連環輪回不幸事件: 第九章：幻覺 (2)

好快就已經行到去攤檔前，見到呢個利迷，突然諗返起仲未同大家討論佢想講乜，我諗呢個答案可能會係我哋嘅突破點。
我拎起陀錶，正打算繼續下去地鐵站嘅時候，突然覺得有啲暈，手中嘅陀錶因而跌落。
暈眩感來去匆匆，好快我就冇事，我馬上執返地上嘅陀錶。
真心咩！我個嘢壞咗？！我望住零件四散嘅陀錶，心諗點解會咁兒戲？我真係咁就要領便當？或者，仲有得救！我即刻衝去地鐵站，諗住同大家商量下，集思廣益，可能會冇事呢～一定，一定冇事！
禍不單行，心急起嚟好容易會出事；我完全冇留意到而家喺紅燈，就咁衝咗出馬路，一架巴士迎面而嚟，之後，就冇之後……
如果呢個係一部漫畫，我相信係作者被腰斬，趕住寫個結局，最後用呢一個咁兒戲嘅方法寫死故事入邊嘅角色，而我就係腰斬下嘅犧牲品。
咦，好似仲有之後喎！因爲我發覺雖然朦朦朧朧，但我仲有意識，雙眼可以勉強咁慢慢睜開。
「何生你好，你而家感覺點呀？」一擘大眼就見到一個身穿西裝嘅男人向我問話。
「……」
「你可以放心，啱啱從MR世界返過嚟，係會有少少記憶混亂嘅副作用，但好快就會冇事，瞇埋眼休息一分鐘。」




MR世界？有冇人可以話我知發生乜事？
 
我按佢嘅指示唞咗一分鐘，腦裏面嘅資訊開始清晰：我參加咗一個有關人性嘅實驗，實驗利用咗混合實境(Mixed Reality)，令我哋置身一個由實驗人員虛構出嚟嘅世界。呢個世界我哋會面對一啲同生死有關嘅兩難局面，實驗係想睇我哋會點樣做出決擇。而只要一死，實驗就會馬上結束，只係估唔到我係會咁死法，睇嚟我嘅實驗結果會冇乜價值。
得到工作人員嘅道謝，處理完簡單嘅手續後我就離開咗。
點解我會參加呢個實驗？可能係出於科學家嘅探究精神，我對呢個實驗同混合實境都有啲興趣。係喎，唔記得講，我喺現實世界嘅身份係一名科學家，主要研究嘅係量子力學。
可能整個實驗嘅感覺都好似瞓覺咁，我唔太眼瞓，於是做嘢做到凌晨兩點先瞓。
「鈴鈴~鈴鈴~」鬧鐘響起，我如常返到實驗室繼續我嘅研究工作。
「你研究緊嘅量子隱形傳態宏觀化有冇進展？」我嘅上司兼好友關梓復問道。
「一返到嚟就追我功課？咁你又點呀，聼講你好似同呀嫂嗌交喎？冇事嗎？」
「你發生咗咩事？」呀復突然用疑惑嘅眼光望住我。




「我？我冇事喎，似係你有事多啲喎，不如今日放工啤啤佢？」
「你究竟發生咗咩事？你變咗第二個人咁。」
「吓？我不嬲都咁健談，咁關心...朋友？！」我突然發覺唔對路，我平時好少講嘢，頭先嘅我，連我自己都覺得好似另一個人。
「我諗係之前個實驗嘅副作用，你當我冇講過。講返正題，我想先了解左你嘅量子力學多世界發現先。」
就係咁我慢慢習慣返現實世界嘅生活。