因為EX 我成為左一個禿頭嘅毒撚 然後遇到一隻猫: 9. 約會(二)
「攪唔掂，只可以整淡d色咋，要返屋企先可以睇下洗唔洗得甩…」返到M記我同Grace講。
「都正常嘅，要用洗衣液同番皂先有機會。」Grace繼續帶點唔好意思咁講。
「你介唔介意一陣陪我返屋企換一換件衫先?」我把握機會主動問道。
「返你屋企? 會唔會唔係幾好? 一係下次再約?」Grace果然有猶豫。
「唔好誤會呀，我指我返去屋企換件衫，你係樓下等一等我唔駛上黎架。」唔想佢誤會我再解釋。
「咁好啦，但之後你仲想去邊?」應該因為內疚，所以Grace無再拒絕。
「一陣你咪知~」我懶係神秘咁講。
於是食埋個M記後，我地就一齊搭車向我屋企邁進。
返到屋企，我叫佢係我樓下等我一陣，然後當我係屋企換完衫，就順便係房拎左個籃球。
「我地衣家去打籃球~」我落返去同Grace講。
「下? 咁突然?」Grace 一臉驚愕。
「唔突然呀，你唔係一直鍾意打籃球? 放心啦，我地去射下波啫，唔會整親隻手嘅。」我為左安佢心講。
其實係之前plan今日行程果陣我已經有諗過可以帶Grace去打籃球，始終佢有講佢本身好鍾意籃球，只係驚再整親先無再打。如果我可以同佢去打下籃球，佢應該會好開心? 不過再諗諗下，一來拎住個籃球有d礙眼，二來唔知佢果日會唔會著裙，但預先叫佢唔好著裙又好似有d怪，所以再考慮左陣最後都係放棄左，諗住帶佢去冒險樂園玩下，因為我估佢應該好少去衣d遊戲中心玩。不過岩岩諗起如果返屋企我就可以拎籃球，而佢今日又咁岩只係著牛仔褲而無著裙，所以就臨時改變左我個原定計劃。
去到屋企附近個球場，好好彩仲有半個場未有人，所以我地就可以獨霸晒成個籃球架。
「射幾球睇下有無生疏到?」我將個籃球拋左比佢。
佢接住左之後猶豫左陣，但好快就係原位射左個波出去，不過個波撞框彈出。
「再黎?」我執返個波再傳左比佢。
佢今次一接到好快就射左出去，籃球應聲入網。
「Yes!」從佢嘅歡呼聲中聽得出其實佢真係好鍾意籃球。
「入左就唔好比佢停，再黎!」我又將個波傳比佢。
於是之後我就做左執波仔不斷咁執波然後將個波傳比佢繼續射。而見佢後期越射越有信心，我又提出左個建議。
「有無興趣報仇?」我帶著點挑釁嘅語氣問佢。
「又想恰我? 我先無咁傻呀~」不過佢諗左一諗就拒絕左。
「你入一球當兩球，大家一齊係key射十球，點?」而我當然早就估到，所以再向佢拋出左個餌誘。
「咁益我? 如果我入多過一半你就輸硬架喇喎~」Grace聽完後果然心動。
「咁咪當我輸囉~」我無所謂咁縮一縮膊頭講。
Grace:「今次賭咩先~」
我:「嗯…你有咩提議?」
Grace:「無呀，你提議你諗啦~」
我:「你贏，我幫你實現一個我能力範圍內嘅願望。我贏，你就比你電話或者MSN我?」
之所以提出個咁嘅建議，前者係因為我想知Grace會提出咩嘅願望，佢會唔會都想襯機同我close d? 後者自然係想同佢容易有多d溝通啦。
「好呀，殺你~」今次佢完全無猶豫就答應左。
於是我地嘅第二輪比賽好快就展開左，不過今次Grace話要我射先，佢再追住我打。結果我不負眾望十球入左八球。而佢因為Key比較遠，十球只係入左四球，所以我地係打和。
「打和咁點計呀?」佢有d唔滿意咁問。
「一係當我爭你一個願望，你比你電話我?」衣個其實係我最想要嘅結果，因為兩樣對我追佢都會有幫助。
「唔得! 一定要分出勝負!」不過好勝嘅佢並唔願意。
