連環輪回不幸事件: 第九章：幻覺 (1)

宇宙的另一邊。
「祢的計劃似乎又失敗了。」一個有着典型科學家打扮的男人說道。
「不是衪阻止的話，他們早就死清光了。那個沒用的...是叫作Christopher吧？我還以為這些『提示』已經足夠，沒想到負責執行的人是一個廢柴！」一個看不清容貌，不斷以左手四指指頭依次輪流敲打自己大腿的「人」說道。
「夠了，我現在只想知道你還有沒有其它辦法？這裏，時間不多了。」
「你知道的，那個世界的『蓋亞』會因我的干預而引發反噬作用，而且每次的反噬作用會越發強烈，影響該世界的熵值更是……」
「夠了夠了！我只想知道答案。如果你真的想我派上用場，你必須替我渡過難關。」
「……明白了。我會使用專屬技能，但後果是引發強烈的反噬，我不但短時間內無法使用技能，更加無法干預該世界。」
「你的技能不是...？啊，我明白了！」科學家隨後發出一陣傳統奸角笑聲。
 
宇宙嘅呢一邊。




「原因？」率先打破沉默嘅係Andy。
「我覺得你...大家好恐怖，好得人驚。」阿寶嘅語氣都充份令人感覺到佢真係好驚。
「如果我哋唔係咁做，你而家仲可以咁驚咁講呢句說話咩？」Billy理直氣壯。
「我哋都明，但我哋都好驚，你又明唔明？」TB係三人其中之一。
「我完全唔明你講乜！」Billy道。
「你唔好理啦，驚，我哋都控制唔到，我哋淨係想唞下，乜都唔理住。」三人中最後一人係Yoyo。
「其實唔好講你哋，我哋嘅情緒都唔係太好，所以我都明白對住我哋會容易諗起呢件唔開心嘅事，或者唞下都係個好主意。」眼見Billy想反駁，Bosco先發制人。
「其實而家我哋變相係有無限嘅錢同時間，不如我哋今日當放假，用曬自己嘅錢去玩，聽日先至再諗下之後應該點做，好冇？」雖然我好似好樂觀咁提議，但其實我嘅負面情緒都未完全消退，或者呢個建議主要係針對我自己。
「喂，呢啲說話咁似係我講嘅嘢嘅？有得Hea下我冇所謂。」SK第一個附和。
「但始終冇人可以確保到聽日我哋仲會擁有相同記憶——」




「以呢幾次嚟計，機率都算好大，係咪？」黑仔打斷Andy。
「——唞下對大家都好，我哋之後再傾啦。」Andy都屈服埋。
儘管未必所有人都同意，但最後大家都係選擇咗我個建議，於是大家都落咗車，享受呢一日超級豪華假期。我趁住呢個機會約我心儀嘅對象——當然冇可能！其實毒撚一個更開心！事實上呢日都真係幾開心，食嘢買嘢唔使睇價錢，可以盡情享受，雖然未能完全釋懷，但心情的確好左好多。
大家好似有共識咁，完全冇聯絡對方，或者咁先可以等件事慢慢過去，始終不論係直接定間接，殺人對我哋平凡嘅市民嚟講，都係一件好遙遠嘅事。
呢日發生嘅事，下刪一萬字描述，總之歡樂嘅時光過得特別快，好快就挨近12點。之前發現不論想唔想，去到12點就會瞓著，一起身就係第二朝。即係話好快又要再面對返同樣嘅問題，呢個感覺好耐冇遇過，就好似第日要考試咁。不過醜婦終須見家翁，我都係決定好好訓一覺，船到橋頭自然直。