起舞吧!愛與舞蹈的感覺: 第四章:舞蹈中的缺裂感 1
「麗晴你又係度嘅」「今日冇試考咪出黎囉，考埋聽日就完」傾左兩句之後就搵左間餐廳聽芝詩講佢嘅問題，原來原來佢只係想搵啲野做，就約哂我地出黎。
「比我抖下啦小姐，聽日要final rehearsal架」我咁樣講完就攤係餐廳張枱度。
「懶豬盈盈」叮…，係易心笑緊我果陣，電話就傳黎咁樣嘅聲音，係依旋喎。
「姐姐你得唔得閒呀，不如黎陪我玩呀」張相入面有佢同兩位朋友，而影天都係間屋入面，而佢地玩緊嘅係大富翁…，唔洗返學都要咁用腦，OMG…
「睇緊咩呀盈盈」「咦依旋叫我地去玩喎」「喂唔好呀…」講呢句果陣已經太遲，因為芝詩已經幫我復左依旋，而一個鐘後我地已經係依旋屋企門口前面…
「姐姐你黎啦」依旋好快就拉左我去佢地果間房，重新開過一盤大富翁…
呢個遊戲玩左差唔多兩個鐘，到左下午茶時間，大家坐左係大龐睇電影…
「麗晴你地聽日考咩科？」「中文說話炸嘛，冇野可以溫」一邊傾計一邊睇電影，再黎就係玩下其他遊戲，好快就到左夜晚6點，今晚都係自己食自己…
「管家，今晚煮九個人嘅飯」影天好快就吩咐左自己管家，係呢度食晚飯？
「好Yeah，大家陪我食飯」依旋真係一個小妹妹咁，小小事都可以咁開心。
等食飯期間大家都傾緊黎緊想做咩，有咩夢想咁，唯獨係我仲係十五十六咁…
「樂盈你唔係話想升APA咩？」「係…，但係…」個腦又諗緊爹地媽咪，會唔會有更好嘅選擇，DSE考得好嘅話，讀神科會唔會好啲，跳舞只係興趣？
「食得飯啦各位」管家嘅聲音傳到耳邊，而呢個話題亦都暫時擺低，但係我…
食左差唔多兩個鐘，大家攰到唔想郁，差唔多一個鐘後劉家司機車左我地走…
「唔該依旋」「唔好咁講啦，聽日見」佢慢慢閂左車門，而我都慢慢行返屋企。
「睇車呀盈盈」係一個分叉路口，芝詩把聲同拉我呢個動作，令我驚醒過黎…
「咩事？」「你傻左咩，諗咩諗到咁入神？」我望住芝詩嘅臉，想喊又喊唔出…
「仲有時間，去食糖水？」係身邊仲有麗晴，一行三個人去左附近嘅糖水舖。
「平時果個開心果去左邊呢？」「唉…」慢慢同姊妹講出我嘅問題，而我亦都覺得自己唔岩讀其他科，但係望到爹地嘅表情，總覺得佢係想我有更好嘅出路。
「傻瓜，你爹地都比左咁嘅offer你，即係佢都想你跟自己咁諗去行，你仲諗咩呢？」「不過香港得一間APA，入唔到咪」其實之後仲有兩級考試，但係我…
「跳埋星期六嘅表演同老師傾下囉，我諗佢會幫你嘅，都晏啦，返去訓教」同佢地傾完之後個腦好似冇咁大壓力，但係仲有種唔知點嘅感覺，星期六再算！
鈴鈴…，星期五朝早，又一個電話打斷我嘅睡眠，今次係依旋，一陣都見啦…
「姐姐，一陣可唔可以早啲返，我想練多少少野」「嗯，一陣學校見啦」同依旋約好時間就起身梳洗，再到樓下食早餐，係一個自由自在嘅朝早，要享受下。
仲有三個鐘先練舞，做咩好呢？」咁樣問自己，再查左次影院場次，決定…
「比卡比卡…超」係寵物小精靈劇場版，嗯，竟然唔係暑假上有啲出奇，不過仲好啦，可以係戲院靜靜咁睇，嗯，呼…，睇完套戲成身鬆哂，仲有一個鐘…
「樂盈你黎啦，依旋已經等緊你」去到學校仲有半個鐘，依旋佢咁早到左…
「姐姐，你睇下我跳成點」講完呢句依旋就跳起我地嘅獨舞部份，嘩…
