連環輪回不幸事件: 第五章：真相 (1)

「吓？咪住先，可能佢係冇事，而且已經離開咗呢個輪回架喎！」Stella道。
「係囉！我本身都唔打算再拎隻錶架，係見你講到唔攞唔得先至拎咋。」阿寶道。
「你哋真係咁諗？其實Andy唔叫我都打算拎。大家都親眼睇到架，佢喺我哋面前飛起咗，跟著就流血，成個頭紅曬，你哋覺得咁係咩原因？Keith之前話見到佢嘅錶仲喺攤檔度，將所有野link埋，傻嘅都知咩事啦！」Bosco道。
「咪係囉！」SK附和。
佢真係死咗？真係咁就死咗？
「就算佢真係死咗都唔肯定關唔關隻錶事架！」TB道。
「下一站深水埗……」
「時間唔多啦，你哋都講得啱，我冇證據，但我決定深水埗落車，如果想做啲野，想有改變就一齊落車啦！」Andy道。
「不如再投票？」我建議。
「時間唔夠啦。我決定落車。」黑仔道。「咁你哋點呀？」




「你落唔落？」
「唔知呀。」
「我哋應該唔落。」
車廂聲音此起彼落。大家都對落車有所保留。
「其實我都覺再咁落去只會不斷重覆，咁不如我哋試下啦。」我聽到迪迪好細細聲咁同其他幾個女仔講，當然唔包括Stella。
我唔知佢哋點諗，但聽到迪迪咁講之後，我已經決定我會落車。
「我陣間會講埋第三個發現，要聽就落車。」Andy講完就面向即將開嘅車門。
呢個時候有人仲互相問緊落唔落，亦有人一言不發。氣氛比想像中凝重。或者做咩決定並唔係重點，而係「做決定」本身會將我哋分裂。
但我明白，咩都唔做就咩都唔會改變，要變，就要去做，即使有機會變差。我企去Andy身後，冇再望其他人，唔知係唔想定唔敢望。
呢刻，我比任何一次更想車門快啲開。




 
「請勿靠近車門。請不要靠……」車門即將關上。我踏出車廂，回頭一望，竟然只係得番五個人：Dennis伉儷、Eric、Elvis同Christopher。
人數之少雖然係有少少出奇，但都唔夠Eric留低咁出奇。一直以黎佢嘅立場都偏向積極，投親票都係建議離開車廂，但而家竟然……
「好啦，而家……」Andy數一數，再道：「十二個人，我哋去m記先啦。」
「喂，不如一路行一路講咗第三個發現先啦。」Bosco道。
突然一陣沉默。
「做咩唔講野呀？」TB問。
「喂，問你呀！」Billy大聲道。
「其實根本冇第三個，我只係希望大家出黎，如果唔係我哋永遠都離開唔到呢個輪回……」Andy道。
「屌你呀！」Kiki怒斥。




「喂……」黑仔即時望向Andy。
Andy同時望向黑仔，然後稍微搖頭，黑仔亦冇再出聲。
「呃咗你哋，sorry。但而家唔係追究嘅時候，最多返到去正常嘅世界我再請你哋食雪糕。不過如果唔介意，我可以而家找數先。」Andy笑道。
「你就想！而家唔使真係用錢邊顯示到你嘅誠意，到時起碼一人一個餐。」Kiki回復平靜，笑住回應。
大家閒談幾句之後就已經行到m記。大家都估唔到呢次落車真係會有所發現，一個恐怖嘅發現......