起舞吧!愛與舞蹈的感覺: 3
「姐姐sorry」「唔緊要，我好快就可以追返上黎」好快就食完呢個下午茶，而之後嘅半個月，我收到比平時多嘅學費，原來影天照左之前講嘅價錢比多左…
「你應得嘅，好啦，依旋交比你」係呢一日去依旋度教佢果陣，我感覺到依旋望我嘅眼神有啲唔同，但係又講唔出分別，呼…，都係交完就返屋企休息下…
十分嘈…，好快就左返學當日，好彩之前同學校申請左要搭𨋢，所以返到學校就去左𨋢面前，而同班兩位好姊妹就過黎「扶我」，實情係想痴𨋢搭…
「兩個懶鬼」「過黎幫佢仲話我懶，唉…」三個係部𨋢度大笑左十秒，好快就返到班房，準備好下學期嘅挑戰，之後嘅班主任堂講緊揀科，係喎，揀科點算？
鈴鈴…，好快就到左小息，我地四個都聚埋一齊，傾緊應該點樣揀科先好…
「樂盈你唔駛擔心啦，揀咩科都得…」「但係我想兼顧到跳舞，好煩呀…」係度一路傾一路傾，直到打鐘先返埋位，再黎就係食飯時間，好好彩咁撞到麗晴。
「你地都係度呀」「hello」今次撞到另一位新朋友，就坐埋六個人一枱食飯…
「係度傾緊咩？」「今朝老師講緊揀科，麗晴你地學校點架？」成個食飯時間都傾緊呢樣野，然後麗晴嘅朋友古湘芝都比左唔少意見，令我地都有左新方向。
「放學你得唔得閒？」行緊返學校果陣麗晴係我耳邊問，今日冇野做嘅我就復左OK手勢，而我地就約左放學係我學校門口等，唔知麗晴帶我去邊呢？
「樂盈走啦」「你地走先，我約左麗晴」好快就叫左三姊妹離開，我就自己一個係門口坐低等麗晴，而佢亦都好快就咁係門口出現，就帶左我去一個地方…
「嘩，點解黎呢度嘅？」「我…」係我耳邊講左好多野，但係我大部份都係聽唔明想講咩，只係明嘅一句係…，我想係度識到自己仲意嘅男仔，係度識男仔？
「咁多位男仔女仔，歡迎黎到今日…」差唔多五點半聚會就開始，但係…點解我有種比麗晴老點左嘅感覺，我唔係想識男仔，但係又唔想突然走左去…
「咦，影天？」「喂樂盈，佢地黎啦」麗晴係我身邊講左呢句，而我眼前的確係坐左一個男仔，佢好快就向我自我介紹，但係我個腦真係hand左機，答唔到…
「你有咩興趣？」好快就聽到個男仔問左我呢個問題，但係我真係一啲都冇興趣，只係諗緊一陣影天黎到果陣講咩好，死啦死啦，下一個就係佢，點算？
「你咪…」「劉影天你好」麗晴就係我旁邊講左呢一句，而佢都好似望到我係度，向住我笑左一下…，唉呀，好尷尬，一陣究竟同佢講咩先好，打招呼定…
「好，男士可以同下一位女士自我介紹」主持人咁就宣佈左轉partner，噢…
「樂盈你隻腳點？」「好返啲啦」「不如我聽日黎接你返屋企？」「下…」好快就過左五分鐘，而自我介紹環節亦係呢度完結，之後嘅係自由搵人傾計，呼…
係呢個半鐘入面同我傾得最多計嘅係影天，而佢亦都係我旁邊趕走哂其他人。
「點解你會黎嘅？」「我比麗晴拉過黎，咁你呢？」「我都係比朋友拉黎…」好冇營養嘅對話，但係就好似係度同對方講緊，點解你會黎左speed dating一樣。
「大家係唔係等得好心急呢，之後就係遊戲環節，請一男一女一組，依家可以自己組隊」主持人講完之後大家都係度搵緊自己個拍檔，而我同影天兩個對望完之後就留係原位，等其他人組好隊，而麗晴比左個「原來係咁」嘅眼神我…
