因為EX 我成為左一個禿頭嘅毒撚 然後遇到一隻猫: 60. 家變
直至有日，林生突然比左一大筆錢林太，林太收到錢似乎十分滿意，屋企先暫時無再咁嘈。但正當大家以為問題終於得到解決，兩星期多後嘅一日林志偉同佢阿媽就發現佢地屋企門口比人貼左張紙，而佢地電話亦開始收到好多不知名電話send黎嘅message同恐嚇相片，仲見到佢老豆個樣出現左係屋企附近d街招，全部都係叫佢老豆還錢。原來係無辦法周轉嘅情況下，林生選擇左問財仔借錢。
「你痴線架! 走去問財仔借錢?」林太知道後向林生咆哮。
「咁唔係點? 個個都叫我還錢，平時就稱兄道弟，衣家爭佢地幾個月錢啫，就反晒面日日催我還… 連你都同我講無家用開飯發我脾氣… 咁我咪去借錢諗住還晒比你地囉，不過還左陣後我突然諗就算還晒錢我都仍然係乜都無仲爭財仔一身債，諗諗下不如索性博一鋪希望可以返身…」林生解釋。
「咁跟住呢?」林太問。
「你話呢? 贏左就唔會有財仔追上門啦…」林生無奈講道。
「林釗，你係咪顛左呀? 你仲拎埋d錢去賭輸晒? 咁你衣家諗住點? D財仔搵上門喇，我同阿偉都日日收到d騷擾電話，你驚唔驚有日我地比人鎖門淋紅油?」林太爆seed。
「阿欣，你老實答我你銀行仲有幾多錢?」林生突然轉左個樣好溫柔咁問林太。
「你想點?」林太當然察覺到佢背後有不善良嘅動機。
「睇下夠唔夠還債啫…」林生尷尬咁講。
林太:「你到底爭佢地幾多錢?」
「100萬…」林生好細聲咁講。
「100萬!? 我邊可能有咁多錢?」林太聽完呆左然後再講。
「咁你有幾多? 一係你比晒我我再去搏一鋪，贏左就攪掂架喇!」林生又講。
「仲諗住賭? 你真係無得救… 我唔會借比你扔落咸水海… d錢我要留返黎同阿偉一齊生活…」林太終於清醒。
「所以你真係見死不救?」聽到林太拒絕林生開始生氣。
「係你自己攞黎架! 一早我都有叫過你唔好攪果d咩神仙茶，你唔聽仲攪到自己工都無埋，然後親戚朋友都驚晒你，衣家仲累埋我同個仔!」林太再次咆哮。
「你個賤人! 連你都係咁... 你地一個二個都只係想逼死我!」然後林生忍唔住一把打左落林太度。
然後隨住衣一把嘅出現，受夠係衣個充斥住戾氣，怨氣同暴力嘅屋企，林太終於忍唔住爆發要同林生離婚。
「阿媽… 你比多次機會老豆啦… 我地一家人黎架… 我相信捱過今次佢會變返以前咁架…」林志偉哀求佢阿媽唔好離婚，一齊幫老豆解決問題。
「阿偉… 媽咪都唔想行到衣步，但你老豆真係無得救架喇… 佢到衣家都仲成日想靠賭去一鋪返身… 再係咁我地遲早跟埋佢一齊死… 媽咪有個朋友，就係因為將自己d錢比晒佢個爛賭老公諗住幫佢，結果佢老公越賭越大，輸晒d錢不得只仲越爭越多…最後成家要著草衣家都唔知去左邊…」只係林太主意已決。
最後，林生因為妻離子散又債台高築，雖然最後終於醒悟自己做錯但已經太遲，係無人再願恴幫助自己支持自己亦唔想再累人嘅情況下，佢睇唔開選擇左跳樓結束左自己嘅生命。
衣件事後林志偉好似一夜間長大左好多咁。以前嘅佢咩都會放晒係塊面度好輕易就可以解讀到佢心入面嘅諗法。但衣件事後佢就變得沉默寡言咩都收埋晒係個心入面，好似無人再可以了解佢同真實解讀到佢心入面到底諗緊乜，包括下面嘅阿敏同天上面嘅我。
林生過身後，之前成日上門追還錢嘅親朋戚友並無消失，不過就改為變成慰問林太同林志偉，然後再適當時候提起林生爭佢地錢嘅事。佢地衣個行為令林志偉覺得好虛假偽同嘔心，心入面亦怨恨佢地逼死佢老豆。而另一方面雖然林生已經唔係度，但財仔並唔會因為咁就收手，相反佢地更加focus係林太同林志偉身上逼佢地代林生還錢。因為有晒佢地住址同電話，佢地無奈下只好搬去第二度住再換埋自己電話號碼。