「你琴日練左好耐？」唔知可以講咩嘅我唯有問依旋一個問題代替我嘅回答。
「三個鐘炸，係唔係跳得唔好？」聽到我嘅問題依旋就向住壞嘅方向去諗。
「唔係唔係，仲有咩可以幫到你？」係我個心入面諗依旋進步得咁快，我咪…
「有架有架，平時可以點練…」呢位妹妹開始問起平時點鍛練等等嘅問題。
「Hey guys，聽日就係周年匯演，大家準備好未？」老師係唔知咩時候入到黎，而麗晴同芝詩都已經係左企度，吓…，我同依旋兩個傾左成半個鐘？
「Yes!!」大家都咁樣回應老師嘅問題，我隻腳…過埋聽日再去理佢都未遲掛…
「好，依家先做熱身」好快就開始左今次嘅練習，算係最後一次排練。
「好，樂盈小心轉圈果陣嘅平衡」練左半個鐘左右老師就可以提示，我隻腳…
「休息十五分鐘」差唔多練左個半鐘，老師就講左呢句，仲走埋黎我身邊…
「樂盈，隻腳做咩？」「我…」「比我睇下」老師叫我去另一間房，除左對鞋。
「好彩都唔算嚴重，痛唔痛？」老帥不斷移動我隻腳，大概得一個位置係痛。
「坐埋一邊休息先，到最後果次練習先落場，用冰敷下先」老師好快就拎左個冰袋比我，而佢都返左課室指導大家聽日嘅表演，希望聽日唔係我最後一次…
「樂盈」抖左唔知幾耐，芝詩嘅聲音就係門口傳黎，嘩，原來差唔多落堂…
「老師話最後一次排練先叫你」好快就由芝詩嘅陪同下返左課室，鬆左少少。
「樂盈唔好太搏，聽日你好重要」老師講左一句就開始播今次嘅音樂。
「今晚大家唔好做任何運動，聽日係荃灣大會堂見大家」講完呢句大家都四散，而麗晴同芝詩就一路望住我，好似玩緊有口難言咁，但從眼神知道係…
「你冇事呀嘛樂盈？」麗晴終於忍唔住問左我呢句，我亦都笑笑口咁搖頭。
叮叮…，係呢個時候就收到個訊息，呢個時間，應該就係媽咪同我講今晚…
「盈盈，今晚要搞埋啲手尾聽日先放得假，所以今晚要你食自己啦」電話上面顯示住呢一句說話，而我亦都慣左自己一個食夜晚果餐，係我諗緊食咩果陣…
「姐姐，今晚一唔一齊食飯？」依旋問左我一句，而麗晴同芝詩亦都等緊我。
「Er…」我一路諗緊呢個問題一路望住兩位姊妹，但佢地兩個應該係返屋企…
「做咩？」芝詩等左一分鐘左右就過黎問，麗晴亦都係旁邊用表情問緊問題。
「你地係唔係返屋企食飯？」「嗯」「我阿媽話出黎食，你地點？」芝詩都係出黎食，咁…同埋依旋同影天，Er…，差啲唔記得影天係陪住個妹食飯架添。
「Sorry呀依旋，今晚我約左人，不如遲啲再一齊食飯」開始打眼色比芝詩，而麗晴望左我一眼之後就知道咩事，希望芝詩都知道我想講咩啦，希望希望…
「呀，我阿媽催啦，樂盈你係唔係行得？」「係呀，聽日見啦依旋」係呢個時候向住大門果邊跑去，而麗晴慢左一秒咁係後面追住我地，半分鐘之後停低左…
「真係命都短幾年呀咁玩法」「Sorry囉」我地三個好快就笑左，而芝詩亦同媽咪講左多一個人一齊食飯，係言談間亦都傾到關於學校同跳舞嘅野。
「係呢樂盈，聽阿女講你係想跳舞，有冇諗過呢間？」芝詩媽咪呢個時候遞左啲資料係我面前，係一間外國都幾出名嘅芭蕾舞學校，但係我實力得唔代表…
「有諗過…」一路諗住有咩答案可以答伯母，一路就諗自己條路應該點樣行。
「好啦聽日見」「聽日見」係行緊返屋企途中就遇到返緊屋企嘅兩老…