因為EX 我成為左一個禿頭嘅毒撚 然後遇到一隻猫: 59. 神仙茶

林志偉個人雖然霸道，有d大男人，但睇得出佢係真心鍾意阿敏，對阿敏亦一直好好，而阿敏亦越黎越投入段感情，全心全意對林志偉所有野都以佢為先。衣點阿敏其實一直都無變，同佢相處得耐你就知道佢絕對係一個凡事以對方為先嘅好老婆。所以一齊後佢地兩個相處得都好開心同甜蜜，創造左好多美好回憶。
 
直至幾年後一件事嘅發生。
 
「老婆，志偉，你地快d黎幫我試下衣隻果茶?」
 
鏡頭一轉，天上嘅我見到有日林志偉老豆放工後拎左一大箱不知名果汁類物體返黎後講。
 
「咩果汁黎架? D味淡得黎有少少怪喎…」林志偉立刻開左支黎試然後伸左條脷出黎講。
 




「衣隻果汁叫神仙茶，係由一種叫神仙果提煉出黎，話好有益架，特別係對女人，抗氧化效果好好。老婆你飲多d包你越飲越後生，而且佢仲可以防癌同防便秘。志偉你近排成日係廁所咁耐，如果去廁所唔順就飲多d啦~」林志偉老豆信心十足咁介紹道。
 
「咁犀利? 咁等我飲多d先~」愛靚係人嘅天性，聽到可以返老還童，林志偉阿媽自然立刻拎左幾支返廚房飲。
 
至於林志偉，佢近排係成日喺廁所好耐，不過就唔係因為便秘，而係解決另一種需要。因為雖然佢同阿敏已經一齊左唔短嘅時間，亦曾經表達過想同阿敏更進一步合而為一嘅意願，不過阿敏並無答應，而佢亦唔想逼阿敏，所以就只可以一直自己係廁所玩下手作仔。當然衣d野佢唔會同佢老豆講，所以就尷尷尬尬咁應左聲然後扮晒野拎左兩支神仙茶返房。
 
林志偉屋企本身雖然唔算有錢，但都算係小康之家，佢父母亦都好錫佢，所以先可能養成左佢相對霸道，想要就一定要得到嘅性格。雖然佢細個成日比老師罰令父母生氣，但一家人相處一直都好融洽。當時無人會諗過有一日衣個家會因為衣支神仙茶而發生巨變。
 
因為太難飲本身自己又唔係真係有便秘問題，所以林志偉好快就無再飲衣隻野。至於佢媽咪為左靚，一開始都日日飲，但慢慢佢就發現不單只自己無後生度，塊面仲開始越出越多粒粒。佢當然立刻質問佢老公啦，仲問佢會唔會比人呃。
 




「唔會啦，好多人試過都話正架~ 你睇下衣d相，個個皮膚咁好咪就係因為飲左佢囉~ 衣個女人五十歲架喇，睇落係咪唔似? 我幫你問過喇，出粒粒係因為身體有反應開始排毒，你個人本身太多毒素所以要排出黎。出完d粒粒謝左皮膚就會好架喇，你繼續飲唔好半途以廢呀~」林生解釋。
 
不過之後林太塊面並無如林生所講慢慢好轉而係繼續惡化，所以任林生點氹林太都唔肯再飲。但雖然佢地無人再飲，但林志偉就發現屋企越儲越多衣d神仙茶。
 
「衣家都無人飲，你仲買咁多返黎做咩?」林太忍唔住問。
 
「你虛不受補啫，仲有大把人當佢係寶! 我入左好多貨黎緊會散出去~ 賣晒後我地就夠錢換間大屋喇~」林生又解釋道。
 
「得唔得架… 你因住比人呃呀…」林太就表示懷疑同擔心。
 




「一定得!」林生仍然十分自信咁答。
 
因為相信老公，所以林太都無再講d咩。然後林生慢慢就將衣份兼職當正職，朋友當客仔。不時都會叫d親朋戚友上黎食飯然後sell佢地買d神仙茶。初初林志偉都唔覺有咩野，但慢慢上黎嘅人開始越黎越少同生保，然後有日林生仲開始叫佢同林太配合講試過效果好好。
 
