連環輪回不幸事件: 第八章：內疚 (1)

「Christopher比起我哋，佢更早知道發生緊咩事，佢一早知道我哋係身處喺輪回世界，一早就開始調查，最終發現我哋呢17人只有一人能夠平安返番去正常嘅世界；而Eric一早覺得Christopher有古怪，所以佢寧願唔落車都要跟住佢。」Bosco向一臉疑惑嘅我解釋。
「咁而家……？」
「你睇下Christopher手上拎住啲咩？」
「陀…錶？拎住陀錶有咩咁特別？」
「隻陀錶唔係佢㗎！佢本身嘅計劃係想偷偷地整爛曬所有人嘅陀錶，佢話只要冇咗隻陀錶，陀錶嘅主人應該就會死，冇機會再輪回，無論任何嘅情況！雖然冇確實嘅證據，但根據之前個女仔件事嚟睇，陀錶的確好有可能係輪回嘅關鍵，爛咗嘅話對我哋嚟講風險好高。如果唔係Eric篤爆咗佢，我哋可能死曬都唔知咩事。」
我花咗一分鐘，終於大概掌握咗呢一刻嘅狀況：Christopher想偷偷地整爛其他人嘅陀錶，點知俾Eric同Billy發現咗，之前就俾佢哋一直追到落地鐵入邊，Christopher趁混亂仲搶走咗Eric隻陀錶。
「你哋唔好行過嚟，如果唔係我一嘢掟爛佢！」Christopher威脅大家。
「喂吖，你冷靜啲先。」「你俾返佢先啦。」「唔好呀！」
迪迪、TB、阿寶一齊勸喻佢，但當事人不但唔驚，仲反威脅佢。
「你試下，你夠膽就掟爛佢，我陪你一齊死！」Eric高舉拎住陀錶嘅右手，雖然睇唔到錶上面嘅名，但唔難估到隻陀錶係Christopher嘅。




局勢又再度僵持。
 
「喂！雖然你都仆街，但唔值得為呢條冚家拎搏命！」Billy道。
呢個時候架車已經去到美孚，但呢一卡並冇人上車。
「你哋信我啦，Elvis已經俾佢殺死咗，唔會有人上車架喇。」Eric道。
大家嘅眼光變得更加懷疑Christopher。
「我都係嗰句，我只係幫你哋做你哋想，但唔敢做嘅事咋！成班偽君子！」Christopher道。
時間越嚟越緊迫，如果喺到太子之前，隻陀錶真係爛咗，會唔會真係……
「你放低隻陀錶先，冇證據我唔會單方面信曬Eric講嘅嘢， 總之我哋深水埗出咗閘先，再睇下有冇新嘅發現。」Andy道。
就快到荔枝角。




「我唔會信你，可以生存到最後嘅只會得我同Eric。」
Christopher突然轉向Eric。
「得我同你每次輪回可以咁早起到身，只要下次我哋合作，整爛曬佢哋嘅陀錶，再睇埋Dennis唔上車嘅結果，安全嘅學佢唔想上車，出咗事嘅，我哋就長沙灣先上車。咁多卡車，佢哋就算想阻止我哋都阻止唔到。」
確實咁做我哋好難阻止佢，除非……
「我哋唔會怪你架，不如你哋一齊放低隻錶啦！」Kiki道。
其他人都開始幫手說服佢。
「係呀，我哋再一齊諗辦法啦。」阿寶道。
列車已由荔枝角開出。
「你都確保唔到咁做真係有用，不如真係一齊集思廣益啦。」Magnus道。
大家你一言我一語，列車好快已經到咗長沙灣，時間已經唔多……