連環輪回不幸事件: 第十一章：夢境 (1)

「喂？」電話另一邊傳嚟黑仔嘅聲音。
「喂，Keith呀。我哋呢邊發生咗件事……」
電話開咗免提之後，我將呢邊發生嘅嘢同黑仔講返。
「最奇怪嘅係唔單止人，成個攤檔都消失咗，但側邊嘅人好似睇唔到咁，完全當冇事發生。」
「雖然唔知原因，但我諗係有人...或者係神改變咗路人嘅認知，令呢啲唔合理嘅事，喺佢哋眼中變得合理，我哋呢邊都遇到類似嘅情況。」
之後黑仔同我哋講佢同Yoyo遇到嘅事。
Magnus首先查到嘅係Bosco嘅地址，但好快佢哋就遇到第一個難關：點先上到去佢個單位？扮速遞之類嘅可以去到門口，但要入埋屋確保隻陀錶送到去Bosco手上就唔容易。估唔到喺呢個時候，Yoyo自告奮勇要同黑仔一齊出發。搵到Bosco隻陀錶之後，好快就到佢樓下，接通埋大廈對講機，之後神奇嘅事就發生喇……
「喂，Auntie，你好！我叫Yoyo，係Bosco嘅好朋友，本身今日約咗佢同另一個朋友睇戲，點知等極都唔見人，之前佢都試過瞓過籠唔知醒，打俾佢都冇人聽，唔知方唔方便我上嚟呢，順便我想放低啲上次去旅行嘅手信俾你。啊，仲有呀……」
之後Yoyo憑著稱得上為三寸不爛之舌，成功登門入室不特止，仲憑著出色嘅交際力，同Auntie有講有笑，完全唔似第一次見。彷彿變咗另一個人嘅Yoyo仲成功打聽到原來Auntie嘅認知係：Bosco尋日通宵工作，今日放假，所以由得佢瞓晏啲。
呢個同事實不符嘅認知，的確同我遇到嘅好似，似乎都係有力量改變咗佢哋嘅認知。




 
「呢個真係Yoyo？係咪有人假扮呀？」雖然黑仔仲未講完，但我真係忍唔住要打斷佢。我嘅印象中，Yoyo只會有限度咁參與討論，唔單止唔會積極同人交流，有時甚至覺得有啲消極。
「(細聲)我全程望住都唔係好信，(正常)但全靠佢，Bosco同阿寶先至可以喺我哋隔離。」
上得去，當然唔會就咁放低隻錶啦！本來冇期望嘅一試，估唔到竟然真係可以靠外力叫醒Bosco，當然有少少暴力啦。不過聽Bosco講，佢本來已經有啲懷疑身處緊嘅世界係假嘅，再加上「外力」推佢一把，佢馬上就醒覺醒返；而阿寶嘅情況大致相同，不過就冇咁暴力。
「而家我哋去緊Billy屋企，不過可能已經係最後一個。」
「吓？點解？」
「Magnus話部分人比較難搵，六個人有三個已經搵唔到，而家佢會試下搵埋Andy，之後會再試下用其他方法搵剩返嘅人，不過佢話唔太樂觀...」
「我哋會再努力，雖然有一半都錄唔到，但我哋都會試下解讀頭半句先，希望可以令大家都冇事。」
「好，Magnus有消息，我哋就再電聯。」
「我哋...要加油。」收線後，迪迪只係講咗一句，之後我哋就努力嘗試解讀呢半個最後希望。




呢半句大約有20個字，雖然我哋已經放慢嚟睇，但都只係估到六、七個字，仲要唔敢肯定啱唔啱。
而時間只係剩返七個鐘。