因為EX 我成為左一個禿頭嘅毒撚 然後遇到一隻猫: 10. 聯會營(一)

我地學校有個天文學會，而衣個學會每年都會以觀星為名，聯合另外兩個學會一齊攪個三日兩夜嘅聯會營，而果年嘅天文學會就咁岩搵左籃球隊同埋管弦學團合辦。至於點解果年會咁岩搵左衣兩個團體呢? 我都係聽Byran講先知。原來當年天文學會個會長因為同籃球隊嘅隊長一齊左，所以就公器私用搵左籃球隊。而當年嘅Bryan係天文學會嘅其中一個幹事，佢見搵左籃球隊就諗起我，於是佢就提議第三個團體搵埋管弦學團。咁岩當年籃球隊隊長又真係同管弦學團個團長幾熟，結果就一拍即合。而見事成後，Bryan當然立刻叫我參加啦。
 
「史德祖，你今日晏畫要請我食飯!」第二朝Bryan一見到我就對我大叫。
 
「咩料呀…」我不明所意以為Bryan又發顛。
 
「我制造左個機會比你同你女神，咁係咪應該要請我食飯先!」Bryan戚起佢個死人肥仔樣一臉得意咁講。
 
「講黎聽下?」不過聽到佢講嘅內容，我立刻態度一轉，因為我近排都為緊同Grace亳無進展而苦惱中。
 




Bryan:「今年聯會營我地搵左籃球隊同埋管弦樂團!」
 
我:「咁又點?」
 
Bryan:「咁你咪可以同Grace一齊去囉!」
 
「你覺得咁乖女嘅佢會去?」我提出質疑。
 
Bryan:「咁就要靠你自己喇，總知機會我就已經制造左比你，剩低嘅你自己都要努力做下野去把握架~」
 




「嗯…等我試下啦，如果佢真係去我就請你食飯~」難得Bryan講嘅野都唔係無道理，我都要自己努力下先得。
 
左思右想下，我決定今日放學早d返屋企碰下運氣睇下撞唔撞到Grace，結果當然係皇天不負有心人。
 
「咦，你今日咁早返屋企嘅?」Grace見我行緊去巴士站主動過黎問我。
 
「係呀，今日要早d返屋企幫阿媽做d野。」我胡亂作左個理由。
 
Grace:「哦，唔怪得啦~ 你近排點呀?」
 




我:「幾好呀… 你呢?」
 
「咪都係日日返學放學，然後又學一帶堆野或者補習囉…」Grace難得會展示佢累同煩厭嘅一面。
 
「你好似有d唔開心咁喎…」有少少驚訝嘅我問。
 
「嗯… 因為近排所有野都好似去左樽頸位咁停滯不前無進步…. 有時仲覺得可能退步左添…」Grace向我坦白訴苦。
 
「可能你日日都咁keep住太chur呀… 你有無興趣抖幾日去放鬆下?」於是我乘機問道。
 
「有呀，黎緊真係有個機會可以放低學琴同補習兩日~」點知Grace聽到我問題後突然提起返精神。
 
「點解嘅?」我問返佢點解。
 
「今年聯會營有管弦樂團份呀，所以黎緊有得去返個宿營玩下~」Grace有d興奮咁講。




 
「你竟然有興趣!?」我掩飾住內心嘅喜悅問。
 
「本身其實興趣不大，不過今年我地校際音樂節報左小組比賽，結果d組員話要一齊參加一路玩一路係入面練習下喎… 加上今年仲有籃球隊，話唔定我都有機會可以玩下嘛，所以就參加囉~ 你呢? 你會唔會去?」Grace解釋。
 
