那些被錯過的人: 中秋節（上）
「啪！啪！啪！」
門外傳嚟好大力嘅拍門聲，我開門發現係阿悠。
「嚇死咩？我以為收數佬呀。」
我阿爸曾經爭人好多錢，試過有收數佬上門。
爺爺最後幫佢還清哂，但同一個月就離開咗世界。
雖然幫佢還清咗，但阿爸毫無感恩之心，無耐阿嫲就趕咗佢出門。
佢好多嘢都留咗喺度，冇拎走。
包括我。
「我可唔可以入嚟？」
我未答，佢就已經行咗入嚟。
「我阿嫲去咗打牌。你嚟做咩？」
我望住佢身打扮，小背心配真理褲，真係殺死人。
如果少啲定力，已經撲咗埋去。
「你成日著咁少布咖？俾人睇蝕哂。」
「你唔鐘意？」
「剩係著俾我睇都可以嘅。」
答完之後，佢入咗我間房。
佢打開我衣櫃，係裡面拎咗件黑色衛衣，同埋一條黑色波褲。
我哋對望咗幾秒，佢突然除低條褲，我即刻用手遮住對眼。
「喂，痴線！做咩除褲！」
「我著返喇。」
我拎開隻手，見到佢著咗我條波褲，但同時我望到佢胸骨。
原來佢句「著返喇」，只係著返條褲。
佢連小背心都除埋，掟咗係我張床上面。
佢雙手套咗落件衛衣，準備著上身。
「你快啲同我著返衫！」
我衝埋去，用力將衛衣套落佢身上。
「咁樣滿意未？」
我條波褲係佢身上，變咗及膝。
件衛衣更加唔洗講，完美遮掩咗佢嘅身材。
「夠鐘喇，行喇。」
我望一望個鐘，原來已經8點。
係我屋企行過去，起碼要20分鐘，所以宜家就要出發喇。
「借頂Cap帽嚟。」
阿悠出門前仲拎咗我頂Cap帽。
續