連環輪回不幸事件: 第十章：謎團 (3)

食完嘢，時間已經過咗三點，即係我哋仲有唔夠九個鐘。
但我哋仍然好耐心咁留喺大快活，望住面前呢個男仔用電腦。輕快嘅手指好似電視劇咁樣不停敲擊鍵盤，講真，好假，但，應該係真。
「其實我係黑客，如果有電話號碼，我諗，應該可以搵到大家嘅住址，到時我哋可以拎陀錶俾佢哋。呀，不過講明先，我係業餘咋，速度一定冇職業咁快。」十分鐘前，我哋聽到Magnus咁講都難以置信，但呢刻我哋都毫無懷疑。
再過左一陣，確實好似佢所講，速度真係冇職業咁快。唔係怪佢，但呢刻同之前啱啱相反，我哋冇嘅就係時間。
「你覺得我哋會唔會改變一下策略好啲？例如分批行動？」黑仔望向我。
「嗯，我同意。我哋一啲人去搵俾陀錶我嘅人，一啲就幫手執行Magnus嘅計劃。」
「如果係咁，我建議你同迪迪去葵興，始終你哋熟啲，我哋三個就留喺度。」
「好。」
「嗯！其他人就拜托你哋，我同Keith會努力！」迪迪講完，我哋就馬上起行。
 




前往葵興嘅途中，我哋唔同嘅話題都有講下，例如係中學讀邊間、屋企有冇兄弟姊妹等等，直頭有啲似Speed Dating，傾下傾下好快就到我哋嘅目的地——陀錶攤檔前。
我哋嘅目標好簡單，就好似玩獎門人啲遊戲咁，要憑口型估下究竟佢想講乜。
這一刻我心情好緊張，一嚟唔知搵唔搵到佢，二嚟就算搵到都唔知佢會唔會Keep住做口型，三嚟唔知我哋估唔估得到；如果估唔到，就會連最後一個線索都冇埋……
「你做乜企喺度唔過嚟？」的確企喺度擔心都唔係辦法，於是我決定直接行埋去攤檔。眼前仍然係嗰個戴眼鏡，身穿利記球衣，個樣似張敬軒，條頸掛住條佛珠嘅人。當我一行到去，原本好似靜止咗嘅佢，突然同我講嘢，當然仍然係冇聲啦。
之後嘅時間就係我哋專心咁玩獎門人，雖然好好彩，佢會Keep住做口型，但玩左好耐都毫無頭緒，連幾多個字都唔肯定，淨係知肯定多過30個字！
「你估到佢講咩？」突然我聽到迪迪輕叫一聲，瞪大雙眼，於是我問佢。
「唔係啊，我突然諗到，我哋可以錄低佢，再慢慢播，咁咪易估好多囉！」
「係喎，突然咁醒嘅你。」
「係不嬲都咁醒！」
喺我拎手機出嚟錄影嘅過程，迪迪不停叫我讚佢，令我忽然覺得，如果唔係喺呢個環境，平時嘅佢應該都幾可愛。




我望住部手機大約錄咗五秒，突然畫面中嘅主角消失咗。你冇聽錯，係消失咗。
我唔知應該俾乜反應，只係擰轉頭，望一望迪迪，好似想確認一下我哋係咪睇到一樣嘅嘢；而從佢嘅表情得知，呢次應該唔係幻覺……