因為EX 我成為左一個禿頭嘅毒撚 然後遇到一隻猫: 61. 二次打擊
不過雖然林志偉口道左歉，但慢慢地佢對阿敏都開始有左戒心同芥蒂，亦因而令佢開始想再試一試阿敏。其實有一樣佢之前一直都有d介懷嘅係一齊左咁耐阿敏一直都唔肯比佢掂，衣種拒絕令佢懷疑阿敏其實係唔係唔夠愛自己。而自從上面一幕出現後，佢開始唔想再咁著重阿敏嘅感受，佢要知道答案，於是佢對阿敏耍左一個手段。
「敏敏，我好羨慕你呀…」有晚佢襯林太唔係屋企飲得好醉，然後就打比阿敏叫左佢上自己屋企。
「羨慕我d咩?」阿敏擔心咁問。
「羨慕你有個完整嘅屋企，可以成日見到你爸爸…」林志偉傷心咁講。
「偉…唔好咁啦，如果你想，你都可以當我爸爸係你爸爸架…」敏安慰佢說。
「真嘅? 但佢始終唔係我老豆… 我真係好掛住我老豆呀… 我以後都見唔到佢喇…」但林志偉仍然好唔想心開始想喊。
「我明… 但有d野我地係改變唔到…只可以接受現實。我相信佢都好唔捨得你，但佢都唔想你為佢唔開心…」敏繼續安慰。
「你知唔知呀? 我老豆過左身後，我身邊d朋友好似都有d怕左我咁，我覺得自己好似返返去小學果陣，無晒真心嘅朋友… 就連我阿媽，佢近排都越黎越少時間係屋企，有次我仲聽到佢好似同另一個男人講電話… 我估佢都好快有第二個男人唔要我架喇… 到時我就咩人都無得返自己孤伶伶一個…」但林志偉就越講越激動同傷感。其實佢覺得自己無晒真心朋友，唔係因為d人怕左佢，而只係單純佢自己唔再信任其他人，覺得個個人都係假同有目的。
「你唔好亂諗啦，你媽咪點會唔要你啫。就算佢真係遇到第二個，都唔代表唔要你架，相反你應該為佢開心有另一個人錫佢~ 而且你仲有我嘛，點會得你自己一個呢?」敏有d心痛咁講。
「敏，你真係愛我唔會扔低我一個?」林志偉流住眼淚咁問。
「當然啦傻瓜~」阿敏就摸左一摸林志偉個頭笑住咁講。
林志偉之後就攬實阿敏然後錫落佢個嘴度。阿敏攬返實佢，而嘴唇亦努力回應著。之後林志偉隻手開始唔規矩伸左入佢件衫度。
「偉呀，唔好啦...」阿敏震左一震就開始阻止佢。
「點解? 我地都一齊左咁耐，你知我一直都好鍾意你… 你係咪呃我其實根本唔係真係鍾意我?」林志偉又好似開始有d情緒失控。
「點會呀… 只係我唔想咋…」阿敏焦急地解釋。
「你唔駛呃我喇… 我知，反正你地個個最後都會走扔低我，唔緊要你走啦，反正都唔爭在…」林志偉開始崩潰。
「唔係咁架…」阿敏好擔心林志偉。
「咁你証明比我睇? 敏，我真係好需要你… 你比我唔好離開我啦…」林志偉攬實阿敏講。
阿敏陷入左掙扎，但當佢見到林志偉崩潰嘅樣，佢唔忍心再傷害佢拒絕佢，佢想話比佢知自己真係愛佢，會一直陪住佢包容佢。於是佢無左拒絕，然後主動吻上林志偉。
然後係天上嘅我見到林志偉邊錫個嘴邊露出一個奸計得逞嘅笑容。
「佢係專登扮唔開心呃阿敏!」我忍唔住講。
「係咪覺得衣幕好似曾相識?」貓仙人問。
「唔同! 我係無心之失，但佢係處心積慮咁利用阿敏對佢嘅感情!」我咆哮道。
「你係覺得佢污衊左你類似嘅行為所以好嬲? 定係因為覺得阿敏比人呃所以好嬲?」貓仙人見我咁激動就問。
「我…唔知… 或者兩者都有d掛…」衣個問題考起左我，亦令我稍為冷靜。
「其實佢地一齊左咁耐，有衣d行為唔係都好正常?」貓仙人又問。
「但佢係呃阿敏扮失控，利用阿敏緊張佢同同情心…」我仲想指責林志偉。
「咁你覺得李思敏真係好唔願意? 佢對林志偉唔係真心? 其實佢地如果繼續一齊，衣一日遲早都避免唔到，話唔定咁反而令佢地感情再進一步? 就好似你同你初戀女朋友有左關係後大家感情都完全唔同左架。」貓仙人繼續問。
