈴鈴…，唔到兩秒麗晴就打左個電話過黎，佢知道我有咩考慮，所以就同我傾緊用咩理由帶走依旋…
「你隻腳未好返架，早啲休息」麗晴講完呢句就收左線，而我都攤係床度……
十分嘈…，差唔多兩個禮拜冇聽過嘅鬧鐘聲響起，而今日要做就係打動影天。
「嗯…」「影天，一陣依旋練完舞可唔可以留一留低？」好快就send左個訊息比影天，而我已經有齊心理準備，點樣同佢講要加補習費，雖然係有啲難。
「不如佢地排舞果陣傾？」復左呢個訊息返黎…，咦，呢個都係好方法。
係依旋練舞果陣，我同影天兩個去左附近嘅餐廳坐低，叫完野食就入左正題…
「雖然同依旋補左習唔係好耐，但係我想加補習費，每堂加一百蚊得唔得？」「嗯…」聽到我嘅加價，佢好似冇咩太大嘅動靜，只係用一下嗯就回復左我？
「你…你唔覺得奇怪？」「聽到依旋佢日日夜夜都叫住你個名，應該都係不斷煩住你，不如每堂加兩百蚊好唔好？」下…，一堂兩百蚊，會唔會有啲過份？
「我個價本身都已經高，但…」「係唔係有原因？」影天好快就知道我嘅難處，唔知點解對住佢就越黎越放鬆，好似係一個屋企人嘅感覺，定係因為愛情？
個原因由頭到尾咁講哂出黎，而佢亦都一一幫我解決左問題，但係學費方面…
「得啦…，唔好諗住幫我比學費」好快就停止左佢諗到呢一步，我唔想受佢咁大嘅恩，雖然我知佢仲意我，想幫我，但係跳舞學費都係自己賺自己比好啲。
鈴鈴鈴…，影天電話響起，望到來電係依旋，嘩，原來都傾左成兩個鐘架啦…
「我同樂盈係餐廳，你過黎啦」好快就見到依旋好開心咁一彈一跳走入黎…
「依旋做咩咁開心嘅？」「岩岩老師話有個新舞劇要演出，所以搵左我做領舞果個，不過…」依旋講到呢度就望下我，嗯…，我係有唔甘心，但係我可以點？