「第一個環節係…」主持人講左個名出黎之後我呆左一呆，但我隻隊咁嘅…
「主持，呢個女仔隻腳整襯玩唔到」影天好快就幫我講左出黎，而我同佢係呢一個環節只係坐係度望住其他人玩，但係…麗晴佢著住校服裙，咁咪會…
「好，係麗晴同佢嘅拍檔嬴」吓，麗晴會唔會太搏命，好似仲勁過啲男仔。
好快就到左下個環節，而且係我都可以參加嘅，但係影天就唔知做咩好多野都爭住黎做，搞到我好似一個要人服侍嘅公主一樣，而麗晴望過黎呢面嘅樣…
「我要十枝原子筆」兩個人一組嘅收賣佬，最難嘅地方係男仔比較少文具…
「有」影天好快就係自己筆袋拎左出黎，再以九秒九跑出去，好快就嬴左。
過左差唔多兩個鐘，呢個極速約會亦都完左，想搵返麗晴但好快就唔見左人…
「唔駛搵啦，你個好姊妹同我個朋友走左…」影天好快就係我耳邊講左呢句，而佢都慢慢咁扶住我離開，而佢嘅私家車都到左接影天返自己屋企。
「唔該」「去樂盈屋企」下…，你唔講地址司機都知你講緊邊度？，影天你…
「你眼訓就訓一陣」其實都唔駛一陣，唔到十五分鐘就已經到左海之戀商場。
「駛唔駛我陪埋你上去？」「唔駛啦，聽日練完舞再見」我以緩慢嘅速度行返去屋企，而影天係確認我安全到達之後先離開…，唔通呢種就係被照顧嘅感覺？
係枱度一路溫緊今日教左嘅野，一路係度諗岩岩影天帶比我嘅感覺…
叮叮…，收到黎自依旋嘅訊息，而內容都係問及岩岩極速約會嘅野，不過…
「點解你會知？」「岩岩阿哥返到黎成面都係笑容，仲要係度睇緊相，咁岩就見到姐姐你同佢影果幾張，明顯就係同姐姐有關」影天岩岩幾時有同我影過相？
個腦一直係度轉，但係都唔記得有單獨同影天影過相，我講緊係企定定果隻。
「麗晴，岩岩我地最後有影到相咩？」「吓…，好似冇喎」同麗晴傾左差唔多十分鐘，好似知道左啲咩咁，原來係我同佢兩個坐係度傾緊計果陣比人影左相…
「hi，岩岩影左嘅相可唔可以比埋我？」好快就send左個訊息比影天，亦都收到幾張相，原來我同望住佢果陣嘅眼神係咁樣…，唔怪得麗晴佢地會話我啦…
「聽日練完舞有冇時間？」「做咩？」「我有套戲想睇，可唔可以…」影天好快就問左個重點，而我亦都答左佢好，嗯，呢套戲我都想睇，不過好姊妹果邊…
「姊妹，呢套遵點睇？」應承五秒後係姊妹群果邊都有約睇戲出現，仲要係…
「我呢我呢…」講左呢句出黎之後四個一次過打左過黎，一個聯合會議…
「高樂盈做咩口窒窒」芝詩好快就帶領呢個會議，好唔好同佢地幾個講呢？
「唔通…」麗晴好快就講左今日發生左嘅事，而我亦都想了解麗晴嘅野。
「小朋友唔好轉移話題喎」好快就比佢地帶番去我個問題度，唯有同佢地講我講聽日有咩要做，之後就比佢地話我「有異性冇人性」，但同影天兩個行街…
「係係係…」「星期六係唔係睇戲呀？」「你個衰女會劇透嘅，轉節目」芝詩好快就講左呢句出黎，而今晚嘅會議亦係半個鐘之後結束，而時間係十二點…
「爹地媽咪呢？」去到呢個時候先記起，兩老都仲未返黎，好肚餓添……
叮噹…，呢個時候聽到一個門鈴聲，嗯？，點解依個時候會有門鈴聲？
「樂盈小姐你訂嘅外賣」企係我門口嘅係一個好熟悉嘅人，手上仲有個外賣…
「影天，點解會係度？」劉影天係呢個時候企左係我屋企門口，但係點解…\