連環輪回不幸事件: 第八章：內疚 (3)

主力拉佢出去嘅Billy都已經一隻腳踏出車門外，其餘冇份幫手嘅女仔亦已經喺唔同車門準備就緒，睇準時機就衝出車外。題外話，女仔冇份幫手對付Christopher，唔係因為性別問題，只係過多嘅人推一個人反而可能會適得其反，倒不如由男子組上陣，成功率可能更高。
眼見即將成功，Christopher突然將手上嘅陀錶掉向車廂內，Eric唔理其他人，馬上試圖飛身接住，原本負責直接推Christopher出車外嘅佢，唔單止冇再推，仲將幫手推緊嘅黑仔、Bosco同SK撞開；同一時間，同我、Magnus一樣，負責擋住其他嘗試介入嘅乘客嘅Andy就大叫：「大家返入黎！」而大家亦好聽話，原因好簡單，冇咗「推」嘅力量，而負責「拉」嘅Billy又俾Christopher掙脫開，要喺一瞬間再推返Christopher出車外，外加大家一齊離開根本做唔切，最終只好叫大家返入嚟。
勉強返得切入嚟嘅Billy，突然怒吼，然後撞向Christopher。當打算望向佢哋兩個嘅時候，我聽到迪迪低聲慘叫，再循著迪迪嘅視線望過去，只見到Eric同佢身旁爛咗嘅陀錶。然後，Eric慢慢企起身，走向被撞跌嘅Christopher，一拳，兩拳，三、四拳，一拳一拳咁打落Christopher身上……最後，Eric從失去咗一半意識嘅Christopher身上搵到屬於Christopher嘅陀錶，然後，佢拎起用力抌落地下，發出碎裂聲音嘅同時，周圍嘅環境變得漆黑一片，我望住Eric同Christopher好似當時嘅大眼美女一樣，突然被撞飛，兩個人嘅血染紅咗漆黑嘅環境，呢個景象一直維持到我真正嘅眼前一黑……
我可以阻止Eric，但我冇咁做到；相反，我阻止緊試圖阻止Eric嘅人。因爲我知道阻止Eric形同自殺，但我所做嘅同幫兇有乜分別？
Christopher，我有份殺死。
 
熟悉嘅鈴聲響起，我又再次係熟悉嘅床，熟悉嘅一日睜開雙眼。Dennis，Stella，Christopher，仲有Eric，其實會唔會由頭到尾都唔關隻陀錶事，佢哋依舊會輪回？但如果係噉Christopher嘅計劃會唔會成功？Elvis會唔會俾人救返，根本冇死到？所有答案好快就喺重新再開嘅whatsapp group搵到——佢哋五個並唔喺group入面。負責開group嘅Andy話，呢五個電話冇登記，佢好有信心冇記錯到，即係話佢哋五個喺呢個世界徹徹底底咁消失咗。
黑仔「我哋上咗地鐵集合先」8:31 AM
大家和議。
依舊，我喺地鐵Ａ出口前見到迪迪。正常情況下，單獨同女仔相處我都未必知要點樣打開話題，何況係而家？




「我哋咁做真係啱？」當我苦惱緊點開口前，迪迪先發制人。
呢個問題某程度算都中我要害。
「我...唔知咁仲算唔算啱，我淨係知道我哋一定要噉做！」比起回應佢，我更加似係想說服自己。
「點解？」
「可能我哋冇權控制人生死，但我諗我哋有權保護自己嘅生命。」其實我唔肯定佢嘅點解係想問乜，或者我只係想答我嘅答案。
佢冇再回應，只係好似若有所思。之後一路無語，好快我哋就上到車見到大家。
「我哋齊人啦，照舊去返深水埗間m記先，再傾下之後點做。」
正當我以為大家都會按呢個正常流程行嘅時候……
「等等，我地三個唔會去！」平時唔多發表意見嘅阿寶突然反對Andy嘅做法。
呢刻，車廂中只有僅存嘅12人。