連環輪回不幸事件: 第十章：謎團 (2)

「你所打嘅電話暫時未能接通...」
「所有人都打曬喇，睇嚟得返我哋五個...」最後嚟到8咪半間大快活嘅黑仔向大家公佈呢個壞消息。
我同迪迪之後記到邊個電話就打俾邊個，最後成功搵到Yoyo、Magnus同黑仔。
原來Yoyo一早醒咗，不過唔知點聯絡大家，所以唯有等，好彩俾佢等到；黑仔早我少少醒，由於同Yoyo一樣唔記得大家電話，所以佢就落街周圍撞大家，仲撞到去葵興，結果反而仲遲同樣喺葵興出發嘅我同迪迪；Magnus就最特別，佢係因為聽到電話響而醒返，雖然唔知原因，但都係件好事。
跟住我同迪迪去拎返自己嘅陀錶，之後就約大家去大快活集合。Yoyo同Magnus喺等我哋嘅期間，順便拎曬所有喺荃灣嘅人嘅陀錶。最後，集五人之力，總算記到曬所有人嘅電話號碼，可惜再無好消息。
打完電話之後，我哋好快咁交流下大家遇到嘅幻覺，發現一樣係大同小異，唔同嘅只有自己嘅身份：Yoyo係研發新藥嘅專家，黑仔同我一樣都係物理學家，Magnus係生物系嘅博士。
「除咗我同你都係物理學家，其餘聽落都好似冇乜關聯。」黑仔同我講。
「我喺幻覺中都見到其他科學家...」我突然閃過一個畫面，於是向黑仔問：「之前你咪俾過隻陀錶我睇嘅，你可唔可以俾我睇多次？」
雖然覺得奇怪，但黑仔照俾我睇。
「你叫...陳延香？」




「係呀，有問題？」
「...真係有，我喺幻覺中都識一個科學家叫陳延香...」
 
「即係你嘅幻覺裏邊有我？」黑仔問。
「我都唔知，我記唔起佢個樣，不過感覺上的確有啲似...」
「嗯...這一刻我哋唔知嘅嘢實在太多：點解會發生意外；邊個令我哋輪回；佢嘅目的係乜；係邊個俾所謂嘅線索我哋；呢啲線索係真定假；又係邊個令我哋產生幻覺？呢一切我哋都唔清楚，幻覺中嘅內容更加係無從稽考。」黑仔提到嘅線索係真定假，我想趁人少少問下大家嘅睇法。
「你哋覺得我哋係咪真係只能活一個？」
「唔係！」估唔到第一個應我嘅係Magnus。「雖然我冇咩根據，但我覺得一時間我哋遇到咁多解釋唔到嘅，竟然會咁容易搵得返解決嘅線索，我覺得太簡單，簡單到好似有人set好個答案俾我哋咁。」
「我都覺得唔係，雖然冇原因，總之我覺得唔會咁殘忍！」呢啲可能係迪迪身為女人嘅直覺。
「我...」Yoyo欲言又止。但可能佢太細聲，其他人並無留意到。




「既然我哋搵唔到呢啲問題嘅答案，咁不如搵一啲我哋搵到嘅答案。」黑仔提議。
「即係？」我問。
「你問返我？跟住我哋點做，你應該最清楚。」
「搵俾陀錶我嘅嗰個人！」
黑仔一笑，其他人亦點頭表示同意。
「等等先，咁其他人點呀？」
「既然搵唔到佢哋，我哋逆向思維，試下解決輪回呢個根本嘅問題，可能大家都會冇事。」黑仔回應我嘅問題。
我哋都知道咁做未必有用，但冇辦法之下唯有咁做。
「我有個辦法可能可以幫到其他人。」突然第三把男聲加入咗我哋兩個嘅對話。