連環輪回不幸事件: 第四章：變化 (3)

「但要煩囡喎。我哋呢度陽盛陰衰。」SK一句說話拯救空氣，於是我哋嘅話題就繼續落去。
「喂，話時話，你哋覺得有冇邊個ok？」SK問。
我第一時間諗起迪迪……
「同你一齊入黎嗰個都ok吖！」
「唔得啦佢，呢度冇靚女。」我道。
「屌！你眼角咁高架，我覺得阿寶都唔差，雖然矮咗啲。」Bosco道。
我隨即望去女仔堆度，只計現場嘅女仔，阿寶的確算係最好，加埋身形嬌小，的確容易惹起男性嘅保護欲；TB正如我之前所講，的確係背多分，米六左右，身材標準，全場唯一著裙嘅女仔，只睇背面更勝阿寶一籌，可惜塊面比較包；Yoyo就係「肥妹仔」三個字足以形容；企喺另一邊嘅Kiki雖然我覺得有啲MK，但絕對唔係好少女嗰種，反而有啲男仔頭，相對比較中性。至於男仔，我冇興趣留意。
之後唔覺意同迪迪眼神對視咗一下，我即刻望向隔離。我再仔細望，原來呢度分咗四個圈子：女仔堆、我哋三個、冇埋堆嘅Kiki同Andy、仲有就係其餘嘅人。好彩Bosco同SK黎搵我，唔係我就真係一個毒撚。
「SK呢？你點睇？」Bosco問。
「冇個得。」SK道。




「頭先又話迪迪ok，而家又話冇個得。」我道。
「屌，我睇開IU同Blackpink架，佢哋梗係唔得啦。」SK道。
「都唔識野嘅你，Twice正啲囉！」我道。
「夠啦你哋班死毒撚，完全唔知你哋……」
「下一站美孚。下一站……」我哋傾下傾下話咁快就到美孚，一下子又要面對番呢個殘酷嘅現實。嗯……我都唔知咩先叫現實啦，總之雖然講就咁講，但我都係想返番原本嘅世界，屬於我嘅世界。
 
「好啦，可以開始啦。」Andy等到Elvis同Christopher入埋黎，Dennis打埋比女友，之後就入主題。
「首先，目前我發現都三件事，第一…」
「你唔好同我講係乜野我哋輪回緊之類嘅廢話呀！」Christopher打斷Andy嘅說話。「第一，輪回嘅只係我哋嘅肉身，唔包括所有身外物。」Andy無視呢個打擾。
「你信佛架？講野咁似和尚啲口吻嘅？」TB問。




「唔好又打斷人啦。」黑仔特別強調個“又”字。
「我唔係信佛，不過咁講我覺得幾貼切啫。我講清楚啲，我做咗個實驗，我上次輕輕咬崩咗右手食指嘅手指甲，結果……」Andy舉起右手，伸出食指。
「嘩！開心大發現， 咬崩手指甲真係會崩喎。」Kiki講出我嘅心聲。
「重點就係度。唔知大家有冇睇八達通餘額嘅習慣？」Andy問。
話題一跳，眾人議論紛紛，有人話冇，有人話平時有，不過而家咁嘅情況就冇，而我就不嬲慣咗出閘先睇。
「即係大家都冇留意。最初我都冇特別注意，但我咁橋發現每次輪回，餘額個數都一樣。」Andy道。
「咁我哋輪回緊架嘛，好出奇……呀！」TB突然“呀”咗一聲，之後就沉思，而我都明點解佢會咁。
「即係我哋個人自身發生咩事都會帶落下次嘅輪回，但身邊所有野包括八達通，whatsapp group就唔會帶落下一次。」我補充。
我講到whatsapp嗰時聽到迪迪講「原來係咁」。
「勁喎，咁都發現到。」SK道。




「其實係因為我上兩次冇食早餐，跟住肚餓，先至留意肉身輪回問題。因為我諗緊一直輪回係咪唔使食野。」Andy笑道。
「嘩，你搞gag呀？」我問。
「Sor囉，唔好笑都唔使咁嘅～」Andy道。
「唔係～不過見你個人唔似搞gag啫。」我講完之後見到有幾個人點頭。
「你哋唔熟我啫，不過呢個環境，我諗都好難做到最平常嘅自己…」Andy道。
我好認同，我覺得我都有啲唔似真正嘅我。
「喂，返番黎先，講番有咩發現先。哈哈，係咪惡咗啲？」TB道。佢大概係on9得黎又令人嬲唔落嗰種。
「嗯，你啱。時間唔多，跟著我會講快啲。而家我講第二個發現。」
我望一望，原來已經到咗長沙灣，Stella亦已經上車。
「第二個發現我諗大家都知：唔拎陀錶會死。」Andy續道。