連環輪回不幸事件: 第十一章：夢境 (3)
「呢兩個字會唔會係幻滅？」
「幻滅？所見的幻滅，睇落唔多似。」Bosco Ban咗阿寶。
「幻滅...幻滅...會唔會係畫面？」黑仔問。
「似喎！呢句應該係＂請腦中想著XX所見的畫面＂。」Billy道。
多咗四個人，多咗四個角度，我哋就係咁估下估下，慢慢開始估到佢想講乜。
「吖！呢個會唔會係＂夢境＂呀？」如果迪迪無估錯，呢句說話就係＂請腦中想著夢境所見的畫面＂。
「似喎！」
「掂啊！我哋應該好快估埋剩返嗰啲！」
「夢境...有樣嘢我想同大家講。」黑仔突然轉話題。「大家仲記唔記得Andy同大家講佢有三個發現，仲用第三個發現氹大家落車？」
「記得。」我哋異口同聲回應。
「我仲記得比佢呃咗落車！」阿寶補充。果然女人都係方丈。
「其實真係有第三個發現，只係當時，應該話係直到而家，都唔知算唔算一個發現，所以當時冇同大家講，費事俾假希望大家，而呢個發現就係同夢境有關。」
「夢境？你想講我哋啱啱遇到嘅幻覺？」我問。
黑仔搖搖頭：「我指嘅係真正嘅夢，每次輪回前一晚大家所發嘅夢。我同Andy發現我哋都記得前一晚發過嘅夢，仲問過SK，佢都記得，而且佢個夢同Andy好類似。不過單憑咁，我哋都唔敢講算唔算係一個有用嘅發現，但如果呢個人講嘅說話真係有夢境呢兩個字，我哋嘅夢可能真係一個關鍵！」
「我都夢見有平原有湖嘅地方喎！」Billy道。
「咁睇嚟我哋大概可以分為三批人。」
黑仔所講嘅三批人，係根據大家夢境嘅相似度而劃分：
- 以大自然為主嘅人包括有Andy、SK同Billy；
- 以古式木製建築為主嘅有我、迪迪、Yoyo同Magnus；
- 以高樓大廈為主嘅有黑仔、Bosco同阿寶；
剩返TB同Kiki仲未知。
就算係同一類夢境，內容都有差異，好似Andy夢見嘅係樹林，SK、Billy就係平原加湖；Magnus係由屋內望出去，其餘三個都係屋外俯瞰；至於高樓大廈組就冇乜唔同，但透過形容高樓大廈，根本唔知佢哋望到嘅嘢其實有冇分別。
總之，交流得出嘅線索大概係咁，剩返嘅都係等我哋破解左嗰句迷一般嘅說話再算。
「我喺Deep Web搵到人幫手喇，雖然價錢唔重要，但估唔到咁平，私隱喺香港真係唔值錢。」Magnus道。
「大概要幾耐？」Bosco問。
「一般要四個鐘，我已經加咗錢，要求兩個鐘內完成，不過佢唔敢寫包單。」
「好，我哋趁呢個時候食啲嘢，之後繼續估埋剩低嘅字。」Bosco道。
時間一分一秒咁過去，慶幸憑著眾人努力，我哋大概已經解讀到影片所錄說話：
「要回到現實 請腦中想著夢境所見的畫面 然後——」
回到...現實？真係可以？而且方法明顯未講完，睇嚟一定要知道埋下半句先得。而家唯有希望叫醒大家，之後下次輪回再繼續估！
時間只係剩返三個鐘。
～第十一章完～