「梗係會啦~ 有得玩無理由唔玩~ 我最鍾意去宿營，仲可以由朝打波打到晚~」我即刻扮到一早報左名咁。
 
「咁就好! 可以多d識嘅人去應該開心d~」Grace聽到我會去佢都好似好開心咁。
 
我:「當然，我都好期待~」
 
Grace:「不過到時你記得帶多幾件衫喇~」
 
我:「點解?」
 




「費事你又整到自己成身茄汁無衫換啦，今次無得返屋企架喇~」Grace笑笑口講。
 
「車，上次都係為左你啫~ 話時話，你個MSN係真定假架? add左你後都無見過你online嘅…」諗返起上次嘅柒事我扮無野再乘機問Grace。
 
Grace:「係呀，基本上我都無咩點開。」
 
「唔怪得上次咁順灘同我比賽啦! 原來係假嘅…」我埋怨道。
 
「又唔好講係假，我唔點玩啫… 話唔定有日我突然想搵人傾下偈會online呢，總有機會嘅~」Grace繼續神秘莫測咁笑笑口答。
 
 
就係咁，兩星期後，我地就出發去左西貢個戶外康樂營。順帶一提，因為知我同Grace都會去，所以阿釗，阿偉，Mable都有參加今次個camp。雖然佢地唔係隸屬於合辦三個團體嘅任何一個，但其實本身聯會營都無硬性規定一定要係三個屬會嘅會員先可以參加，只係爆人數果陣會員會有優先權咁解。而係幹事Bryan協助下，要放佢地個名入去當然無難度啦。
 
聯會營嘅三日行程其實都算自由，基本上晏晝入到camp就先係比大家settle同三個團體嘅自己活動，到到黃昏就係Group Game同大食會。第二日主要係自己學會嘅活動，但又有個小session整d興趣班類嘅野比大家去唔同學會參與，到到夜晚就係BBQ同觀星。第三日最後一日當然係完全自由活動然後晏晝就會離營啦。
 




去到營地大家去完各自房間settle好後，我就去到籃球隊度報到，開始一d簡單練習。今次個聯會營total有30人參加，每個團體各有10個名額，而加埋阿釗阿偉Mable 三個就有33人。我練完波好快咁沖完個涼之後就到左Group Game環節。撇除hold game三個主持人，大會將我地分左5組，每組6個人，而我嘅組員有我，Bryan，釗，偉，Mable同Grace。
 
你係咪好想問點解會咁岩我地全部都編埋係同一組呢?
 
其實之前知道左個活動schedule後，我地幾個都有商量過點善用衣次機會，大家都覺得重點應該係放係第一日嘅group game同第二日嘅BBQ+觀星活動。而為左達成衣個目的，我被逼請左個仆街Bryan食左兩餐飯，然後佢話佢會主動認投幫手做分組工作再係所有分組活動入面都將我同Grace編埋同一組，所以結果就有左我地衣個組合。不過一睇衣個combination，我就知就算我唔請條PK食飯，佢都會照將我地全部人放埋同一組啦。
 
 
「衣個組合係我地隨機抽出黎嘅，希望大家好好認識你地嘅組員，唔熟嘅傾到熟，本身熟嘅就傾到更熟，因為係一陣嘅遊戲同埋聽日嘅BBQ你地都會以衣個組合一齊活動。衣家比五分鍾時間大家互相認識下先啦~」主持人哥哥講述。
 
「大家好，我係Bryan 梁子超，讀3A班，係天文學會康樂。身高148cm，重62公斤。興趣係…」Bryan一馬當先開始介紹自己。
 
「得喇得喇，無人有興趣知你個興趣。大家好我係Mabel，都係3A班。今次純粹黎痴camp玩，唔係三個學會嘅會員。」不過中途就比Mabel stop左。然後我地其他人都好快咁開始介紹自己。
 
「我係阿釗，同Mabel一樣。」
 




「我係阿偉，同阿釗一樣。」
 
「我係阿祖，籃球隊嘅。」
 
「我係Grace，黃可欣，管弦樂團… 我想問我地明明大家同班識大家，真係仲要咁介紹?」Grace帶點尷尬咁問。
 
「咁MC要求我地都要扮下野配合下嘅~」阿偉答道。
 
「同埋個分組… 真係隨機? 會唔會咁岩得咁橋你地全部一組呀?」Grace又滿有懷疑咁問。
 
「梗係啦，我地個分組絕對係專業公平同公正。所以只可以話我地真係有緣囉~」Bryan立刻衝出黎答。
 
「唔好諗咁多啦，難得我地可以一組~ 雖然同Grace你同班，但其實我地一直都唔多機會同你一齊玩嘅~」Mable亦幫手轉移視線。
 
「咁都係… 我都好開心同你地有機會認識多D~」Grace無再追問落去。
 
「好喇，大家都認識左大家之後，我地就事不宜遲開始第一個遊戲，超級無敵大電視~」這時MC宣佈遊戲開始。