連環輪回不幸事件: 番外 (3)

番外篇3......
 
冇諗過唔單止有第五次輪回，仲有第六、第七次，而且仲穿越咗去一個類似平行時空嘅世界，究竟幾時先完？或者點樣先算係完？
不過點都好，我唔會就咁放棄，我要返去屬於我嘅世界，我要叫醒其餘嗰11個人！
老實講，對呢11個人仍然唔係好了解，但相處咗一段時間，對佢哋都有另一種睇法：
 
迪迪，雖然每次輪回最先見到嘅都係佢，但實際上同佢相處嘅時間唔多，唯一最有印象嘅係Christopher件事之後，佢問我「咁做真係啱？」嘅時候，我感覺到佢同我一樣都喺度苦惱緊，最後佢都冇講出佢嘅諗法，淨係靜靜地繼續同我行，但正因為咁我覺得冇壓力，身邊有一個同病相憐嘅人，至少，我知道自己唔係一個人面對。
 
黑仔，其實我覺得佢可能比Andy更聰明，至少更圓滑，感覺上親切好多，有啲似Andy同Bosco嘅混合體 (能力上)。
 




Billy，Christopher件事令我發現佢有一種義無反顧嘅性格，而且話一就一，知道咗Christopher有問題，就不顧一切全力對付佢，比其他人，甚至比當事人之一嘅Eric更落力。
 
Andy，的確佢提供咗唔少方向俾我哋，不過有時太堅持己見，往往淨係用理性去諗，不過好在佢都肯聽人勸，對大家嚟講應該都算利多於弊。
 
Magnus，我意外地發現佢同我都有啲似：同樣間中都會有啲有用嘅發言，但又唔會太多野講(至少同喺呢個環境底下嘅我有啲似)，而且同我差唔多大隻。
 
Bosco，同最初嘅印象一樣，有領導力，適當嘅時候會帶領到大家，又識得打圓場，全靠佢，避免咗幾次尷尬嘅情況出現。
 
SK，最初以為佢冇乜存在感，但相處得耐，我發覺佢係一個好難捉摸嘅人，永遠都好似好鬆容，雖然有時佢話自己都好緊張好驚，但我完全Feel唔到，可能因為咁，同佢一齊嗰陣，心情都會輕鬆啲。
 




TB，平時覺得佢傻下傻下，但好多時候，又會俾佢留意到一啲人哋留意唔到嘅野，希望佢可以留意到離開輪回嘅方法啦。
 
阿寶，一直都見佢冇點出聲，估唔到佢會咁強硬，可能呢件事真係令佢對大家好反感......
 
Kiki，感覺上佢同其他女仔唔係好傾到偈，可能係佢俾人嘅感覺比較男仔啦，有時見佢同男仔講嘢仲多過同女仔。
 
Yoyo，除咗平時嘅討論，好似聽到佢講嘢，就算係同班女仔一齊嘅時候，佢都係聽多講少，總覺得佢唔係好想表達自己。
 
雖然仲係唔了解佢哋，感情亦稱唔上深厚，但，我唔想再見到有人死！我唔想再面對自己嘅無能為力！我唔想喺件事發生咗之後，先後悔點解當初冇盡力！
今次，我唔會再俾人死！