「但呃人利用人感情就係唔岩…」我講。
「冷靜d先，我唔係想評論岩同錯，但你都要明白林志偉唔係真係完全扮，係佢身上發生嘅事真係幾不幸，亦令佢價值觀同性格大變。機心衣樣野好多人都會用，最重要係你咁快咁激動我驚你之後仲有排嬲….」貓仙人再講。
真正咁得到左阿敏，林志偉好滿足亦對阿敏嘅戒心稍為緩解。而初嘗禁果嘅佢對此亦樂此不疲，加上佢個人本身就霸道底，所以之後仍經常要求阿敏同佢上床。而敏雖然係衣方面似乎比較冷感，但林志偉之後對佢態度上嘅改變亦令佢開心。既然已經有左第一次，佢都唔介然再有第二三四次，佢只係希望透過自己可以比到支持林志偉，比佢渲泄佢負面嘅情緒，所以佢之後都好順林志偉意，只要佢開心，佢自己都會開心。
不過過左幾個月後，林志偉再次受到人生嘅打擊。
因為以為林太有第二春但又見佢一直無講，所以有日佢決定親自去一探究竟。佢偷偷係佢阿媽部電話裝左個追踪apps，然後有日自己稍為得閒就偷偷跟踪佢打算偷睇下衣個新歡到底係何方神聖。點知打開app一睇，發現佢媽咪嘅位置竟然係時鍾酒店。佢初初以為林太係驚佢尷尬所以約新歡爆房，但之後佢又覺得唔太對路。因為個半鐘後佢阿媽只係單獨咁出返黎，照計佢就算避忌都無需要避忌到咁嘅程度。於是佢無叫到林太，而係繼續觀察佢之後去邊。結果發現佢之後去左另一間時鍾酒店，然後又stay左個幾鐘先出返黎，仲一臉倦容… 衣個時候再蠢都估到發生緊咩事…
林志偉好嬲，佢完全接受唔到衣個事實，於是佢打左比阿敏。
「如果有日你發現你阿媽去左做雞咁你會點?」
阿敏好驚訝亦唔唔知點答。
「原來一直我都係靠佢衣d污糟錢生活… 我真係接受唔到…」見阿敏無反應林志偉又講。
「我諗你媽咪都係逼於無奈先會咁做，佢都唔想架…始終你地都要生活費用，佢又無做野咁多年根本唔會搵得多錢…」阿敏嘗試幫林太解釋。
「所以比著你係佢，你都會咁做?」林志偉反問。
「我…唔知…」如果真係無晒錢又仲有個仔要養，自己會唔會行到去衣一步? 阿敏唔敢100%講唔會。如果係自己一個還好，但仲有個仔…又有邊個可以忽略母愛嘅偉大?
但林志偉唔明白，而阿敏嘅答案無疑深深咁刺痛左佢，霸道又大男人嘅佢接受唔到自己最親蜜嘅兩個女人竟然原來都會因為錢而出賣自己身體。
「不過如果你想做，你要好好練下自己嘅反應同技術… 唔係可能都無人肯幫襯你…」然後怒火掩蓋左佢理智，開始亂咁講野。
聽到林志偉嘅說話，阿敏呆左完全比唔到反應，只係不停諗自己係咪聽錯左d咩。
「你…咩意思?」佢艱難咁問。
「我話如果你想做雞，要比心機練好d自己嘅技術同反應，唔係成條死魚對方好似姦屍咁，無人會幫襯你!」林志偉講得更白。
「林志偉!」自己嘅男朋友竟然講衣d說話，阿敏已經忍唔住自己嘅淚水。佢好傷心同痛心，但同時亦發現當自己為對方付出一切嘅時候，對方原來對自己一直都咁不滿…
「臭雞!」講完衣句，林志偉就氣沖沖咁cut左阿敏線。
阿敏好傷心，同一時間佢亦好擔心林志偉，驚佢唔知會做d咩傻事，不過就一直打比佢都無人聽。
好彩第二日林志偉主動搵返佢仲同佢講對唔住。體諒佢當時太難過嘅阿敏無再講d咩，然後兩個人就好似無事咁又繼續一齊，不過阿敏發現林志偉自此竟然就無再掂過佢。阿敏初初好驚林志偉唔再愛自己，但見佢除左衣方面外其他都無咩變化，所以慢慢都放左心，反正佢本身都唔係特別享受性衣樣野，一直都只係想氹對方開心先任對方去掂自己，亦因為咁林志偉先會嫌佢好似死魚咁，所以衣家咁阿敏反而樂得清閒。
點知過左幾個月後有日林太突然好心急咁打比佢，話林志偉比人拉左，有人要告佢強姦。