連環輪回不幸事件: 第九章：幻覺 (3)

返工、放工、瞓覺。
每日不停重複緊呢一種嘅生活，一種好熟悉嘅生活，但熟悉中又帶點陌生，不過我冇理到，繼續同好多都市人一樣，過著營營役役嘅生活。
「總覺得你變咗。」呢位頭髮攣攣、皮膚黑黑嘅同事叫陳延香，佢爹地媽咪好似因為追到第四個先追到仔，所以改呢個名，有延續血脈、繼後香燈嘅意思。
「咩意思？」
「工作期間未必覺，但當你一放鬆，好多時會不自覺講多咗嘢，亦會好容易有一種想成為焦點嘅感覺，同以前嘅你好唔同。」
「……係咩？」
「……算啦，有改變都係好事。講返正題，我負責嘅宏觀物體粒子化實驗有新進展，我諗可以配合你嘅實驗。」
「Thank you.」呢句Thank you除咗係工作上嘅唔該，仲係想多謝佢對我嘅關心，不過我唔會直接表達，因爲我好似唔係這種性格。
「唔使！幫到你等於幫到呢個世界，我哋仲有得救！」呢度只有佢嘅情緒算係比較正面。
「嗯。」我好自然咁認咗佢一聲，因爲我應該知佢講緊乜，但每當我諗真啲，我發覺我好似乜都唔知。  




工作上嘅嘢我唔知：咩係量子隱形傳態，咩係量子力學多世界，乜咩係物體粒子化，我完全聽唔明……
日常上嘅嘢我都唔知：返工嘅地點，佢所講嘅拯救世界，甚至係我自己嘅性格，我乜都唔知……
其實我一直都察覺到，但我反而覺得咁先係正常，咁先係我嘅正常生活。
 
某日放假嘅深夜，百無聊賴，我突然想望住個鐘。見到佢「滴答滴答」，唔知點解有啲焦燥不安。時間一分一秒咁過，我明明冇乜急事要處理，但總覺得我有嘢未做，究竟係咩呢？
個鐘就嚟到12點，即係我就會瞓著。
吓？點解我會訓著？我平時做嘢都做到凌晨點幾兩點，12點喺我嘅生理時鐘嚟講，完全係工作嘅時間，我點會眼瞓？
唔係！我真係有啲嘢未做，我真係應該會瞓著！
我繼續望住個鐘，究竟我有咩要做？鐘？我要做嘅嘢好似同鐘有關，係錶？
唔得，都係唔記得。但我一定要記得，總覺得唔記得會死人，唔係誇張，而係真係會死人！




冇錯，我唔可以再俾我身邊嘅人死，嗰個感覺好差，我讀得書少，呢次真係只能夠用「非筆墨所能形容」。
咦？話曬都係物理學博士，都算讀得書少？
係，我讀得書少，因爲我唔係博士，我只係i大畢業，返緊一份紅日都要返工嘅垃圾工。呢度只係我嘅夢境、幻覺，唔屬於我嘅世界。我要快啲醒返，拎返隻陀錶，如果過咗12點都冇拎隻錶，我就會好似Dennis佢哋咁消失！而且唔單止我，如果其他人都一樣……
而我而家要做嘅事就係人肉鬧鐘！