連環輪回不幸事件: 第十章：謎團 (1)

「呢一切都係假嘅！」周圍嘅環境伴隨住我心中嘅怒吼慢慢消失，取而代之係我熟悉嘅環境。
係我屋企嘅天花板！
我返嚟喇！雖然唔知點解會瞓咗喺張床上面，但而家最重要嘅就係聯絡大家！
我望一望個電子鐘，顯示屏上寫住11:59。
我個心離一離，好彩望到後面寫住嘅AM，即係話大概仲有12個鐘去幫大家。
經歷咗咁多次，我大概都記得幾個人嘅電話，於是我一路做出門嘅準備，一路打電話，一路整理一下究竟發生咗乜事。
放完嗰日豪華假期之後，我正常返咗屋企瞓覺，之後發生嘅俾車撞、MR世界，應該全部都係夢境、幻覺之類。雖然唔知點解會咁，但都係嗰句，而家最緊要嘅係了解大家嘅情況。
第一個打俾Andy嘅電話冇人聽。
第二個SK，冇人聽。
第三個TB，冇人聽。




我開始有啲慌，因爲我記得嘅電話差唔多打曬，而呢個情況我大概都確定到，其他人遇到同我一樣嘅幻覺。
我仲記得嘅號碼有……
「嘟嘟...嘟嘟...喂？Keith？係咪你吖？」電話傳來迪迪嘅聲音。
「...係呀，你無事就好啦！你可能唔知發生咩——」
「好恐怖呀！我見到好多喪屍，黐線架！」
「喪屍？」
「嗯，我本來好似平時咁，起身之後就去拎隻陀錶，點知拎咗隻陀錶之後，突然有架車失控撞咗埋嚟，之後一醒返，我就去咗間唔知咩房度，有個唔知咩人同我講，我係幫手做緊啲咩MR空間嘅實驗，而家諗返我完全唔知佢講緊咩，但當其時我好似好明白咁，之後唔知點樣，我好似變咗另一個人，過緊另一種生活，之後...之後...你明唔明呀？」迪迪一輪咀講咗一大堆嘢，直到講到口窒先至停低。
「你冷靜啲先，我知你講咩，因為，我同你一樣！」
 
之後我將我經歷嘅都講曬佢聽，發現確實係大同小異，唔同嘅只係佢嘅身份係一個醫學方面嘅科學家，主要研究喪屍病毒對人腦嘅影響。冇錯，就係咁中二，佢嘅幻覺世界係有喪屍。不過呢啲都唔重要，重要嘅係——




「我哋而家應該點做？」迪迪以十分細嘅聲量問我。
「吓？你講咩話？」
「而家...點做？」
「係咪電話收得唔好？喂？」
「……」
我忽然覺得我變得好聰明，我突然意識到唔係電話收得唔好，係佢好驚好不安，唔知點做。
「講個笑話你聽吖！」
「吓？」我好清晰聽到呢個「吓」字，證明我計劃已經成功咗一半。
「有一日小明話要同朋友去旅行，佢女朋友就問佢有乜人去，小明就答佢有男有女啦，女朋友再問佢有幾多人，小明話，兩個。」
電話嘅另一端完全冇聲。分散佢注意力嘅計劃無問題，係執行嘅人有問題……




「撲哧！哈哈！！我諗咗一陣先明，哈哈！」
估唔到幸運之神有一日都會企喺我身邊。
「做乜無啦啦講埋啲無聊嘢？」
「我見你心情好似好低落，咁咪...咩囉！」
「……多謝你。其實我好怕血，所以呢段時間見到嘅嘢，加埋幻覺世界見到嘅，我覺得...好恐怖，我...唔知...我...但我冇嘢架喇，多謝你！我都好鍾意睇呢啲笑話，之後我哋Battle下，睇下邊個好笑啲。」
「好呀！我大把貨！」
「所以...我哋而家應該點做？」