連環輪回不幸事件: 第八章：內疚 (2)

車門打開，並冇意外發生，Stella並冇出現。
下站已經喺深水埗，如果由得Christopher搭到去太子然後輪回，佢好可能真係會喺下一次整爛曬所有其他人嘅陀錶，到時就返唔到轉頭。
要阻止佢，得一個方法：唔俾佢輪回！
而好明顯，去到呢個時刻，除咗...除咗...整爛佢隻陀錶，似乎都冇其他辦法……但邊個落到手呢？
呢個時候每個人都有不同嘅反應：
Kiki表現憤怒；
Yoyo顯得焦急；
阿寶感覺驚惶；
TB老鼠拉龜；
迪迪手足無措；




Andy雙眼緊閉；
黑仔欲言又止；
Magnus無可奈何；
Bosco雙眉緊皺；
Billy面露兇光；
SK異常冷靜。
而我就只能夠觀察其他人嘅反應，心底裏希望其他人會出手。
至於當事人Eric，佢既無應承Christopher嘅提議，但亦冇反對，佢只係慢慢走向Christopher嘅身邊。
「呢個確實係一個好提議——」
砰——！




突然一聲，全場人都意想不到。
Eric一拳打向Christopher嘅腹部，Christopher彎曲身體後退兩步，但手中仍然緊緊握住Eric隻陀錶。
Eric把握呢個機會，即刻伸手去搶可以救自己一命嘅陀錶。但Christopher都並非省油的燈，佢好快就回過神，同Eric展開陀錶爭奪戰！
而呢個時候，在場嘅男士都意識到係出手嘅時機，大家都一齊加入這場混戰，當然唔少得我。唔知大家點諗，但我好清楚我哋要搶嘅唔單止係Eric嘅陀錶，最重要嘅係Christopher嗰隻。要阻止佢嘅計劃，只有阻止佢輪回！時間唔多，根本無時間考慮太多，呢個時候唯有唔好諗，直接行動！又或者係因為冇時間諗，先至可以行動……
 
已經聽到下站到深水埗嘅廣播，時間一分一秒咁流逝。
「如果搶唔曬兩隻錶，我哋就推佢出車先！」已經唔肯定係邊個嘅提議，但我相信大家都有共識咁做。
但估唔到呢件事比想象中更加難；Christopher一聲鄭嘉穎式大叫，隔一個車廂嘅人開始注意到我哋……唔係，其實一早已經注意到，應該係話佢哋唔單止注意，有好幾個人已經試圖阻止我哋，甚至有人話要緊急煞停架車。喺其他人嘅干預下，搶隻錶同推佢出車同樣都咁難做到。
呢個時候車門已經打開。
「唔好理喇，照推佢出去先！」Bosco下令。




喂！你哋停手呀——旁邊嘅途人再度介入。
雖然知道香港人係必要嘅時候會發揮佢嘅正義感，但呢次真係寧願遇到港豬。
你哋再係咁我報警架——其中一名大媽大叫。
「你鍾意咪報囉！我而家死都唔怕！」Billy以更大嘅聲量回復。
我哋用盡全力拉佢出車，因爲我哋知道，呢次爭奪戰嘅勝利條件就係唔俾佢輪回！但同樣地，Christopher都知道不論係俾人搶走陀錶，定俾人拉咗出車，佢都等於GG，所以即管係受傷，佢都要以持有陀錶嘅姿態留喺架車入邊。
好在我哋人多勢眾，慢慢已經將佢拉近門邊，呢個時候熟悉嘅「please mind the door」亦都響起……