連環輪回不幸事件: 第十一章：夢境 (2)

「X回到XX。」
「呢度佢有停頓，應該係另一句。」
「嗯，跟住係：X老中XXXX所見的XX；之後就錄唔到喇。不過好彩有你提議，如果唔係連呢半句都無。」
「但估咗咁耐，連大概嘅意思都估唔到...」
「唔緊要啦，集思廣益，可能佢哋會估到呢！」
因為收到黑仔電話，知道Magnus暫時搵唔到Andy地址，所以我哋決定先返荃灣，再同大家從長計議。
好快就嚟到頭先間大快活。黑仔、Yoyo、Magnus、Bosco、阿寶同Billy已經坐咗喺度等緊我哋。
「Sor9。」
「Sorry。」
「對唔住。」




同一時間，我、Magnus同黑仔一齊道歉。
「唉，我先啦。如果我哋早啲諗到要錄，起碼都仲有個希望，而家得返半句，仲要未估到...」
「Sorry，我都係...」迪迪加入道歉聯盟。
「如果我搵到所有人嘅地址，至少都可以繼續輪回，繼續搵線索，Sorry。」
「到我啦。我應該一早要諗到，之前我哋一齊去調查嘅時候，你哋已經試過搵唔到個攤檔，我應該預計到攤檔會消失，呢個係我疏忽，對唔住。」
「喂，你哋成班戇鳩鳩咁喺度道歉都冇用架，知你哋有責任感啦！兄弟，放眼現在，諗下之後點做好過啦。」
「Billy講得啱，不如咁啦，Magnus你有冇辦法可以搵到其他黑客幫手，要俾錢都冇所謂，你明架啦！」Bosco道。
「可以，我試試。」
「我哋其他人先幫手估下，Keith同迪迪錄到嗰句說話係講啲乜，睇睇有冇幫助先。」
「Yoyo，雖然有的為難，但你可唔可以試下根據Magnus搵到嘅資料，試下喺附近搵下有冇人識佢哋四個，知佢哋住邊？」 




「...嗯，我而家去。」
「你哋...真係諗住救曬全部人？」阿寶突然一問，所有人霎時間唔識反應。
 
「如果Magnus搵唔到黑客，又或者個黑客搵唔到佢哋幾個嘅地址，咁你哋會點做？」得唔到回應嘅阿寶繼續問。
「我會繼續諗辦法，直到搵到佢哋為止！因為，呢個係我可以擺脫幻覺，返到嚟呢度嘅動力！」 我馬上回應。
「咁點解你唔諗下辦法救下Eric，救下Christopher，救返曬其他人！」阿寶大聲質問。
「我知道大家都唔想，冇辦法之下先咁……」迪迪辯護。
「當時情況根本冇可能救到佢哋，你覺得我哋可以點做？」黑仔反問。
「我唔知，或者可以勸佢哋停手，又或者...總之...總之我哋仲可以再諗辦法！點解你哋唔繼續諗落去！」阿寶嘅聲音已經哽咽。
「喂！你唔好無理取鬧啦！如果救到,唔通我哋——」Bosco嘅右手輕搭Billy左邊膊頭，借此打斷佢。




「我唔知當時我哋有冇辦法可以做得更好——」我搖搖頭，然後繼續：「唔係，我知我哋應該可以做得更好，正因為咁，我唔想再因爲我哋冇盡力而救唔到大家。而要盡力，一定要大家幫手！」
你我突然靜了。如果靜等多兩秒，我會尷尬致死，好彩阿寶都算係認同(?)咗我。
「我哋...睇下嗰半句係講咩。」
時間只係剩返五個鐘。