因為EX 我成為左一個禿頭嘅毒撚 然後遇到一隻猫: 8. 約會(一)
「我都話你係挑戰緊不可能任務架啦，衣家真係比人請食檸檬喇!」我將我地嘅對話講完比幾個死黨聽後，阿釗立刻寸我。
「所以你地都覺得佢係知我鍾意佢所以想暗示叫我死心?」我帶住失望咁問。
「都九成九啦，唔係佢唔需要無啦啦咁講出黎。」阿偉表示認同。
「唔緊要架阿祖，失戀咋嘛，你仲有我地~」Bryan突然攬住我好似想安慰我咁，但佢個樣完全係一副幸災樂禍嘅表情，好似好開心有人繼續陪佢做單身狗咁，令你想狠狠咁打佢一鑊。
「其實都未必係咁嘅，阿祖你唔駛過份解讀。首先，佢個message只係講佢唔會係大學前拍拖，無講過唔會鍾意你。可能佢另一個意思係，你想同佢一齊就要等到你地讀大學先?
其次係佢仲肯同你出街，某程度上代表佢至少唔係討厭你先，而每一次出街其實都係一個陪養感情嘅機會。
最後，阿祖如果你真係鍾意佢，唔通就係因為佢一句說話你就會放棄? 女仔係要追架嘛，佢雖然咁講啫，但點解你唔可以諗下或者你可以令到佢都鍾意你然後忍唔住打破自己個約定同你一齊? 反正唔行動就一定無機會，咁點解唔努力嘗試下打破宿命? 至少你要比佢知道你嘅好，比衣個選擇佢揀。」Mabel見我聽完其他人講後一個死老豆咁嘅樣，突然講左一大段野去安慰同鼓勵我，而佢所講嘅野確實每一句都振奮到我。
「果然都係青梅竹馬最好~ 阿祖，你要記住永遠最愛你對你最好嘅係邊個呀~」Bryan立刻用佢把賤聲取笑Mabel。
「痴線! 我係唔忍心見阿祖好似奔喪咁嘅樣先鼓勵下佢咋，你唔好係度亂咁up! 」Mabel臉帶點紅然後一掌打落Bryan手臂後講。
「好痛呀男人婆! 我都係講下笑啫，你咁樣邊有人敢要你呀! 阿祖我收返頭先講嘅野喇，你要記住全天下嘅女人死晒你都唔好揀佢呀，唔係實有日比佢打死架!」Bryan立即掩著手臂一邊逃走一邊埋怨。
「仲亂講野呀? 你理得我~ 我有鍾意嘅人果陣自然唔會咁對佢架啦~」看見Bryan好痛嘅反應Mabel好滿意，塊面都無再紅。
「多謝你呀Mabel。你講得好岩，我無理由咁就放棄，至少都要努力過先得!」我雙眼回復返神彩咁同Mabel道謝。
「我識嘅你本身就好有自信唔會咁易放棄架啦，我知你都係一時諗唔通先咁頹架啫~」Mabel向我豎起左佢隻手指公。
「明知道結果都仲要去，唉~ 何苦呢… 」阿釗沒好氣咁講。
不過我無再理佢，因為我心入面已經暗暗落左一個決定。
(黃可欣，如果你同自己講過入大學前都唔會拍拖，我史德祖就偏偏要令你鍾意我然後打破自己嘅誓言!)
