那天放學後，我撞見有同學在學校後樓梯敦倫: 23 - 辯論(2)

「首先上台嚟質詢嘅係2B班嘅蘇家祺同學，佢將會質詢嘅係內閣“覺醒”，時間有一分鐘。」

「你好，前幾日我喺學校走廊撞到一啲你哋內閣嘅義工團成員。你哋當中有義工團成員喺我經過走廊嘅時候向我豎中指，呢個係咪就係你哋服務同學嘅態度呢？」

「多謝呢位同學嘅提問，我哋內閣並唔知道有相關嘅事情發生。如果事情屬實，我謹此代表整個內閣喺呢度道歉，我哋唔鼓勵呢類型嘅事情發生，亦都對於有咁嘅事發生表示遺憾。希望可以回答到呢個同學嘅問題。」

「請問有冇追問？」

「有，我相信冇同學希望一個禮貌同唔尊重同學嘅內閣成為我哋學校嘅學生會代表。想請問你哋會唔會譴責校內一啲針對我或者其他同學嘅歧視女性言論？」





「再次多謝你嘅發問。眾所周知，我對於各位同學係最客氣、最有禮貌嘅。大家唔好笑，如果對於同學連基本嘅尊重都冇，我哋邱如何談論服務同學呢？我哋大力譴責所有同其是相關嘅言論。」

「跟住落嚟上台質詢嘅係4A班李敏澤同學，佢將會質詢內閣“安榮”。」

「唔該主持。想詢問內閣，你哋嘅嗰一個logo同行車指示牌有好多相似嘅地方，連色系都係幾乎一樣，請問係咪有抄襲嘅嫌疑？」

「多謝同學嘅發問。我哋嘅團隊呢幾個星期每日都好努力咁樣工作，呢一個內閣標誌著我哋每一個閣員討論咗好耐先至決定到出嚟嘅樣本，當中經過我哋好多嘅資料搜習，同埋後期製作，包含咗好多辛酸，最後製成咗我哋每一位閣員都好滿意嘅標誌。我相信呢一個標誌充分代表到我哋內閣嘅理念，所以我哋最終決定以呢個標誌代表我哋內閣。」

「請問有冇任何追問？」





「有，我想講你冇正面回答我嘅問題。我想詢問你哋嘅嗰一個logo同行車指示牌有好多相似嘅地方，連色系都係幾乎一樣，請問係咪有抄襲嘅嫌疑？」

「多謝呢位同學嘅發問。呢一個內閣標誌著我哋每一個閣員討論咗好耐先至決定到出嚟嘅樣本，包含咗好多辛酸，最後製成咗我哋每一位閣員都好滿意、獨一無二嘅標誌。希望可以解答到你嘅問題。」

此時，發問的李敏澤同學突然之間搶咪發言：
「你根本都冇回答我嘅問題。Anyway祝大家中秋節快樂。」

「跟住落嚟上台嘅就係2A班潘子芊同學，佢將會質詢嘅係內閣“安榮”。」

「唔該主持。你哋內閣喺傳單上面寫咗幫我哋同學爭取咗好多福利。為咗驗證一下，我親身去咗每一間你哋寫低咗嘅舖頭，發覺有啲舖頭係結業或者已經轉咗做第二間舖。其中，你哋聲稱喺西九龍中心有優惠嘅珍珠奶茶店喺我去現場實測嘅時候，發覺已經轉為一間內衣店，請問內閣有咩回應？」





「多謝呢位同學嘅發問，我對於我哋嘅福利幹事喺福利問題上面出現嘅失誤表示好抱歉。喺呢個問題上面好大意，冇睇清楚間舖頭而家嘅狀況。」

「請問有冇任何追問？」

「有。你哋內閣聲稱會為我哋同學爭取福利，但係而家中間有啲舖頭係結業，甚至係已經轉為其他類型嘅舖頭，請問你點樣喺一啲結業嘅舖頭入面為同學爭取福利？」

「我哋內閣再一次為到你所講自己嘅疏忽道歉。」

「跟住落嚟上堂嘅係1E嘅林栢豪同學，佢將會質詢嘅係內閣“安榮”。」

「主席你好，你哋內閣聲稱喺互相執相環節之中對於你哋個競選購袋甩色嘅指控係毫無根據，但係上星期我阿媽返屋企洗完個袋之後，洗衣機入面嘅白色衫都染曬做紅色，想請問你哋點樣解釋？」

「我...er...」





“安榮”的主席卡了十秒鐘也未能回應問題。


Ig: marx_ice_
https://instagram.com/marx_ice_?utm_medium=copy_link