那天放學後，我撞見有同學在學校後樓梯敦倫: 22 - 辯論(1)

學生會競選質詢大會快要開始，台長和他的閣員正在馬不停蹄地準備資料。但是，沒有人能夠想到當天是如此激烈，雙方也預測不到會發生這樣的情況。

「互相質詢環節首先發言嘅係“覺醒”。」

「唔該主持，我哋內閣嘅預算捉襟見肘，甚至喺印傳單方面都有困難。想請問點解“安榮”有足夠嘅財力去喺學校鋪天蓋地咁樣宣傳？」

「回應返頭先嘅問題，“安榮”所有嘅經費都係來自一啲善心人士嘅捐款，我好感謝佢哋認同我哋內閣嘅理念，資助我哋進行呢一次嘅競選。」

「回應“安榮”嘅主席，我哋只不過係提出合理嘅質疑，根據客觀嘅事實作主觀嘅判斷。因為普通同學根本冇可能有咁多錢去捐，所以唔係淨係我哋，好多同學都唔相信呢啲錢全部都係眾籌返嚟。」





「我認為內閣“覺醒”嘅主席因為同學唔支持佢哋、唔用捐助嘅方式幫佢哋而喺度發牢騷，佢哋唔抵得我哋有錢啲，所以不斷企圖喺度製造陰謀論，同時都係大家所知佢哋最擅長嘅事。」

「回應返“安榮”嘅主席，有錢唔係大曬。」

此刻，台下響起一片歡呼聲。

「請現場同學肅靜，“覺醒”請繼續發言。」

「唔該主持。一個咁有米嘅內閣推出咗好多競選產品，但係經過我哋嘅調查發現，“安榮”嘅購物袋有甩色嘅問題，有幾個同學發現到相關嘅問題之後，因為個袋甩色出嚟嘅物質有機會影響到同學嘅健康，請問“安榮”點樣解釋？」





「你哋嘅指責係毫無根據嘅，我哋嘅競選小物全部都係經過品質檢查，絕對唔會出現頭先“覺醒”所講嘅相關情況。」

「我哋唔係空穴來風，而家我哋內閣秘書拎住嘅就係一個甩色嘅購物袋，我哋可以清晰見到袋上面嘅甩色已經直接染紅咗包住個購物袋嘅密實袋，請問“安榮”點樣解釋？」

「呢個係個別個案。我哋希望詢問內閣“覺醒”，你哋口口聲聲指出一啲老師同同學做錯事，然後公開喺網上論壇上面批鬥佢哋，甚至煽動學校嘅同學參與未經批准集會，造成堵塞學校通道同埋噪音污染嘅問題。請問你哋會唔會為你哋製造出嚟嘅混亂而道歉？」

「唔會，我哋冇做錯到，因為我哋提出嘅所有指控都係有事實根據。我哋所有嘅質疑都係嚟自科學精神，即係大膽假設、小心求證。有問題嘅係學校，因為佢哋一直都冇畀合理嘅答覆我哋同學，甚至造出一連串嘅事去阻止同學去尋找真相。」

「你哋將成件事升溫，成日令到同學喺小息同食飯時間塞住曬學校嘅通道，啲中六同學希望有個安靜嘅環境溫書，而你哋就喺度叫囂，阻止咗佢哋溫書，呢一方面又點樣講？」





「首先我希望向所有受影響嘅同學道歉，如果我哋喺抗議嘅過程騷擾到你哋。我哋都希望可以安靜咁表達我哋嘅意見，但係校方一直不予採納，學生會甚至發表接近於公開挑釁同學嘅宣言，我想喺度批評蘇...」

「時間到，互相質詢環節完畢。」

此時，台下同學在座位上竊竊私語，向坐在附近的同學表達他們的不滿。

「cut鐘？What the hell？」

「個鐘仲有十秒喎。」

「果然係黑哨。」

雖然同學有很多反對主持cut鐘的聲音，但是反對無效。主持立即宣布進入下一個環節。

「接住落嚟就係同學上台質詢嘅時間，時間有大概一個鐘，每個同學有一分鐘嘅時間去發問問題，每次只可以提問一個問題。每個內閣亦都有一分鐘時間回應，同學可以補問一次。禁止任何形式嘅人身攻擊，如有任何爭議，主持將會作出最終裁決。」






Ig: marx_ice_
https://instagram.com/marx_ice_?utm_medium=copy_link