我係香港最後一個冇打針嘅人: 三/翻版林明禎？

「砰！砰！砰！」半睡半醒之間我聽到有人好大力咁敲打監倉嘅門，然後好粗暴咁打開。

「喂，即刻同我起身！我地要轉移還押地方，限你十分鐘之內同我準備好，著埋呢套衫！」一把粗獷嘅男聲係我頭頂到大聲吆喝，我睜開雙眼見到一個我從未見過嘅獄卒拎著枝警棍想向我打落來咁，我即刻坐起身用手護著頭講：「Sorry sir，係嘅即刻準備！」佢聽到之後就頭也不回咁離開咗我嘅監倉。

我喺到住咗差唔多一年都未見過呢個獄卒，同埋做咩無啦啦要去第二個地方，先前都冇聽我個律師講過，唔通有啲咩事發生咗？不過算啦我都冇得簡，佢話去第二度咪第二度囉，去邊都一樣。

好快咁梳洗完同著咗果套普通嘅出街衫之後，嗰個粗暴嘅獄卒又好暴力咁打開我度門，幫我帶上手扣，然後我就跟著佢離開咗我留咗差唔多一年嘅「家」。

出到去出面，我諗應該仲係零晨大約4、5點嘅時份，個天啱啱開始光，監獄門口停咗一架黑色嘅甲蟲車，車上面嘅人見到我地出來，就打開車門，我見到車入面坐著一個個樣好似林明禎嘅女人，大約29到30歲著住一套比較casual嘅黑色女軍裝，下身配一條長到大脾中間好貼身嘅西裙，套衫雖然冇露啲咩出來但係好貼身所以突顯到佢嘅玲瓏浮凸，我估應該有32C，再加埋對長腿同黑色斗零踭…佢嘅身材比起真正嘅林明楨都仲差啲不過個樣真係好甜美，佢著呢套衫我都已經覺得好正。正當我好猥瑣咁望著佢對…眼嘅時候，佢望著我嘅眼神帶著不屑，行落車同帶我來嗰個獄卒講：「饋hi嗯hi益智軒？（佢係唔係易梓軒？）」我知道大家睇唔明佢講緊咩所以加番個翻譯版俾大家。





譚仔姐姐版嘅林明禎？呢個組合我可以！同埋我成世仔都係第一次聽人叫我做益智軒，madam又幾風趣喎。獄卒答佢：「Yes madam！」之後翻版林明禎就用眼神示意佢可以帶我上車。我上到車之後，翻版林明禎就坐咗係我嘅右邊。突然我眼前一黑，原來個獄卒仲用咗一個黑布袋笠著我個頭。我聽到車門閂埋嘅聲音，然後翻版林明禎就用普通話同司機講：「去A389。」哇，佢地連地名都變埋做代碼咁神秘嘅。

開咗車之後，我坐坐下開始覺得有啲眼瞓就瞓著咗，迷糊之間我感覺到架車停低咗，翻版林明禎開車門出咗去，過咗一陣佢就番番入車到，但係今次仲多咗一個人坐咗係我左邊，呢個人相當大份，我感覺到我嘅大脾完全掂著佢嘅大脾，應該係一個男人來。翻版林明禎同司機講：「去口岸。」口岸？咩口岸？我剩係識得羅湖口岸炸喎。唔係咁大整蠱下嘛？我番咗大陸嘅話咪連渣都冇得剩？

但係呢個時候我只係階下囚，手又俾人扣著，頭又俾人遮埋，仲可以做啲咩，唉去就去，最多咪死，死咗嘅話阿嘉就會好快忘記我…

又坐咗唔知幾耐車，架車又停咗，翻版林明禎就同我講：「下車！」佢依家直頭連廣東話都懶得講直接講普通話。之後佢一手除咗我嘅黑布袋，一陣刺眼嘅陽光令我下意識合埋對眼，原來坐坐下依家已經係朝早。架車停咗係一個油站入面，我諗係要入油再去口岸，我擰去左邊見到坐係我隔來係一個大約60歲嘅男人，佢著住一套厚重嘅鴨屎綠軍裝，戴著黑色口罩，身形有啲臃腫，怪唔之得我覺得咁迫啦。

出奇地佢地又俾我呢個犯人行出來，我落咗車之後翻版林明禎用一塊黑布遮著我對手扣，然後捉著隻手扣中間嘅鐵鏈嘅位置扯我入油站隔來果間冇咩人嘅cafe。咦？嗰個男人冇落車同我地一齊來嘅？算啦佢唔來仲好。翻版林明禎扯咗我去最角落嘅位到坐底，然後同我講：「你在這裡坐著不要跑，你的手銬上有定位追蹤和遙距炸藥裝置，不想死就給我坐著。」之後佢就入咗cafe嘅廁所。





痴線架咩我又唔係啲咩殺人犯，有冇必要用啲咁嘅手扣呀…間cafe除咗我之外得小貓一兩隻，不過因為我有塊布遮著咗副手扣所以啲人都冇特別留意我，個女店主係counter後面拎著杯水行出來放係我枱面，同我講想叫啲咩就隨時叫佢。呢個時候我有一個大膽嘅諗法…

我同佢講：「唔好意思…我咁啱冇帶電話係身，呢到有冇得借電話打？」

佢面有難色咁望著我話：「先生，唔好意思呀我地店冇電話借架。出面有個電話亭，你不如出去打？」

拍廣告咩依家…仲電話亭，而且我離開咗個位仲得了嘅，未行到去個電話亭我已經爆炸死咗啦。要講啲咩令佢肯借佢部電話俾我呢…

「我…我約咗我婆婆來cafe附近但係我等咗好耐佢都冇出現，我又唔記得帶電話出來，我係好遠出來揾佢架所以冇時間再番去拎啦，同埋我身上面冇散紙打電話。唔該你呀，我好擔心我婆婆呀。」





「咁呀…一係我借啲散紙俾你啦？」

見佢仲咁好心想借散紙俾我佢真係幾好人，不過我要嘅係電話唔係散紙。我大力摵咗自己大脾一下，痛到眼水都差啲標出來。我用呢個楚楚可憐嘅樣望著佢講：「我婆婆成90歲人，仲有少少老人痴呆，如果佢有啲咩事我真係唔知點算，由細到大我同婆婆相依為命，我結咗婚先搬出來住，如果佢有啲咩三長兩短，我…」

店主姐姐見我講到眼水都就標埋出來，就話：「先生你冷靜啲先，我借我部電話俾你啦好冇？」講完佢就走番去counter後面拎咗佢個電話俾我。其實全程我都一直望著廁所度門幾時會開，佢一出來我就扮唔知個店主姐姐做緊啲咩咁就冇事。

我揭開咗少少塊黑布露咗半隻右手出來接著佢部電話，拎咗之後手都震埋，好驚下一秒俾人斷正佢即刻就隊冧我，不過都冇得諗咁多。我拎著部電話諗都冇諗就禁咗幾個數字之後停咗。係阿嘉嘅電話號碼…我仲打俾佢做咩…

我刪咗嗰幾個數字準備打俾我阿媽嘅時候，廁所度門突然打開，我即刻好似拎著個燒熱咗嘅鐵球咁拋番部電話俾店主姐姐，然後同佢講：「唔洗啦唔該！」佢一臉疑惑咁望著我，我用眼神示意佢行開，佢睇到之後就行開咗。死啦唔知翻版林明禎有冇見到呢…