「咁一係一球定勝負喇，你射入就你贏，唔入就我贏。比你決定戰果?」沒法下我又再提議。
「雖然對你好似有d唔公平，不過就咁話啦~」Grace笑住口咁表示認同。
於是我就係咁輸左衣個比賽。
「好野! 有人差我一個願望~」佢好開心咁講。不過我相信佢開心唔係因為我個願望，而只係單純因為佢贏左我成功報仇。
「咁你想要咩願望?」但我循例上都係要問。
「未諗到喎，諗到再話你知~」Grace笑住講。
「哦…」雖然早已經預左，但見佢無點放係心，我都係有少少失望。
「好啦，夜喇，我都差唔多要返屋企喇。」而天色亦話比Grace聽佢差唔多要走了。
「咁我送你去搭車啦~」我把握見到佢嘅每分每秒。
「唔駛啦，我個車站好近咋嘛，你快d 返屋企啦。」但佢拒絕左。
「咁好啦…」見佢拒絕我驚自己意圖太明顯都無堅持。細個追女仔都好似係咁，總係比人講兩句就想縮。
Grace:「Byebye~」
「拜~」
不過當我轉身開始慢慢行返屋企果陣，又突然聽到Grace係後面叫我。
「阿祖，多謝你呀，我今日玩得好開心~ 為左多謝你，嗱，比你啦~ Byebye~」 當我回身時佢將一張紙仔塞左入我衫袋入面，然後又急急腳咁走左。
“[email protected]”
我打開一睇，發覺係一個email address，我估佢應該比左佢個MSN我。而因為衣個email，我仲知道埋佢嘅生日日期添。
返到去我第一時間就係開電腦add佢，不過佢個account就一直都無on過line。而好快我就意識到佢當日點解咁順攤肯同我比賽，因為佢根本就唔點玩MSN，所以就算輸左比我佢都無咩所謂，我好似又中左佢計…
於是我地第一次約會，就係悲傷，攪笑同開心嘅交織下完結左。
喬遷那日打掃廢物家居仿似開戰
無意發現當天穿返學夏季襯衣
奇怪卻是茄汁污垢 滲在這襯衣 布章外邊
極其大意 為何如此
想那日初次約會心驚手震膽顫
忙裡泄露各種的醜態像喪屍
而尷尬是快餐廳裡 我誤把漿汁四周亂濺
駭人場面相當諷刺
你及時遞上餐紙 去為我清洗襯衣
剎那間身體的觸碰大件事
今天看這段歷史 像褪色午夜殘片
笑話情節 此刻變窩心故事
現時大了 那種心跳難重演
極燦爛時光一去難再遇上一次
「點解背景突然有粵語殘片嘅音樂嘅?」漂浮係空中嘅我突然聽到Eason首歌所以問。
「無，見首歌好似幾適合你咪播比你聽下囉…」貓仙人目無表情咁答。
「頂…衣首歌真係經典黎…根本就係我同Grace嘅主題曲…」不得不承認衣首歌真係太應棍。
貓仙人:「所以衣家做背景音樂就岩晒喇。」
「話是話，又話去唔到嘅平行時空嘅? 點解變左重溫我同Grace以前嘅點點滴滴架? 咁同本身有咩唔同?」醒起我係度嘅目的所以我問。
「有d故事要一氣呵成咁睇你先明，同埋一次過睇之後就唔駛翻睇咁多次嘛，繼續啦。」貓仙人解釋。
「不過頭先睇返當日嘅情境我先突然諗起，如果當日d茄汁唔係噴落我度而係噴去對面阿Grace度，咁都幾大鑊…」突然我忽發其想。
貓仙人:「事實上係真係有衣個平行時空，不過果度無我想比你睇嘅野，所以唔會帶你去。」
我:「真係有? 咁唔駛問之後我同阿Grace都唔會再有可能啦…」
「唔好再講廢話喇，下面又去到另一段你地難忘嘅回憶喇。」貓仙人開始有d不耐煩。
衣次約會過後，雖然大家關係好似又拉近左，但其實之後都係返返去之前咁，大家都係無咩交匯，直至兩個月後，到左學校一年一度嘅聯會營。