我係香港最後一個冇打針嘅人: 二/molamola

第二朝我睡眼惺忪咁係梳化起身，身上多咗一張薄被，睇來阿嘉都係關心我嘅。我坐咗起身，阿嘉就好似平時咁煮我最鍾意食嘅多士煎雙蛋配條腸，仲有一杯熱咖啡。我喺廁所梳洗完之後出到飯枱食早餐，阿嘉拎著佢碗麥皮坐係我對面，大家唔出聲咁食咗一陣，佢就同我講：「阿軒，琴晚你同我講嘅嘢我真係好難消化，但係…你係我呢一世都想係埋一齊嘅人，所以我尊重你嘅決定，我相信疫苗法取消之後你都會俾人放番出來，到時我哋再結婚啦。」

我放低隻叉，伸手搭著阿嘉隻手「多謝你，阿嘉。我…對唔住我俾唔到啲咩你，但係只要你係我身邊陪住我，我會用盡我所有來愛你。」

阿嘉笑咗笑就繼續食佢嘅麥皮。

一個月好快就過去，我冇任何預約打針嘅記錄所以政府就根據疫苗法將我拘捕，之後上咗法庭好快就判咗入獄，法庭對我嘅判決係，只要我肯打針，喺我打完五針之後就放我出來。

入去之前我同阿嘉再見咗一次面，我地兩個冇想像之中咁唔開心，我仲笑著同佢講我要每個星期都打電話俾佢一次，佢得閒就入來探下我，間屋我已經續多咗兩年租，到時完租再叫我爸媽幫手俾著錢先，我出番來之後好快所有野都會回復正常。





頭果幾個月都同我地講好嘅一樣時不時就傾電話同見面，雖然生活由兩個人變成得番自己一個，但係我心入面我知道我同阿嘉大家都掛著大家，所以我都冇特別孤獨或者唔開心，但係後來我打過去揾佢嘅時候，佢每一次一係就有野做緊唔得閒，一係就講唔夠兩句佢就話攰要訓覺，每次探我嘅時間亦一次比一次隔得長，一開始係一個月一次，到兩個月一次，到…我上一次見佢已經係八月嘅事。

後來，我心入面都知道我咁樣做對阿嘉來講傷害好大，好自私地要求佢要等我，但係又要佢孤零零係出面自己一個生活，仲破壞咗我地嘅婚禮…我唔應該要求佢等我嘅…

所以我同阿嘉最後一次傾電話，我同佢講：「阿嘉，我有啲嘢想同你講。」

「嗯？有咩想講？你快啲講完我要落街買餸。」

「我…對唔住，我知道我沊(dum)低你係我唔啱，我每一日都好掛住你，不過…」





講到呢到，我聽到電話嘅另一邊傳來一把好微弱嘅男聲，好細聲但我都隱約聽到佢講咗句「傾完未？」

嗰下我心入面有一陣強烈嘅剌痛感，但都有一種釋然嘅感覺，原來阿嘉冇一個人孤獨咁生活，佢都有人陪著…

我繼續講：「…不過我唔想耽誤咗你嘅人生，人地話女仔嘅青春消逝得好快，我同你一齊咗咁耐你每一日都照顧得我好好，即使係嗰排我落唔到街你都毫無怨言，我…我唔講咁多啦，總之你唔洗等我啦，你去揾第二個開始你嘅新生活啦！」

佢停頓咗幾秒，然後講：「阿軒，我…我其實…」

我唔想聽到佢同我講嗰個男人嘅事，喺佢未繼續講之前我就話：「得架啦我會照顧好自己架啦唔洗擔心我，好啦我夠鍾番入去啦，再傾啦拜拜！」





我收咗線之後企咗係到，啲眼淚控制唔到咁流落來，我抺極佢地都繼續流，後面排緊隊果個人好粗魯咁話：「講完就行開啲啦阻著晒！」然後仲好大力咁推開我，我跌坐咗係地下到但係我冇力再起番身。

我已經唔記得咗自己係點樣番番去我嘅監倉，我剩係知之後果幾日我好似行屍走肉咁，個腦不停幻想佢同電話入面嘅男人點樣談笑風生，點樣係我同佢嘅安樂窩入面煮飯仔睇電視過著我同佢嘅日常生活，點樣訓係佢隔來同佢親密接觸…每次諗到呢到我個心都好痛。但咁又點，係我同佢講唔同佢結婚，同佢講叫佢揾過第二個人過佢嘅新生活，我應該祝福佢而唔係係咁諗著佢，佢揾第二個人照顧佢係啱架，佢等我先係錯嘅…

我閂埋咗本日記，我同自己講等我出番去又係新嘅開始，我會揾到另一個同我過一世嘅人，而佢亦都會好幸福咁過埋佢嘅下半世。

易梓軒，唔好再諗啦，訓覺啦，聽日又係新嘅一日…