連環輪回不幸事件: 第五章：真相 (2)

「我想去個廁所先。」Magnus道。
「組隊。」我今朝趕住出門，而家都有啲急。
「一齊多啲經喎，等埋。」SK喺我哋一起身之後道。
「我哋都想去。」TB同迪迪都表示想去。
「我估你哋應該要去公廁……」Andy話口未完Magnus已經喺我轉入廁所前調返轉頭。
「廁所維修緊，去公廁啦。」
「個廁所成日維修，都唔知維咩。我哋等埋你哋先開始。」Andy道。
Andy教咗我哋點行之後，我哋五個就離開咗m記。去完廁所，我哋三個男仔前，兩個女仔後，行返原路返m記。
突然TB停低，連同迪迪都企咗係度。我哋三個男仔唯有折返。
「做咩停低呀？」Magnus問。




問完之後，佢望向女仔們視線方向，然後同佢哋一樣定咗形。
我同SK一齊望過去，再一齊定形。我哋睇緊嘅係一間舊式嘅維修地舖，正確嚟講係地舖入面嘅電視，再正確啲講係電視播緊嘅特別新聞報導。
「一列往中環方向嘅列車於今早八時三十分左右發生意外，喺深水埗至太子時突然脫軌，暫時造成五死逾百傷。事件起因仍在調查當中……」       
 
「返黎嗱，咁耐嘅？做咩死老豆咁嘅樣呀？」Andy問。
一片寂靜。
「做咩唔出聲？」Kiki問。
依然冇人回應。
我心知點都要有人出聲，所以……
「我哋架車撞咗……」Magnus同我有相同諗法。




「吓？我哋幾時買咗架車？」Bosco苦笑道。
「唔係講笑呀。」SK望一望大家，之後將新聞所講嘅內容向大家闡述一次。
一個名為沉寂嘅氣氛出現喺SK嘅話語後。
新聞嘅後續係報導列車損毀情況，最嚴重嘅係第一卡與第二卡。由於列車係喺第一卡轉彎時發生意外，所以最接近第五、六道車門嘅乘客全部喪生。
「五死……會唔會係……」阿寶道。
「嗯，我諗係。」Andy平靜道。
跟住我聽到TB同Yoyo細細聲講話Andy冷血，但我諗聽到嘅唔只我一個。
「放心，佢哋冇事。因為…我哋會輪回。」Andy講完之後，所有野都貫通曬。
我哋之所以會輪回，其實係有人……或者係神想保住我哋條命所做出黎；而第一卡上有個唔知發生咩事嘅男仔就係因為佢冇搭到去太子；至於點解得咁少人，好可能係因為好多人冇拎隻錶，根本連第一次輪回都冇，換句話說，即係佢哋喺最初嘅世界已經死曬，而我哋就係死剩種。
「唔怪得咁少人，就算大年初一唔使返工，都會有好多人拜年，地鐵冇理由咁少人。」Kiki道。




我哋討論完之後，決定出發去調查有冇機會「唔使死」。
「出發前講多次，我哋嘅目的係調查有冇可能可以喺保住條命嘅情況下離開呢個輪回。而調查方向就係去我哋十八人嘅出發地點，搵比隻錶我哋嘅人。」Andy進行最後總結。
「地點有四個，咁我哋分四組啦。」Billy道。
「我有個建議，每個地點最好有本身喺嗰度出發嘅人同第二度嘅人，咁樣會容易啲注意到線索。」
「勁喎Bosco，我buy你。」我一講完就發現好大機會唔同迪迪分開？！我唔係唔捨得，係唔慣啫，何況我諗唔到反對嘅原因。
「咁我代Stella去長沙灣啦。」Andy道。
「我去荃灣啦。」
「我都係。」
「咁我去美孚。」
我哋半自薦半分派咁分咗四組，迪迪去返葵興，因為迪迪話驚自己去其他地方幫唔到手，而最後我去咗荃灣。因為荃灣比較大，同埋係比較多人嘅出發地，所以有四個人，同我一齊嘅有SK、TB同Bosco。我哋開返whatsapp group後就出發。就係咁，我第一次真真正正為咗自己嘅將來奮鬥。