我係香港最後一個冇打針嘅人: 一/要女人定要樽鹽

二零二五年一月一日 （晴）

新年快樂！今年係第一年係監獄度跨年，我希望新嘅一年可以世界和平，所有人身體健康，人人都有飽飯食，最重要嘅係阿嘉可以開開心心咁開始佢嘅新生活。

寫到呢度，眼眶嘅眼淚滴咗落去我嘅日記上面，啱啱寫完嘅字俾眼淚化開晒。其實我寫來有咩用，都冇人睇到架啦，條路自己揀仆街唔好喊，男人老狗喊咩嘢。我果陣都講到咁決絕，佢應該都已經死心唔會等我…

睇到個標題都知道，我係香港最後一個冇打針嘅人。仲記得2022年嘅時候，因為疫情爆發得好犀利，政府不斷谷針，果陣要打三針先可以出街食飯同埋做其他日常生活嘅嘢。我不嬲都覺得打針完全冇必要，未打完又中打完都照中，咁打來做咩？而且打完好多人都話會有副作用，又心悸又心痛仲要未有長盡嘅報告去證明啲疫苗冇更加嚴重嘅副作用，我咁後生真係唔想咁快死著。

唔打針最多咪唔出街食飯，剪頭髮我當時嘅女朋友阿嘉喺髮型屋嘅學徒，所以就俾我個頭佢練習，橫掂男仔嘅頭髮都好快生番出來，又唔洗出街，可樂而不為？而且我同阿嘉一齊住，三百呎嘅蝸居話大唔大話細唔細，兩個人住啱啱好夠晒溫馨，平時都係阿嘉負責落街買餸煮飯，佢已經打咗三針，所有日常用品柴米油鹽全部都係佢一手包辦，我淨喺俾錢就ok。除咗大事大節冇得一齊出街食飯之外，其實對我嘅生活都冇咩影響。番工嘅話好彩嘅係我係IT狗，番唔番office都係咁做，我老細都見我做得嘢都冇講啲咩，照俾我work from home。





冇打針嘅生活都同打咗針嘅人一樣平淡温馨，我有一個好愛我嘅女朋友，我有一份唔會令我大富大貴但係足夠我地兩口子生活又平穩嘅工作。喺2023年年頭我儲落一舊錢，就向阿嘉求婚，我哋拍咗拖都五年幾六年，阿嘉唔會好似啲港女咁要求男朋友做醫生律師ibanker要有樓又有車，平時過節都唔洗攪啲咩大龍鳳，同我一齊平平淡淡咁生活已經好滿足。雖然我只可以喺屋企用現成嘅資源去佈置，求婚戒指都喺網上訂返嚟，但係嗰日阿嘉都喊到收唔到聲。求婚之後我地就開始籌備婚禮，嗰陣嘅生活雖然好忙碌又洗咗好多錢，但係我覺得一切都係值得嘅，阿嘉喺我呢世人唯一一個會愛嘅女人。

好景不常，政府嘅谷針政策愈來愈嚴苛，由最開始嘅唔俾出街食飯剪頭髮，去到後來嘅唔打針就觸犯咗新推行嘅疫苗法，所有居住係香港嘅人，必須要喺六個月之內打針，未打過針或者未打夠五針嘅人必須要預約好晒打未來五針嘅booking，預約完又唔去嘅人除非有醫生證明當日唔適宜打針，否則嘅話就要監禁到打夠針為止。所有嘅醫生豁免證明都變晒廢紙，無論你喺男女老幼定有嚴重疾病喺身都必須要去打針。我阿爸阿媽有長期病患，佢哋本來都拎咗醫生豁免證明唔使打針，但係政府推行呢一個疫苗法搞到佢哋都好驚所以就嗱嗱臨預約咗去打。就連我姑媽有肺癌都要迫著打，大家都敢怒不敢言，又會有邊一個可以唔怕坐監而堅持唔去打針，結果全香港嘅人都打晒得番我一個堅持唔去。我阿爸阿媽都勸我快啲打，但係我真係好唔滿意呢個政策，點解一定要我地打？依家雖然都仲keep著有人中招，但係已經得番好少人而且都冇好似以前幾何級數咁上升，大家都對抗疫有一定嘅經驗，根本冇呢個必要。

