因為EX 我成為左一個禿頭嘅毒撚 然後遇到一隻猫: 11. 聯會營(二)
其實大電視無咩特別，因為我地五個本身就默契十足，所以雖然Grace並唔係太投入，但我地都能夠取得勝利，當然當中嘅笑料都足夠令Grace開懷大笑一番啦。
之後嘅遊戲係刨西瓜，每隊各自有半個大西瓜，每個隊員有一個匙，最快清左個西瓜果隊就為只贏。係冬天食個涷西瓜都幾係野，不過衣個遊戲其實鬥嘅可能只係睇下邊組最多男仔，因為女仔多數比較有禮儀個口又細，幫唔到咩手。所以為左贏，我地好快就叫兩個女仔離開戰場，然後我地四個男仔就索性扔開隻匙羹，輪流直接用口一野刨落去，咬緊同吞嘅時間就比另一個繼續刨。最後雖然我地衣個做法又核突又唔衞生，仲攪到自己個個成身都係西瓜汁，但最後我地都憑住我地嘅勇氣同併勁再下一成。
完左後我見到Grace望住我個樣偷偷笑左幾下，我估佢應該係諗起我上次茄汁事件都係咁上下，唔知點解見到佢係度偷笑我自己都有d開心，或者可以令佢笑已經係我人生其中一個重要目標。
到到第三個遊戲，係二人三足，兩個人將各自一隻腳綁埋一齊，另外隻腳就會綁上一個氣球。遊戲就係要大家踩爆其他人個氣球，五分鐘後仲有氣球無比人踩爆嘅就為之贏。
係衣個遊戲設定下，好快我嘅組員就醒水自動分組，阿釗同Bryan一組，Mabel同阿偉一組，剩返我同Grace自然就要一組。
「嘩，綁埋左一齊後真係有d難行喎…」將我嘅左腳同Grace嘅右腳綁埋一齊之後，我地試行左幾步然後Grace講。
「嗯… 其實我地變做一個整體就會易d，你介唔介意我地互相搭住大家膊頭咁行?」我提議道。
「唔介意呀，試下?」
Grace好大方仲率先將隻手放上左我膊頭，於是我都將我隻手放左係佢膊頭，果刻我個心其實跳得好快，仲發現原來女仔個膊頭係好細。
「咦，真係差好遠喎!」之後我地再試行幾步Grace發覺真係順暢左好多。
「因為搭左膊頭我地會感受到對方點旭然後自動調節。如果我地加埋講一二一二代表左腳右腳會仲有默契添~ 我地試下一就代表行綁住左隻腳，二就係另一隻。」
之後我地越行越順，而比賽亦都正式開始。不過就咁行同真係要係比賽一邊避一邊踩人地個波係完全兩回事，因為你唔會再咁冷靜去留意大家點行。我同Grace一開始就夾好左我地只係專注防守，然後等其他人自傷殘殺，因為實會有好戰份子去主動進攻，我地只要坐享其城就得。事實上衣個戰術都好成功，我地好低調咁企埋一邊﹐一有人埋黎就走，然後就睇住其他人互相攻伐，好快場上剩低嘅人數就越黎越少。不過當少到某個數，我地就無得再避，因為越黎越多人走去我地果邊。
「無辦法喇，我地都開始進攻啦。我負責攻，你負責守!」我大叫道。
我講完後就開始踩去人地D波，不過係踩爆左兩個人地嘅波後，我自己果個都不幸被敵人臨死前嘅反擊踩爆左，即係如果Grace果個都比人踩爆埋我地就會輸。不過衣個時候其實場上面已經得返三pair隊伍，就係我同Grace，Mable同偉，仲有另一pair其他人。大家都係你眼望我眼唔敢輕舉妄動。
我同阿偉交換左個眼神，然後大家都一齊衝去另一pair果度。所謂雙拳難敵四手，雖然果pair好努力咁避，但係我地夾擊下都成功踩爆到佢地兩個其中一個波，但同時間阿偉果組僅餘嘅波亦比佢地踩爆返，結果得返我地兩組人係場上。我地互相試探，不斷左閃右避又間中會黎一個突擊。不過就係對方一次突擊，Grace 一時心慌想避嘅時候一個失足跌落地下，而我見到咁嘅情況因為驚佢會跌親，所以第一星期就抱住左佢然後自己用背脊落地做左佢嘅人肉護墊。
「哎吔!」
「你有無事呀?」雖然好痛但係我都好心急咁問阿Grace。
「無呀，你…呢?」佢係驚恐中打開返眼問，然後發現自己原來正壓左係我身上面，同我面對面好近距離咁大家望住大家。
佢面一紅然後好尷尬咁立刻起身，再講左句”對唔住呀”。
「傻啦，我無事，係少少痛啫。」我見佢起身我都好快起返身然後講。
而係我地跌低衣段時間，對手梗係無放過我地立刻踩爆左我地個波，而周圍嘅人見到我同Grace有嘅親密接觸，都不斷發出唔同嘅開汽水聲，令我地兩個更加尷尬。所以之後嘅遊戲同大食會，Grace都有意無意咁有少少避開左我。係有d可惜，但都只好無奈接受，始終唔知點解中學時期係好介意比人笑衣d野咁。
到到第二日，我照常參與返籃球隊嘅練習，Grace 就去同佢小組d組員練習，至於Bryan同另外三個，我本身都唔知佢地去左邊，但衣家就係天上面睇到佢地去左參與天文學會嘅活動同埋預備今晚BBQ再加觀星嘅野。
轉眼間好快就到左BBQ嘅時間，我地六個就仔仔一堂咁圍住左個爐開始燒野食。因為過左日好似已經無人再記得我同Grace琴晚嘅事，所以Grace都無再特別迴避我。而透爐衣d野當然難唔到我地幾個男仔，好快個爐就燒到冚冚聲。
「係呢阿Grace，雖然同你一班，不過平時都無咩機會同你傾偈，你平時有咩嗜好架?」當大家開始圍埋燒野食果陣Mabel主動問道。
「無咩特別呀，平時都係學畫畫，鋼琴同小提琴，跟住又要補習，有時間我都鍾意睇下書嘅。你地呢?」Grace平靜地答道。
「我因為無你咁多野學所以平時好得閒呀，d時間都係玩多， 睇下電視打下機煲下劇咁~ 不過近排我愛上左打排球~」Mabel答道。
阿釗:「我有學柔道，但平時都係睇下漫畫動漫同打機多~」
阿偉:「我阿媽細細個就要我練水，然後我又鍾意踢波，其他時間都係打下機睇下書咁~」
「你睇你地個個都掛住玩，幾無深度? 我呢…」Byran見個個講完終於到自己就開始講。
「咁Grace你會唔會覺得好悶呀? 日日都係學野同補習…」不過Mabel無等Byran講完就中途腰斬左佢。
「都唔會嘅，我都鍾意音樂同畫畫~ 每次拎獎同埋上到級我都好開心架~ 而且我父母都唔係死逼爛逼我果d，間中都會比我抖下嘅~好似今次camp咁佢地都好讚成我參加下衣d活動，學習下social skill。唔係嘅話幾鍾意都好有時都會悶同厭，總可能弄巧反拙退步添…」講到尾果部份Grace偷偷望左我一望，然後我先醒起去camp前我好似都曾經同佢講過類似嘅說話。
Mabel:「咁都好d… 好彩你父母都開通~」
之後大家開始閒談下平時班入面d八掛野，大家都friend左唔少。事實上今次camp後，Grace同Mabel慢慢就成為左好朋友，之後仲做左大家嘅閨密，直至Grace同我分左手…不過果個都係後話喇。