果陣嘅我心入面真係好有火。
不過有火其實又唔代表到d咩嘅，因為以追女仔黎講，火可能係最唔需要嘅野，相反食腦同運氣先係最緊要… 而事後諗返，好彩我好似兩樣都有~
雖然當時嘅我並無拍拖或者追女仔嘅經驗，不過我覺得有時d野都唔駛諗得太過複雜。我嘅目標好簡單，就係比佢覺得我係特別嘅存在，同埋可以令佢開心。而當日嘅安排，亦都係向住衣個方向去構思。
由於讀書期間好少可以夜晚出街食飯，而Grace講佢果日朝早要去補習之後再出旺角買d野，然後佢就順勢用衣個原因同屋企人講自己之後順便同同學行下街先返屋企，所以我地嘅約會時間就只可以集中係中下午時段。本身我係諗住先同佢食lunch，之後再去睇齣戲，然後再加多個活動。不過當見面時，Grace話佢唔肚餓想遲d先食野。所以我就將次序調左一調，決定先去睇場戲然後再食野。
電影內容我當然係揀愛情戲啦，因為我希望透過電影可以刺激到Grace對愛情嘅幻想同追求。不過由於時間提早左又唔岩場數，所以我由本身諗住睇嘅<北京遇上西雅圖>變成左<被偷去的那五年>，結果就出事喇。因為衣套雖然係愛情戲，但絕對係一套催淚嘅愛情戲，就連本身好緊張成日坐唔定想偷望Grace嘅我，慢慢都被劇情所吸引，而當完場果刻，我見到Grace已經成面都係眼淚。本身諗住要令佢開心，結果一開波我就攪到佢喊…
步出戲院果段時間，我唔知講咩好，好驚講錯野或者刺激到佢嘅情緒，結果我地就完全無講過野咁行左去M記。之所以係M記其實都係Grace要求，佢睇戲前話因為平時無咩機會食，所以難得有機會想偷偷食下。所謂”男人一生，只為尋覓一個肯同自己挨麥記嘅女人”，果刻我嘅感覺同當事人一樣，Grace真係絕對”娶得過”。
幫佢買好餐放在係枱面，見佢一邊食一邊仲係悶悶不樂咁嘅樣，我心知不妙，知道唔可以再比衣個情況繼續。而正當我諗緊有咩方法可以氹佢笑令佢忘記頭先套戲果陣，我突然見到餐盤上有包茄汁，於是我腦海中有左個idea。
我:「Grace，你有無曾經試過見到包脹卜卜嘅茄汁，好想一野打爆佢? 」
「下? 無喎，痴線架咩，咁污糟… 」Grace 有d心不在焉答道。
「咁用下腦總有方法唔污糟嘅… 打落去果下感受住佢係入面爆開，種感覺其實好爽架，發洩一流~ 」我繼續講。
「你試過? 」Grace有d懷疑咁望住我問。
「你睇住喇~」
於是我用M記紙巾將包茄汁包實，然後深呼吸左一口氣之後，我就舉起右手一野揼落包茄汁度。
“噗!”
茄汁爆開同我隻手與枱碰撞嘅聲音同時響起。但不幸嘅係，茄汁並無預期咁全部係紙巾入面散開，而係唔知從紙巾邊條罅度爆左出黎，直射落我件衫度，結果我成身都係鮮紅色嘅笳汁…
如果777係柒嘅指標，咁當刻我相信我柒嘅程度係直達77777… 不過亦因為咁，我終於見到Grace由鬱鬱不歡變成笑容滿面，仲要係笑得好開心好大聲完全停唔到果隻。
「哈哈哈~ 你真係好白痴呀! 邊有人會咁玩架…」淚水再次從Grace的眼角出現，不過今次係笑到喊嘅眼淚。但佢個人都真係好好，笑到咁佢都仲一路笑一路拎紙巾開始幫我抹走身上嘅茄汁。
「終於笑返喇咩? 我為左令你笑返我先扮小丑咋~」為左掩飾自己嘅尷尬同柒，我好快就咁幫自己兜返。
「你真係為左氹我先咁…?」無諗過Grace竟然真係信仲好似有d感動咁。
「唔係我點會咁柒呀~」我當然繼續硬住頭皮咁直認不諱。
「傻瓜… 我無事呀，係套戲有d傷感咋嘛… 你唔駛咁犧性自己喎，你睇你件衫，都唔知洗唔洗得甩…」講講下結果攪到Grace反而有d唔好意思。
「可以令你笑返佢都叫光榮殉職嘅… 」我只好繼續講笑希望佢唔會介意。
「你快D入洗手間幫佢急救CPR睇下救唔救得返啦! 我唔想佢為我殉職呀…」好彩Grace都配合我接住講落去。
「係喎…好啦，咁我去一去洗手間先…」我都想盡量洗得幾多得幾多等自己之後唔駛keep住有個柒字係身。
不過當我起身打算去洗手間果陣，Grace突然捉住左我手臂。
「應承我，你一定要盡力救返佢…」佢一臉認真咁同我講。
「好，我應承你!」我輕輕拍一拍佢隻手，然後佢放開左隻手我就行左去去洗手間。
可惜一件白色恤衫再加笳汁，其實任我點洗都唔會洗得甩，最多只可以令佢淡左色，一切都係要等返到屋企有洗衣液先有得再試下。不過諗起返屋企，突然間我又有另一個idea。