或者林生其實都係專登留條後路比林太同林志偉，果陣佢並無抵押自己層樓，所以林太最後以一個相對低嘅價錢賣左層樓後，將還完銀行貸款後淨返嘅錢，盡量還返比林生爭佢地錢嘅果d親朋戚友。雖然唔夠，但同時間林太聲淚俱下同佢地講自己已經一無所有，再逼佢地都唔會有錢還只會逼死佢地，班親朋戚友最後先肯認自己倒霉收手無再搵佢地兩母子。而因為賣左屋搬走左又換晒電話號碼，d財仔之後亦再搵唔到佢地麻煩，佢地總算可以重新過新嘅生活。
不過之後林志偉發覺母親講嘅野都唔係事實，佢原來私下係留左一筆錢比林志偉讀大學嘅學費，同埋夠佢地租一年樓嘅資金。其實母親嘅做法係無可厚非，始終林太做左全職主婦咁多年，佢地都仲要生活，無可能將全部錢還晒比人，但林志偉就覺得母親利用左人地嘅同情心同埋道德面子去放過左自己兩母子。當然，佢唔會因為咁同情果班親友，只係佢突然明白”機心”衣樣野原來可以好有用。如果再玩多d機心，其實佢地會唔會連之前還比d親友果d嘅錢都唔駛還或者可以還少d?
然後我發現林志偉開始又有另一d改變。佢開始會嘗試去講大話，耍手段，玩弄人心。可惜衣個世界所有野都係相向會互相影響，當你自己都開始越黎越假嘅時候，好自然你自己亦會以己度人覺得身邊d人都越黎越假唔再願意相信人，然後變得好敏感疑心好重。而不幸地衣種對別人嘅戒心竟然慢慢連阿敏都被波及，難以幸免。
「敏敏，你有無試過好憎一個人或者一班人?」有日林志偉食食下飯突然問阿敏。
「無呀…」阿敏有少少覺得突然咁答。
「我以前都無，但衣家我真係好憎我老豆果班親朋戚友…」林志偉面容有少少扭曲咁講。。
敏:「因為佢地之前成日追你地還錢?」
「你唔覺得佢地好假? 老豆死後表面上就黎慰問我地，但其實背後都係想提我地要還錢，仲要驚我地唔夠錢還晒比咁多人個個係咁明示暗示我地要還左比佢先，真係好嘔心…老豆以前成日要對住佢地，諗起都難受…佢對佢地一定都好失望…佢係比佢地逼死架! 點解佢地逼死完老豆仲可以一d內疚都無然後厚顏無恥咁黎催我地還錢? 錢啫，真係重要得個親情友情，重要得過良心?」林志偉衣個時候面目已經去到有d猙獰嘅感覺。
「人性有時就係咁… 不過你都唔好比仇恨蒙蔽左自己呀，佢地係絕情，但始終uncle真係借左佢地錢一段時間都無還，果d都係佢地嘅血汗錢黎，所以唔可以怪晒佢地…」阿敏驚林志偉諗埋一邊所以嘗試幫其他人解釋。
「所以你覺得全部都係我老豆問題，佢地無問題? 哈，估唔到你原來都一樣，睇錢係咁重要!」林志偉既激動又失望咁講。
「我唔係咁嘅意思…」見林地偉誤會阿敏急忙想解釋。
「得啦，我明… 不過重要都無用，我同我屋企都無晒錢架喇… 你嫌棄我嘅可以分手… 反正我阿媽都教識左我夫妻本是同林鳥嘅下一句...」林志偉又突然好灰心咁講。
「我都話我唔係咁嘅意思咯! 我點會衣個時候仲要因為衣d野扔低你喎…」佢嘅語氣令阿敏既著急又心痛。
「Sorry… 我語氣係重左…阿敏，你話係咪只要有錢，大家就唔會再有爭執，可以開心快樂咁生活?」林志偉見阿敏有d想喊就作出左道歉，然後問出左衣個問題。
「我都唔知…」
我估無人會知。
細個我地想有錢，係因為錢可以買到我地想買嘅野。
但大個我地想有錢，係因為我地發現錢原來除左可以買野，仲可以減少好多人與人之間嘅磨擦同問題。
明明細個好睇唔起果d好緊張錢嘅人，但大個見証住身邊曾經親近嘅親朋戚友越黎越多因錢失和甚至變成老死不相往來，我地又會開始怨恨自己點解唔可以有多d錢。