「敏敏… 近排我覺得我老豆越黎越唔妥…」林志偉越黎越覺得唔對路所以有日同阿敏講。
 
「佢仲係咁叫人試同買佢支神仙茶?」作為林志偉女朋友，阿敏當然亦有試過衣支野，亦好快放棄左。
 
「係… 衣家我屋企放到成屋都係不得只，佢琴晚仲叫我同阿媽配合佢講大話… 以前佢唔會咁架，佢唔會講大話呃人…」林志偉擔心地講。
 
敏:「咁你有無問佢點解要呃人?」
 
「有… 但佢就話我地唔係呃人，因為支茶好真係多人試過有效，只係咁岩唔岩我地…」林志偉答。
 
「你地要小心d喎… 我之前聽衣排好興果d傳銷，利用層壓式推銷咁去逼人賣野同賺錢…」阿敏諗起前排睇過篇新聞講傳銷所以提出提醒。




 
「死喇… 咁可能真係…. 初期我見老豆應該係賺左d錢，所以仲送左隻錶同遊戲機比我媽咪同我。但近排我覺得佢有d 失常，又好似成日都好大壓力咁…」林志偉聽到阿敏講嘅野後心入面更加響起警號。
 
只係作為一個中學生，林志偉可以做嘅野始終有限，只可以善意提醒下佢老豆，但佢老豆就只係叫佢唔駛擔心，專心讀書就得。然後再過一段時間，佢發現佢老豆原來已經泥足深陷。
 
「表叔?」有日林志偉應鈴聲開門見到佢老豆嘅表弟。
 
「偉仔，好耐無見，我黎搵你老豆架。」以前表叔見到林志偉會笑同埋摸下佢個頭，但今日林志偉感受到佢心情並唔好，然後就見佢入左佢老豆房搵佢。
 
隔左陣佢就聽到入面開始鬧交，仲越鬧越大聲。
 
「林釗你到底幾時還錢? 一次又一次，然後一個月又一個月… 初初你又話好快攪掂? 你係咪比人呃呀? 定係想呃晒我地d親戚? 唔好以為我唔知你仲有問其他老表借錢呀? 而且你連份正職都無埋，點還? 真係靠你果d飲到人上癮嘅神仙茶?」
 
原來因為秘撈影響左林生嘅工作表現，佢又成日煩住自己d同事去sell 佢d神仙茶，所以公司最後忍唔住決定炒左佢。而佢無左份正職，之後就只可以更加訓身去攪佢檔神仙茶，偏偏前排衣支神仙茶比人發現佢加左可卡因會令人上癮所以已經唔可以再賣，仲要打官司。林生無辦法下只好繼續搵其他野去sell，然後開始問唔同嘅親朋戚友借錢入貨希望可以翻生。由於無錢還又係咁想氹人落搭，慢慢佢連朋友同親戚都無埋…
 




 除左衣位表叔，林志偉發覺每日開始越黎越多人上黎搵佢老豆然後次次都鬧交收場。
 
「老公，你已經兩個月無比家用。你可唔可以唔好再攪你果d傳銷，正正經經搵返份工?」有日林志偉阿媽向林志偉抱怨。
 
「得啦… 我有分數…好快就攪掂架喇…」林志偉老豆又慣性咁答。
 
「得得得，你上個月都係咁講啦!」林志偉阿媽當然無就咁就收貨。
 
「下個月實比你啦，唔好嘈住我飲酒!」林志偉老豆就越黎越無耐性。
 
因為財政問題，一直信任林生嘅林太都越黎越不滿，本身相處融洽嘅家庭亦開始因為錢銀問題產生越黎越多嘅拗撓，林志偉發現自己的老豆老母因為錢銀問題而產生越黎越多嘅爭執，而以前和藹可親，對住自己成日面露笑容嘅父親慢慢亦變成左日日借酒消愁，唔係失控鬧人就係飲醉。