當然對我最有意見嘅係我嘅未婚妻阿嘉，佢唔明我有啲咩好堅持，呢個時候已經喺2023年嘅11月，疫苗法就喺6月推行嘅，所以得番一個月期限，我同阿嘉嘅婚禮準備得七七八八，要訂嘅嘢訂晒，剩番未派帖同埋最後一啲立立雜雜嘅嘢要安排，我再唔打針嘅話除咗我要坐監之外，我同阿嘉辛苦咗大半年嘅婚禮都會告吹，錢都事少，我地咁多年嘅感情都會毀於一旦。

仲好記得果日我同阿嘉鬧咗好耐交，佢一路喊著咁問咗我一個所有女人都有問過佢地條仔或者老公嘅問題，當然另一邊嘅選擇就因人而異：「易梓軒，你簡我定喺簡唔打針去坐監？」

我沉默咗一分鐘，佢嘅眼淚好似壞咗嘅水龍頭咁
不斷流落來，佢望著我嘅眼神就好似一隻啱啱出世冇耐嘅貓仔望著主人一樣惹人憐愛，但喺我嘅内心有一把聲音同我講，你甘心咩？由細到大都係不斷俾人迫著做好多自己唔鍾意做嘅野，唔鍾意讀書但喺上完堂要瘋狂上功課輔導班、補習班，去到預備考公開試嘅時候又要俾一大舊錢出來上名師補習班，到千辛萬苦捱完個公開試，拎著個不過不失嘅成績去排Jupas，入到一科話專唔專但又唔會乞食嘅科，大學生活都喺走下堂得閒去網吧打下機咁渾渾噩噩就過咗四年。大學嘅生活嗰幾年應該算喺最舒服嘅，但一出到來做野就好似跌咗落無底深淵咁，每個月出嘅糧俾完家用同交租應付日常開支都所剩無己，手一停口又停，番工對著剩喺識得阿諛奉承但又唔做野嘅同事，我又唔鍾意擦老細鞋唯有硬食啲得把口嘅同事嘅工作，就算果日有幾唔想番工都好，把口講咗幾多次要祼辭最後咪又喺死死地氣第二日照樣番工。我嘅人生有咩時候喺有選擇嘅權利？我只係好似一個機器一樣每日不停工作直到郁唔到為止。





唔得，我受夠呢種機械式嘅生活，我要話俾所有香港人聽仲有一個人係堅持緊佢堅持嘅野，唔會向政府唔合理嘅政策低頭，係嗰一刻我作出咗我人生之中最大嘅決定。我拎咗幾張紙巾抺走阿嘉面上嘅眼淚，同佢講：「我真係好愛你，阿嘉，但係我唔想再做一隻麻木嘅羊，我想堅持我嘅信念，同所有人講唔合理嘅事我地就唔會做！如果你都一樣愛我嘅話我希望你可以支持我嘅決定。」

「即係就算你嘅決定令到我地嘅婚禮冇咗你都要堅持唔打？」

「係，我知道對你來講好唔公平，但係我相信喺疫情真正完結之後呢一個疫苗法亦都會取消，到時我就會俾人放返出嚟，我哋可以繼續我哋嘅生活唔會有啲咩影響。」

聽著我講嘅時候佢嘅面上係難以置信嘅表情，佢冇講任何嘢，靜靜咁行番入房到閂埋房門，我知道佢呢一刻都唔想見到我著，我係雪櫃到拎咗罐啤酒，然後坐係梳化到飲。我嘅堅持係冇錯嘅…我相信阿嘉會明白我會等我嘅…