那些被錯過的人: 中秋節（中）
9月22日，中秋節。
「哈佬，全叔。」
我哋落到大堂，見到保安全叔。
佢係唯一新年以外，都會笑口迎人嘅保安。
「哇，杰仔有女朋友喎。」
因為我同阿悠都係黑衫黑褲，所以俾佢呢個錯覺。
「拜拜喇全叔。」
「咦！原來係悠悠呀！」
阿悠走到全叔面前，除低Cap帽，全叔先認得係佢。
不過叫得咁親切，唔通佢哋好熟？
「衰仔！對悠悠好啲呀，如果唔係我唔放過你！」
「我哋同學嚟咖。同埋你點對付我呀？唔開門俾我？」
「哈哈！全叔你誤會咗喇，我哋咁啱見到，之後一齊去班會活動咋。」
「原來係咁。。咁你哋玩得開心啲喇！」
全叔一直捉住我手臂，直到解釋清楚，佢先縮開雙手。
不過我就未見過阿悠咁好笑容，而且我睇得出唔係扮出嚟。
「悠悠，你咁好笑容嘅？」
「食屎，唔好咁叫我。」
一秒間，佢由滿臉笑容，變返平時嘅西面。
「我細個嗰陣，全叔全嬸好錫我咖。」
聽到阿悠咁講，我先記起全叔已經做咗十幾年。
喺我細嗰嘅時候，佢成日都想攬我，因為覺得我好可愛。
當然，我細個已經識反抗，佢一行埋嚟，我就喱係嫲嫲身後。
「不過好耐冇見過全嬸。」
全嬸以前日日都會拎水果俾全叔食，仲會坐係全叔後面訓覺。
住同一棟大廈嘅人都知，而且都習慣哂。
「行快啲喇，遲到喇。」
我望一望手錶，已經8點半。
沿路上有好多情侶，大家嘅方向都係善翠公園。
阿悠只係默默跟喺我隔離，加上我哋著住「情侶裝」。
應該好多人覺得我哋係情侶。
「咁遲咖！」
老遠就聽到阿希把死人聲，我望過去，只係見到有四個人。
「咦？件衫。。」
阿希好疑惑咁望住阿悠，唔通佢認得出件衫係我嘅？今次真係唔知點解釋好。
坦白承認阿悠上過嚟？
定遮住佢把口打佢一身就算。
「呢件衫係我自己咖。」
「係囉，咁啱撞衫啫。」
「但係。。咁大件。。」
我直接推住阿希入公園，唔俾佢繼續講嘢，其他人就尾隨我哋。
中秋又好，聖誕都好，善翠公園都有好多人。
我哋人少，所以入咗最裡面。
個度冇乜街燈，所以人相對比較少。
沿途我不斷周圍望，但都見唔到諾曦。
坐底之後，我先仔細望吓有咩人，然後我發現阿彤同阿淇都嚟咗。
「咦！財政大臣同文書？你哋唔係食麥記咩？」
「去完喇，食個麥記都要聽佢係度講校規。」
「咁痴線？」
「係呀，仲幫大家簡好哂餐，坐低就謝飯禱，仲要叫Miss Wong分享，Miss Wong都唔知講咩好，剩係講咗句中秋節快樂。」
大家笑咗Miss Wong個反應，不過最估唔到，竟然都有10幾個出席。
呢班真係勇士。
「咁食完之後呢？」
「之後？食完仲唔閃呀？我一食完就拉住阿淇走喇。」
慢慢有其他同學加入，阿希就提議玩狼人殺。
而我係第一回合就俾人殺咗，坐出去之後發現原來係阿悠殺我，佢仲要對住我伸脷。
突然手機叮咗一聲，係一段訊息。
你係邊呀？[心心] 21:12
你係？21:13
搞錯呀你 明明晏晝先同你一齊 21:15
諾曦？21:15
係呀 你心入面得諾曦咋 21:15
睇到呢度，我估到係邊個。
晏晝我同諾曦Cathy一齊，唔係諾曦嘅話，只會係Cathy。
Cathy？玩嘢呀？ 21:17
估啱！錫啖先 21:17
唔玩喇 你哋係邊度? 21:18
我啱啱落車咋 你過嚟接我咪帶你去囉 21:19
唉 OK 21:20
等你 21:20
為咗見諾曦，我決定諗辦法離開呢度。
「喂咁多位，我行一行開先。」
我襯佢哋合埋眼嘅時候，拋低一句就走咗。
續